الجزء الثالث حب بعد الزواج (منال و مهدي)

الجزء الثالث و الاخير من كرونيك حب بعد الزواج (منال و مهدي)

_مهدي :سمانة هذي ندخل نخدم

_ضحكت :انا مازلت

جابلهم لعشا بداو ياكلو

_غدوا لخر نروحو

_ههه هاه

 

صونا تليفون num متعرفوش محبتش تهز و بقى يعاود هزت

_الو

.....

_بففف وقت تمنييك تع دري درك

_منال هه

_شكون 😐

_زعما نسيتيني و فرحانة مع راجلك

_هي ساكتة و خايفة

_مهدي : مناال وشبيك... و هي في عالم آخر

_ منال شوف مع الباب

طلعت راسها شافتو واقف ضحكلها بخبث و خرج.... و كمل يهدر : نتي ليا وحدي و درك تشوف واش نديرلك يا انا يا راجلك مهدي باي منولتي باي و كوبا

هي دارت لمهدي :امان نطلع للبيت درك

_ايه هيا....طلعو و هي تايهة نعست طول بقشها و مهدي حاير فيها نحالها طالون و رقد هو زادا 😇 ... 12 تع ليل فطن مهدي بتيليفون منال يصوني نيميرو ممسجلش ريبوندا

_وليد:الو

_مهدي: شكون

_وليد : لا نتا لي شكون نيميرو تع منال هذا

مهدي تفكر بكري كي عيطلها نفس نيميرو و تقلقت :-شوف يا شا اسمك تزيد تعيط و لا دور بدين ام مرتي نوريك شكون مهدي ولد يوسف يا ن...

_وليد خاف حط في بالو منال حكات لراجلها عليه و يعرف عايلة مهدي عندهم نفوذ في البلاد و بكلمة يقدرو يوصلوه للحبس كوبا😐

طلع النهار فاقو فطرو و حكمو طريق الرجوع منال نعست وومحستش بالطريق حتى قيمها كي وصلو...هبطو للدار حلتلهم سعاد

_على سلامتكم ولادي

_الله يسلمك سعاد

_منال بنتي شناحوالك وجهك صفر لاباس

_اه طاطا حمد لله تعبت من الطريق برك

_ايه اطلعو ارتاحو

منال طلعت رقدت و مهدي غسل و هبط شرب قهوة و خرج ...

منال ناضت غسلت لبست جبة كحلة فرزت حوايجها وهبطت راحت عند هبة

_واش حوالك منال

_لباس

_احكيلي كفاه جوزتيها

_علكيف بصح غيرة خوك تعبتني

_ههه اني قتلك

قاطعتهم الباب سعاد :هيا بناتي اهي جات صفية وتسقسي عليكم

_هبة: هذيك الحنشة لماه جاية

_احشم اي جداتك هذيك

هبطو

_صفية :عسلامة منال ا واش حوالك كفاه جوزتي الفاكونس

_منال:جوزتو هايل طاطا صفية

_صفية :ماذابيا نشوف ولد مهدي خفو رواحكم شوية

_سعاد :خليهم على راحتهم مزالهم عرسان عادا مرتاحوش من عرسهم

_صفية :اييه اقعد برك حامي عليها نتي كون تظهر متجيبش اندب في وجهك نتيا

منال تغشت :بعيد شر عليا طاطا مابيا شي مي مزالني مخممتش باش نجيب دراري مزالني عروسة و طلعت لبيتها غاضتها هدرة صفية...عيطت لايمان

_ميمي توحشتك

_منال صافا بب

_حمد لله ليوم جيت من تونس

_ياا احكيلي 😂

_حكاتلها من لول ملي راحو و على لبوسة 😍

_يااا خراا طيحتي الراجل ديجا ههه

_ههه قود شكون تجيه فرصة و ميبوسش 😑

_واش قاعدا دير درك

_كنت معاهم لتحت و حكاتلها على صفية و بدات تبكي

_وااه هذي وجها صحيح كون جيت منك نمدلها زوج كلمات واش دخلها هي متبكيش منال

_ايه 😢 هيا باي سمعت مهدي جا

_اوكي بب باي اتهلا في روحك

منال قعدت و تفكرت زادت بكات حتى تلقا مهدي دخل شافها تبكي دورت وجها و دارت روحها ناعسة

_مناال

_اممم

_وشبيك تبكي !!

_مقاعداش نبكي 😁

_😑قاعدا تسيق في وجهك مالا طلع راسك نشوفك

_مسحت وجها و شافت معاه

_هاو كنتي تبكي شكون قلقك

_على كلمتو هذي و طرطقت بالبكا 😰

قعد حداها

_منال شبيك

_لماه هما شكون انا كلبة يهدرو عليا هكا ولا شا يشوفوني

_شكون هادو

منال تفكرت بلي جداتو محبتش تدير المشاكل

_ناضت مسحت عينيها: حتى حد دخلت للدوش وقفلت الباب

مهدي هبط عند امو

_شكون هدر مع منال😡

_اه منال وشبيها

_شكون هدر مع منال قيتها تبكي

_اا صفية وحكاتلو ... كي سمع بلي جداتو راح يجري ليها

_اه مهدي وليدي جيت

_لا لا مازلت في الطريق 😑

_وشبيك على اعصابك

_سقسي روحك واش هدرتي لمنال 😠

_اه هديك ستوتة ديجا حكاتلك

_صفية متخلينيش نغلط تعرفني كي نتقلق ماش هي لي حكاتلي و متهدرش معاها هكاك

_واش فيها كي نهدر ننصح فيها كيف امها

_ههه كيف امها 😕 هذي حاجة شخصية بيني و بينها لا نتي لا امها تدخلو فيها فهمتي

 

طرطق الباب و خرج

سعاد قالت لهبة تطلع عند منال

دقت الباب _مناال انا هبة

_ادخل ادخل حبيبتي

_راحت قعدت معاها :منال اختي متاخذش على كلام صفية هي طبيعتها هكاكا و لسانها يحرق

_بصح هبة واش داها sujet هذا وي نقول حابة تشوف ولد حفيدها و لماه تقول بلاك متجيبش هذا شرفي مدخلش فيه

_ايه هذا واش قال مهدي

_مهدي ؟؟ 0_o

_ايه معلابالكش راح ليها قلب الدنيا بالعياط قالها حاجة بيني و بينها واحد ما يدخل و متزيدش تهدر معاها هكاك و خرج مغشش

_منال عجبها الحال 😂 اه درتلو مشكل

مع جداتو 😕

_نن دايما هي هكا و مهدي يقلق بزاف يقابضها متقلقش عيش اختي و هيا اهبط معاي ماما من بكري تسأل عليك

_هبة prd والله ما عيني درك مبعد شوي نهبط

❤

منال قعدت تخمم في مهدي ولي دارو حستو مهتم بيها وبدا يتقربلها وهي تاني بدات تحس بلي والفاتو

منال بدلت قشها ولبست غوب دو نوي قصيرة ورقدت مهدي جا على 12تاع الليل شافها راقدة راح ليها يتأمل مع وجها البريئ و تفكر دموعها لي هبطو بسبة صفية حسها بدات تدخل لقلبو و ما فاهمش روحو لاكان والف بيها برك ولا بدا يحبها 😅

رقد وهو يشوف معاها... فاق الصباح ليوم اول نهار في الخدمة لبس pull gris مفصلو بدنو و سروال نواغ 😍 و راح للكلينيك باش يبدا الصطاج تاعو (مدولو بيرو يخدم فيه وحدو) وصل للكلينيك البنات اكل يكحلو و يتغومزو عليه دخل لبيروه قابلتو طفلة زينها يهبل لابسة شورط تجينز قصير و pull فوق الصرة وظاهرة ق....

_مدتلو يدها :بونجوغ موسيو مهدي انا احلام سكريتارة تاعك

_تبسم و قالها :هاو اسمي و تعرفو دخل و خلاها واقفة... هي حستو نبزها و منتابهش لزينها و لبستها قالت في قلبها : انا بكلي متخزرش فيا تو تشوف كون متوليش تحبني 😈

دخلت عندو

_موسيو نجيبلك تشرب حاجة

_نن متعبش روحك مغسي

_تبسمت بخبث تعبك راحة

_يعيشك جيبلي قهوة برك

_راحت جابتلو قهوة و دخلت تتزعبن عندو

_بصحتك مهدوش هههه ميسالش نعيطلك مهدوش

_قلق : لا يسال خليني نخدم😏 بداو les patiants يدخلو و هو يخدم sérieux

صونا تيليفونو شاف لقاها منال كوباها و كمل مع المريض لي جاه و عاودلها

_صباخ لخير منال

_بونجوغ

_ هههه كي السبة طلبتيني احتجتي حاجة

_حبيت نقلك رايحة لدارنا نقعد شويا

_وقف: متقولييش صفية زادت هدرت معاك

_نن نن حبيت برك نروح توحشتهم و زادا محاباش نقعد مع صفية في نفس الدار

_امم اوكي اصبر عليا نصف ساعة ونجي نديك

_نن مغسي نروح وحدي عندي ma voiture

_منال قتلك درك نجي نهزك واش يقولو عليا الناس مخلي مرتو تروح وحدها

_اوكي اوكي مطولش تعيش

احلام كانت تصنت حدا الباب عرفت بلي متزوج صعابتلها اللعبة... هز مفاتحو و خرج لقاها واقفة مقابل الباب

_مهدي مروح

_وي

_اممم اوكي طريق سلامة اتهلا في روحك

مهدي قريب يوصل عيطلها تهبط... راحت عند سعاد قالتلها و خرجت تستنا برا

تسمع في واحد يعيطلها دارت لقاتو اسلام فرحت و جا سلم عليها

_منولة توحشتك تزوجتي عدتي متعرفناش _اه اسلام والله منسيتكم نتوما في القلب

_ايه واش عاملة مع راجلك صافا واش قاعدا دير هنا

_حمدلله انا نستنا فيه يديني لدارنا توحشتهم

_اه صار نتي تسكن هنا

_ايه و وراتلو الدار ونتا واش جابك

_كنت مع صاحبي عماد هاو يسكن هنا بحذاكم

_و نتا وكتاه تتزوج 😂

_انا نسنا في مهدي يطلقك و انا نديك 😂😂ناضو يضحكو و ضربتو بصاكها

_اسلام يضحك ملقيتش لي تستاهل والله

مهدي وصل لحق عليهم يضحكو تقلق و هبط

سلم عليه و حكم في يد منال

_واش خويا مليحة

_حمدلله حنا عايشين

_هيا بيان

_مالا انا نروح منوخركمش... هو راح و مهدي نحا يدو من منال و ركب في الطكسي و هي تغزلت ركبت حذاه و سطعت الباب قريب كسرتو

_بلعقل برك على الباب😑

_تتكسر نخلصهالك 🐸

_تتكسر نكسرك 😠

_تكسر ناناك 😏

_نانا صفية نكسرها تدفني 😁

_منال حكمها الضحك : اماماا قتلتينيي ههههه مقدرتش هههه اععع 😂😂

_هههه ضحكتك تع لمهابل 😂

_منال فاقت مع روحها سكتت 😅

وصلها جات هابطة قالها :عندك تخبط الباب

_ضحكت خلاتها محلولة و راحت تجري

_اععع نقتلك 😠 هبط سكرها و رجع للدار تغذا و راح يخدم

منال كانت فرحانة في دار بوها عيطت لايمان وسارة جاوها قعدو يشغلو حتى العشوا... جا رمزي من خدمتو لقا منال في الدار

_اييي شوف شكون تواضع وجا عندنا

_هههه

_توحشت حسك وتمهبيلك في الدار و sur tt الضحكة هذيك 😂 مناحاهالكش مهدي

_هههه هو يضحك على ضحكتي 😑

_ههههه وي عندو الحق

_هههه

_منال متوحشتيش صحاباتك كون جبتيهم اقعدو مع بعض شويا

_بهتت 0_o وي ام كانو هنا درك وين روحو

_اه سارة زادة كانت هنا

_وي...رمزي شميت ريحة الحب و العشق منك 😂😈 كيفاه متحكيش لاختك

_هههه كيفاه عرفتي

_هههه ياو نقراك من عينيك خويا

_ههه مالا واش تسنا دير لخوك لافار

_(منال حبت تفجعو)سارة عندها شكون و قريب يجي يخطبها

_ازحي نحب حيط يحبوه معاي شكون هذا نقتلو ونديها انا سارة 😠

_منال ميتة بالضحك : اهدا اهدا ميزو معندها حد 😂

_😤😒توقت بيا منال

_هههه بصح دبر راسك معاها انا منذخلش روحي كون مرة خلاف تبكيها متقولش منال جرت عليا

_اععع منال جامي نبكيها ياك انا خوك اهدر معاها

_ههه اوكي اوكي يا العاشق الولهان 😂

جات ام منال و بوها فرحو بيها و كي لعادة شبعت بكا

_محمد : ايه مزالت بنتي الصغرونة بكاية متقليش مزلتي لي يهدر معاك تبكي هههه

_مريم : ههه خليلي بنتي طلعت حنينة كيف امها

---------------------------

في الوقت هذا مهدي كان يخدم احلام كل ما يخرج مريض تدخل عندو تتزعبن و زعما مهتمة بيه... مهدي في لحضة ركز معاها و تمنى مرتو تهتم بيه هكا بصح مهدي حتى و لو ميحبش منال جامي يخمم يخونها هكا مبادئو تقول 😻 ... خلص خدمتو خرج من لبيرو لقاها تلم في حوايجها مروحة هي زادا جاتها فرصة

_مهدي

_وي

_ميسالش توصلني نخاف نروح وحدي يتبولدو بيا رجال نخاف و دارت روحها مسكينة

_اوكي امشي قدامي

هي فرحت هبطت تزعبل بطالون خرجو و ركبت معاه و ديمارا غفلتو و حطت ماكياج في cofre de voiture باش تشوفو مرتو 😳.. و بدات تجبد في الهدرة

_مهدي انت متزوج ؟؟

_وي

_تحبها ؟؟

_وي

_بوقوصة هي ؟؟

_وي تهبل

_شعلت فيها النار :اممم انا زادا نهبل

_تهبل راجلك 😑

نشعها...سكتت وصلها و رجع لدارهم

طلع للبيت حس حاجة ناقصتها بدل حوايجو و هبط تعشا شغل مع خوه و طلع يرقد

منال رقدت في فرشها توحشتو 😻 محلا ايام العزوبية تمنات الوقت يرجع بيها و متزوجش

❤

تعداو 4 ايام مهدي كل يوم مع الخدمة و احلام مازالت في جرتو و هو مطفيها ...

نرجعو لمنال لي جابتها كل يوم خرجات و shoping مع ايمان و سارة و مايا 😻سارة كي هدرتلها على رمزي هي زادا فرحت باسكو يعجبها بصح قالت لازم نثقل روحي شويا الوغ قالتلو نخمم و نرجعلك...

مهدي ما عيط لمنال ولا هي طلبتو بصح قرر يروح يجيبها ليوم يخدم نص نهار و يخرجها تحوس خرج راح بدل قشو لبس سروال تجينز و شوميز ا كارو و راح لدار محمد وصل نوقز الباب حلتلو فريدة

_عسلامة

_الله يسلمك انا مهدي راجل منال

_اا متشرفين وليدي منال اي راقدة بصح كاين مريم و رمزي هنا تفضل ادخل

دخل و جاتو مريم

_صباح الخير مهدي شناحوالك وليدي سعاد لاباس

_الحمد لله انا مع الخدمة و سعاد اي في الدار كيما عوايدها... ويني منال

_اي راقدة هاني درك نقيمها ...دخل رمزي بقا يشغل معاه و مريم طلعت عند منال

_مناال بونجوغ نوضي

_امم ماما علاه

_راجلك لتحت جا يديك هاو توحشك هههه

_ناضت مفجوعة :شكوون جا 😱

_هههه راجلك

_مازلت مشبعتش بيكم منروحش

_واه مالا حشمة قوم منال بركانا بلا تبهديل تو تزيد تجي

_نفخت و ناضت لبست بيجاما و هبطت دخلت عندهم

_بونجوغ

_رمزي : هههه لا لا نتي قول بونصواغ

_مريم : منال سلم على راجلك قداه ملقيتيهش واه

ناضت منال حاشمة سلمت عليه بزربة و رجعت قعدت... هو حس برعشة تفكر نهار باسها تبسم وحدو

_منال هيا البس نروحو

_سكتت و ناضت لبست غوب crevette و سيبت شعرها لحرير على جيهة و هبطت ودعت دارهم و خرجو لزوج ساكتين 😇

مهدي حب يعدي نهارو معاها

_منال قلقت من الدار واش رايك نروحو نحوسو

_منال فرحت : ههه ماذابيا

مهدي راح شرا panini w des jus و حكم طريق

_مهدي

_يا عيون مهدي 😂 واش بيك

_واين رايحين

_اسكت درك نوصلو

_😳 منصبرش اهدرلي

_منهدرش اصبر

_نفخت و سكتت

وصلو لبلاصة foret تهبل ما فيهاش بزاف الغاشي هبطو

_واو تهبل وين تعرفها

_وراتهالي صحيبتي

_😐😏

_ههه نعرفها ملي كنت صغير نجي مع بابا و كي كبرت وليت كي نتقلق نجيلها

_امم اوكي

فرشو في الحشيش و قعدو ياكلو حتى مهدي غص ولا يسعل

_منال طرطقت بالضحك و هو وجهو حمر قريب طوفا شرب الما و منال مازالت تشوف معاه و تضحك 😂

_منال نتي مالا لي يموت تضحك عليه 😑

_ههههه بالاك ههههه جامي رحت لجنازة ماما متدينيش تخاف نضحك و نبهدلها هههه

_هههه مالا مهبولة فوتو الوقت و روحو فرحانين

في الطريق منال حلت l cofre de voiture لقات ماكياج هزتو و بقات تشوف معاه مهدي شاف معاها و بهت

_منال تاعك هذا ؟؟

_منال تقلقت : نن 😒

_از.. مين جات

_سقسي روحك توصل في البانيت معاك au moin احترم بلي راك مزوج و عندك مرتك

_مهدي طول تفكر احلام هز لبواط تاع لماكياج و رماه من لكارو و سكت

_منال ماكلها لغزول : تاعمن هذاك لماكياج

_تاع سكريتار تاعي

_و واش جابها عندك

_وصلتها

_بفف لماه توصل فيها

—مهدي تبسم شنيا منال غرتي

_منال فاقت مع روحها : نن لماه نغير عليك

_ملا لماه محبيتيش كي وصلتها

_خاطر tt simplemnt كي يشوفوك يقولو راجل منال مصوحب عليها و انا منحبش لي يهدر عليا و واحد ما نحبو يخرج عليا اي حاجة 😐

_اه اه وشبيك ماكلة روحك سلاطة يا بنتي ما فيها شي قاتلي وصلني نخاف وحدي وصلتها

_و مازلتي تقول ما فيها شي مالا نقلك يا مهدي منحب حتى طفلة معاك ماش محبة فيك بصح سمعة تاعي

_لا يا لالة سمعتي انا هذي

_عيطت : نتا راجلي مهدي راجلي انا وحدي (هدرتها و فاقت مع روحها بلي تكشفت)

_مهدي فرح حسها غارت عليه : امالا من ليوم لي تجي تهدر معاي نقلها مرتي متحبش 😍 بصح نتي تاني متهدرش مع الرجال

_اصلا انا منهدرش 😑 غير مع ولاد عمي و لاد عمتي و ولاد خالي و ولاد خالتي و اسلام و ايمر و وسيم و ياسر و حمزة و عادل جارنا و و احمد برك

_برك ا منال برك ؟؟ 😯 تي صحابك كتر من صحابي 😂

وصلو للدار قابلتهم سعاد رحبت بيها

_منال بنتي خليتيلنا الدار الفارغة

_هههه تعيش طاطا توحشتك والله

_مهدي يضحك : وانا متوحشتينيش

_ههههه نن

_هههههه اما انا توحشت مرتي

في ليل تلمو على لعشا

سعاد :انا عندي عرس في ****** غدوا لعشوا نروحو انا و يوسف

_سامي : طولو ؟؟ شكون يطيبلنا ؟ 😐

_مهدي : هههه تخمم غير على كرشك

_سعاد : هههه هاو معاكم هبة و منال ماملاولكش عينك

_سامي : ههههه ماكلة محروقة

_هبة : علاااه طيح بينا شكون طيبلك لمرة لي فاتت

_سامي : هههه هبة 😑 اوملاث يهدرو عليها الناس 😂

منال ومهدي يضحكو

منال خلاتهم يتفرجو في فيلم و طلعت للبيت عيطترلسارة و ايمان في السكايب بقاو يشغلو...

_منال :سارة مزلتي مطولة على خويا مسكين 😂

_ايمان : ههههه خرجتلو قلبو

_سارة :هههه والله اتا مادابيا نقبل ليوم قبل غدوا بصح خايفة من خويا هاني كون يسمع يقتلني

_منال : اه على هذي متخافش رمزي والله sérieux في هدا الموضوع كون تقبل او يجي يخطب

_سارة : مالا قبلت 😁

_منال: ياا كون مجيناش فليل نزغرت 😂

دخل مهدي هي كانت حاطة لكيث بصح تكاكات سكتت

_ايمان : مانو وشبيك سكتي ههه

_منال : صافا ونتوما (و دورتلهم لكاميرا شافو مهدي) طرطقو بالضحك 😂

_ايمان : اوه جا غاجلها بدات تخلط في الهدرة 😂

سارة : ههههه حبيب الألب

_منال : هيا قودو درك هههه

مهدي يسمع فيها و شاف معاها

_مهدي : مع من تهدر

_منال : صحاباتي

_ايمان : هههههه متخافش ا مهدوش مع لبنات مش مع راجل

_سارة تضحك : او غار ا منال 😂😂

_منال مقدرتش تحمل طرطقت بالضحك : انا زادا رايحة نرقد باي

_ايمان : اصبر ا خراا كي جا غاجلك ليكيديتينا

_منال : بونوي ...و كوبات 😂

هذا لكل و مهدي باهت فيها 😅

راح لبس شورط و جا قعد مقابلها شافت معاه

_مهدي : وكتاه ترجع تقرا

_مزال شهر

_اه اوكي

تاني نهار مهدي راح لخدمتو ومنال بقات فالدار جات هبة

_منولتي صباح الخير

_صباح النور وين بيها

_اني رايحة shopping هيا تروحي معاي امانك

_لالا معينيش

_هيا برك اكي تبدلي جو ومنيش حابة نروح وحدي

_اوكي نلبس ونجيك

_ربي يخليك ليا يا احلى منال

منال عيطت لمهدي باش تقلو مهزش عليها قالت خلي مبعد نعاودلو.... لبست une robe rouge تهبل ولمت شعرها كودشوفال وراحت عند هبة وفطريق عاودت عيطت لمهدي ومهزش تاني

_هبة:شبيك كشما خصك؟؟

_منال:مهدي ميردش عيطتلو باش نقلو بلي خرجت

_هبة:ميسالش يكون عندو شغل ونتي معاي مكيش وحدك

_منال:ههه عمبالي بصح قلت نقلو خير

وصلو ودارو دنيا مخلاو حتىmagazin مدخلولهاش

_هبة:منال انا جعت وغلبت بزاف امشي نشوفو ريستو

_منال:فما ريستو هايل قريب هيا نروحولو

راحو لريستو وطلبو الماكلة

_هبة:منال انا لازم نمشي لتوالات urgent سمحيلي

_منال:لا ميسالش

منال عاودت عيطت لمهدي هزت عليها احلام

_الو

_الو... وينو مهدي

_ااا مهدوش عندو اجتماع كي يجي نقلو بلي مادموازال... اه سمحني نسيت مسقسيتكش

_انا مادام عبد الحق مرت موسيو مهدي عبدالحق -وكوبات-

احلام تنرفزت بينها وبين روحها :قالو مدام عبد الحق... اصبري عليا نسيه فيك علخر..

منال معجبهاش الحال وتقلقت كي هزت عليها وحدة في بورتابل مهدي و en plus مهدوش وحستها ق....

جات هبة :

_سمحلي طولت عليك

_نورمال خود راحتك

_منال يخي cv وجهك مبدل

_لا مفما شي بلاك من الجوع هيا ناكلو

كلاو وخرجو هبة تفكرت بلي نسات حوايجها عند مول الحانوت

_منال تروحي معاي ؟؟

_لا نقعد هنا عييت

_اوكي منطولش عليك

مهدي فض الاجتماع ودخل للبيرو لقا les appels تاع منال عاودلها مريبونداتش ... خرجت منال تمشي في وحد جنينة وقعدت فوق وحد الكرسي... وهي قاعدة حست يد على كتفها دورت:

_وليد شتعمل هوني😐

_ياعيون وليد تواحشتك

_بعد يدك عليا وحش ياكلك نشاالله

_منديرش على هدرتك نعرفك تتنارفا ليه ليه

منال قامت..

_مازلت تبع فيا افهمها انا مادام درك مرت راجل منهدرش مع رخاس لي كيفك

_منال انا لي نعرفك اني متأكد متحبيهش

_علاه متأكد مهدي راجلي ونموتو على بعض ونتا معندك حتى بلاصة في قلبي

_منال عيب عليك هاد الهدرة مي نرجعك ليا ونسيك في مهدي

منال راحت عجاجة ولقات هبة

_اكي هنا انا قلت هربتي

_ههه وعلاه نهرب

_هيا نروحو حنموت متعب 😩

راحو لدار بدلو و ارتاحو وقعدو في الصالة يكونيكثيو هبطت سعاد و يوسف لابسين و محملين valise

_سعاد: هانا رايحين اتهالاو في الدار بناتي

_منال : طريق سلامة طاطا تهنى

_هبة : متقلقش روحك ماما حنا هنا

سلمت عليهم و راحو...

مهدي جا من الخدمة لقاهم قاعدين قعد معاهم

_راحو للعرس

_وي راحو بكري

منال ناضت طلعت لفوق مهدي بهت

_وشبيها هذي

_معرف كانت cv قبل ما تجي نتا ههه

_ازحي طفلة هذي هبلتني ... طلع وراها لقاها قاعدة تلعب بالبرطابل

_منال لماه طلبتيني بكري خليتو في لبيرو مسمعتوش

_متخافش او كاين لي يرد في مكانك

_مفهمتش شكون رد 0_o

_منال ضحكت باستهزاء: ههه شكون رد ؟؟ ردت حبيبتك و بدات تقلد فيها وتتمعجن كيفها اه مهدوش مكاش هنا او نقلو عيطت مدموازال 😒 اععع

مهدي ضحك ضحكتو مرتو و هي غايرة عليه : ااا هديك سكريتار تاعي

_سكريتار تاعك 😑 قول ق. وسكتت

هو تغشش : اها كملها واش حبيتي تقول كمل 😡

_هي خافت سكتت و بعدت عليه هبطت لتحت لقات سامي جا و قاعد مع هبة

_اهلا منال cv

_ههه en dit cv pour eviter les pourquois

_اوه يا وخيتي هذا اكل في قلبك هبلك خويا مهدي 😂

_هههه نن قلقانة برك

هبط مهدي قالهم سامي شكون يلعب بلاي منال ناضت تقفز : انا انااا نلعب

_هههه واش تلعب

_نلعب كلش انا 😂 بصح مقادراش عليك كي نربحك تنوض تبكي

_ااو انا لي نربحك الالا

_هههه نوض نوض تو نشوفو اما لي يخسر يرمي روحو فلبيسين

_هههه اوكي وجد روحك تعوم شويا منااال

_ههههه

طلعو للبيت سامي حطو ماتش و بداو يلعبو و ربح سامي 2_1

_هيا منال لوح روحك هههه

_هههه اوكي هيا

مهدي : نن منال او تمرض حنا في الليل و برد الحال... صمطتو و خرجت برا و هبة تضحك

_جرات و قفزت فلبيسين و تضحك: ياا ماما بارد ڨلاص

_سامي : هههه نتي مهبولة والله ما حطيتك ديرها

_ههه يا خويا هدرت كلمة نديرها

_هههه اخرج اخرج او تمرض

_مهدي : مناال اخرج

خرجت تقطر و ترعش من البرد دخلت نشفت روحها و لبست بيجاما غوز و gris

وهبطت

منال : وشيا لعشا

_سامي : نورمالمو حنا لي نسقسيوك يعني ههه

_هههه درك نطيبلكم بصح جامي جربت 😕 تجي معاي هبة توريلي

_سامي : هههع و لا هذي البهلولة تعرف روحو روحو طيبو

دخلو لبنات للكوزينة يخلطو تفاهمو يديرو مقرونة...

مهدي و سامي قعدو يتفرجو في فيلم خلاص الفيلم و هوما مزالو يطيبو راح سامي عندهم ... بهت مسيكن في لحالة وجوهم فيها طماطم مقرونة سايحة في الارض و فرينة فوق الطابلة

_ياا ربك 😮 واش درتيو...امهدي اروااح اروااح خويا تشوف جا مهدي و طرطقو بالضحك و البنات مساكن تعبو 😅

_هاو خلصنا روحو درك نحطو نتعشاو...

راحو قعدو و جابو الاصحنة و جاو هز مهدي و سامي مغرف داقوها و بداو يسعلو في نفس الوقت متنداقش مقرونة مسكرة و حارة في نفس الوقت و مفيهاش ريحة الماكلة 😅

_مهدي : والله نعرف نطيب خير منكم

_هبة : منال نتي لي ملحتي 😂

_سامي :هههه سكرت مش ملحت

_منال تغشت : او قلتلكم منعرفش و نتوما تقولو طيب 😢

_مهدي : يا سعاد ارواح شوف وليدك واش ادا بنت mama w papa

_منال : اممم بنت mama et papa et fiére de l'être

خرج سامي شرالهم ماكلة و رجع تعشاو و مهدي عيطلو امين خرج معاه..

منال راحت مع هبة لبيتها حبت ترقد معاها لبست بيجامتها و قعدو يتفرجو و يضحكو حتى رقدو... دخل مهدي للدار نص ليل طلع للبيت لقاها مكانش 😐 راح لبيت هبة لقاهم ناعسين معنقين بعضاهم طفا الضو و خرج

رقد وحدو في لبيت حس بغيابها... ناض صباح راح يخدم صبحت عليه احلام

_بونجووغ مهدي

_صباح الخير و دخل لبيروه و خلاها

ناضو منال و هبة هبطو فطرو

_هبة : معرف لكان فطر مهدي و لا نن

_منال : je penSe pas لكوزينة لقيتها مغلوقة

_هبة : واا منال حتى من لبارح متعشاش هيا نروحو عندو نديولو ياكل

_منال : اه مقادراش نروح بعيدة

_هبة : ياا امشي فنيانة نروحو نحوسو قلقانة في الدار

_منال : ههه اوكي هيا

طلعو لبسو منال لبست جيب ميني نواغ و و pull blanc و طالون و دارت شوية ماكياج ... و هبة لبست غوب سامبل غوز و راحو عداو على cafétiria شراولو فطورو و راحو وصلو قابلتهم احلام

_بونجوغ مدموزال

منال تشوف معاها من فوق لتحت : بونجوغ _كيفاه نقدر نعاونكم

_نحتاجو dr mahdi abd lha9 stp

_اممم عندك موعد مدموازال

_منال تقلقت : ههه لازم موعد باش نجي عند راجلي

_راجلك ! 0_o

_وي مدموازال انا مدام عبد الحق و ضحكت ضحكة صفرة

_احلام تغزلت و غارت منها :امم استنا نهدر معاه ... و راحت

_منال تهدر مع هبة : وشبيه جدها هذي تتمعجن هكا 😒

_هبة : يا عمري علي تغار على راجلها ههه

_منال : هههه نن غزلتني برك

_هبة : هههه وي باينا

_خرجت احلام تضحك باش تقلقها

_قالك ادخل بصح مطولش

_منال دخلت و قالتلها : نطول 😑

دخلو عند مهدي سلم عليهم

_هبة : مهدي جبنالك لفطور

_مهدي : اييي خير ما درتيو ميت بالجوع جبد sachet و بدا ياكل

_منال حكمت روحها مبعد هدرت : وشبيها هذيك المزعوقة لي برا هكا تعيي يا محاينك مهدي ضحكتو 😂: اا احلام ههه طبيعتها هكاك

_منال : بففف

هوما قاعدين دخلت احلام بلا ما تدق الباب

قدمت ليه تزعبل :مهدي او جا مريض عندو موعد لازم دخلو درك

_مهدي قلقتو : خليه يسنا و نتي شكون علمك تدخلي عليا للبيرو

_احلام : واش فيها 😕

_مهدي : فيها 😒 علابالك مع مرتي و ختي و نتي داخلة

احلام تنشعت خرجت و منال ماتت بالفرحة هي خرجت و طرطقت بالضحك هي و هبة

هبة : ههه كيفاه مخدومة طفلة هدي كيفاه حاملها مهدي خويا

_هههه وي وجها صحيح بسلامتها

منال تضحك : اكدلي على النشعة برك ههههه

خرجو من عندو منال كشخت في وجه احلام و هبطو دارو shoping و شراو لغدا و راحو للدار...

وصلو au même temps مع مهدي ... هبطو من طكسي

_مهدي : متقليش من الصباح مجيتيوش للدار 😲

_هبة : ههه وي

_مهدي: واين روحتيو متشاوروش 😑

_منال : درنا shoping برك مش لازم نشاورو

_مهدي: نتي بذات اسكتي تشاور و لكان عجبك زادا

دخلو حطو لغذا و جا سامي من لخدمة تغذاو و ناضو .

دي طلع لبيتو رقد و سامي زادا

_هبة :منال اختي غدوا تجي ماما و بابا لازم نلمو الدار

_منال:وي وي اغسل لماعن و انا درك نسيق

_هبة:بزاف عليك دار كبيرة نغسل لماعن و نجي نعاونك

_منال:ههه اوكي 😝

منال طلعت بدلت قشها و هبطت... بدات تسيق و زلقت في الماء طاحت في القاعة عيطت هبة سمعتها راحت تجري لقاتها طايحة في الارض و تبكي راحت تجري لبيت مهدي تخبط في الباب

_مهدي اجري منااال

_حل الباب : وشبيها منااال ؟؟؟😨

_طاحت و هي تسيق... هو سمع كلمتها هبط يجري لقاها تتوجع و تبكي

_مناال وشبيك كيفاه صراتلك

_تبكي:زلقت في الما 😭

_مهدي خاف عليها عيط : و لماه رايحة تسيق نتي تاني بفف

_زادت في البكا : و لماه تعيط عليا اااه رجلي

هزها مهدي بين يديه و طلعها للبيت حط يدو فوق ساقها عيطت :اه توجع مهدي نحي يدك محملتش و بدات تبكي 😢

مهدي تفجع عليها : لماه تبكي اصبر درك نشوفو لكان تكسرتي و لا تلوا رجلك برك هو يهدر يشوف فيها تغلقو عينيها و فقدت الوعي ناض يعيط : هبة اجري جيب الما

راحت هبة جابت الما فطنها هي حلت عينيها تقيات

_هبة مفجوعة:مهدي وشبيها منال 😦

_مهدي:كي تقيات و داخت يعني تكسرت لازم نديوها لكلينيك هبة عيش ختي لبسلها و هيا نروحو عندي صاحبي مختص درك نعيطلو... هز التيليفون عيط

_الو حمزة خويا صافا

_صافا حمدلله

_والله يا خويا لمادام طاحت و على حساب علمي تكسرت لكان تخدم درك نجيبهالك

_وي وي جيبها انا نسنا

هبة وجدت منال جات توقف مقدرتش جا مهدي هزها و هبط بيها ركبها في الطكسي و حداها هبة....

وصلو حملها مهدي و دخل بيها للكلينيك لي يخدمو لكل يخزرو و باهتين في مهدي لي يشوفوه متكبر و ميعبرهمش كيفاش مفجوع على مرتو... بالزهر احلام شافتهم من الشرفة شعلت النار فيها و هبطت تجري

مهدي وصل ل service لي يخدم فيه صاحبو

_حمزة:اهلا بيك مهدي خويا هبة صافا

_هبة:صافا لاباس بصح تفجعنا على منال

حمزة:لا لا متقلقوش بربي نشالله مكان والو

حطها مهدي فوق السرير و هي ساكتة و عينيها بالدموع... جا حمزة يحركلها ساقها عيطت ااه

_حمزة:ههه مدام مدرنا والو اعادا

_مهدي:ههه من صباح هبلتني شابعة بكا

_حمزة:ههه درك قلي تقيتي و دختي

_منال :وي 😐

_حمزة:امم يعني تكسرتي و لازم نتأكدو براديو

دارلها راديو و ظهرتلها تكسيرة صغيرة حطلها le blatre و قالها بعد 5 ايام نحيهولك... خرجت منال حاكمة في مهدي و هبة و تمشي بلعقل

قاو احلام في وجهم

_احلام :اوه على سلامتك منولة كيفاه صراتلك

_منال تكشخ :يعيشك طحت تكسرت 😏

_احلام : ههه مهدوش مرتك fragile عينك عليها هيا باي اتهلاو فيها و نتي متدللش بزاف على مهدي 😬

منال قريب تروح ليها تجبدها من شعرها خرجو و راحو للدار وصلو للدروج منال مقدرتش تطلع في الدروج

_منال: هبة مقدرتش نطلع رجلي

_هبة : اصبر يجي مهدي يهزك

_منال : واه نن بزاف عليه كسرتلو يديه

مهدي جا سمعها ناض يضحك :هههه والله تقول هزيت آية بنت اختي بربي قلي قداه توزن هيا هيا نطلعك😂

هزها جا راسها في عنقو يحس فيها تتنفس نفس سخون محملش هذي مرتو حلالو و مقربش ليها زرب وصلها للبيت و حطها على الفرش حس بدنو برك كي بعد عليها

_مغسي مهدي تعبتك معاي

_متقوليش مغسي منال انا راجلك من واجبي نعاونك و قدم ليها يهدر بصوت خافت تحاسبك كون تحتاج حاجة و متقليش يا مناال عبد الحق ضحك و غمزها و بعد عليها ... هي كان قلبها يدق بسرعة و هو قزيب ليها حست بوجع تحت كرشها❤

مهدي هبط و منال عيطتلها ايمان

_الو منولتي

_الو

_وشبيه صوتك بب

_تكسرت ا ميمي ختك تكسرت

_اه وقتاه و كيفاه و لماه صراتلك

_بكري كنت نسيق زلقت و تكسر رجلي داني مهدي للكلينيك و دارولي blatre 5 jours

_اللطف عليك حبي نقدر نجي عندك و لا ميحبوش

_نن نن نرمال ارواح حتى انا محتاجة ليك

_اوكي اوكي نلبس و نجي

عيطتلها امها تقول حست بيها

_الو ماما توحشتك

_انا زادا حبيبتي واش حوالك كيفاش عاملة

_تكسرت من رجلي ليوم

_ووه اسمالله على بنتي واش صرالك حسيت بيك والله نهار كامل في بالي

_متقلقش ماما كنت نسيق طحت

_في ليل نجي عندك متعبش روحك عزيزتي

_اوكي ماما سلملي على papa و رمزي

كوبات و بقات تفكر في مهدي كيفاش تفجع عليها و بدات تهدر في قلبها زعما يحبني و تقلق عليا و لا ماها sure تفجع خاطر انا امانة عندو و وعد papa يعس عليا بفف يا ربي لماه نخمم فيه déja هو راجلي نورمال نخمم فيه بصح انا منحبوش لماه مقدرتش نحيه من راسي 0_o

هي هكاك تسمع في مهدب عيط

_اااااو

_اه مهدي وشبيك تعيط

_عندي 5 دقايق نهدر معاك نتي في عالم خلاف

_اه مسمعتكش 😅

_ههه بهلولة صحيبتك ايمان و لا شا اسمها جات نطل عليك نهبطك و لا نقلها تطلع

_يعني حابة نهبط بصح محاباش نتعبك بصح نقدر نهبط وحدي اه نسيت منقدرش بصح لازم نهبط خاطر ماما تجي في ليل و نهبط عندها و.... هي مزالت تخرط في الهدرة هزها جابها فوق ظهرو و يضحك

_يا محاينك شحال تهدر احكم مليح او تعو تزيد طيح يتكسر راسك

_منال تضحك : اه هههه هبطني امهبول او نطيح و تخبط في ظهرو

_اركح لا نطيشك من هنا بعد نجيبك عند صحبتك هههه

هبطو شافتهم ايمان يضحكو فرحت و تهنات على صحبتها لي كيما اختها

تلاحت على ايمان عنقتها و بقات عندها ساكتة ايمان تضحك :ايما قتلتني

بعدت عليها :هههه توحشتك

_مهدي : منال اقعد متوقفش على رجلك

_وي وي ميمي تفضل اقعد قعدو و بداو يشغلو

_حمد لله على سلامتك كون جات فيا و لا فيك

_بعيد الشر عينيا... هاه احكيلي كاش جديد _عندي خبر يفرح 😍

_هههه واش

_شهر لجاي عرسي 😇

_منال عيطت وقفزت تبوس فيها :مبروك مبروك حبيبتي فرحتلك

مهدي كان قاعد في jardin سمعها عيطت راح يجري لقاها تضحك

_منال وشبيك لماه عيطتي

_هي كي شافتو جا يجري مخلوع طرطقت بالضحك

_ايمان وشبيها هذي لمهبولة

_منال تضحك : عيطت من لفرحة برك 😂

_فرحة ؟!! 0_o

_ايمان : ههه وي عرسي شهر لجاي

_ااه اوكي والله فجعتني حطيتها طاحت ولا المهم مبروك اختي ربي يهنيك

ايمان زادت شوية و راحت... قعدت تتفرج في فيلم و سارحة معاه حتى تسمع في آية تهدر معاها :منال صافا توزعك (توجعك)رجلك😯

باستها :صافا حبيبتي تحسنت شويا

جات اسماء

_حمد لله على سلامتك عزيزتي

_الله يسلمك روحي

_كي سمعت بيك جيت نجري فجعتينا و لا ملي سمعت آية هبلتني نروحو عند منال نروحو عند منال هههه

_يعيشك اسماء ههه يا عمري لبوڨوصة تاعي تقلقت عليا 😋

راحت اسماء طيب لعشاء و آية قعدت مع هبة ومنال .. طاح ليل جاو مهدي و سامي و قعدو في صالو مع بعض 😍 دق الباب ناض مهدي يحل الباب جات مريم و محمد سلم عليهم و دخلهم...

_مريم :اسمحيلي بنتي والله حصلت في الخدمة مع les gardes صافا شويا

_منال: خير من بكري ماما

_محمد :حمدلله على سلامة كيفاه طحتي

_مهدي:كانت تسيق زلقت

_محمد:اه لازم تحل عينك بنتي اتوله

_وي papa

_حطت اسما لعشا تعشاو مع بعض

وقفو مريم و محمد مروحين

مريم :منال اتهلا في روحك حبيبتي يعني انا كي شفت لهوت مهدي بيك تهنيت والله

_مهدي :من واجبي خالتي مريم هذي مرتي نحطها فوق راسي و في عينيا

_محمد :ربي يخليك وليدي ❤... وصلهم مهدي للباب :بالسلامة باي

مريم وقفت :مهدي نعرف بنتي كي تمرض تولي حساسة عينك عليها

مهدي :اتهنا مريومة

مريم :باي 😘 روحو و مهدي رجع

مهدي :منال هيا نطلعك باش نخرج

_سامي :ها سي مهدي مرتك مكسرة ونتا خارج عيب والله

_مهدي :يا خويا مراحش نسهر عندي قضية خفيفة و نجي

_منال:مالا كي عدتي مطولش خليني نقعد معاهم

_مهدي :اوكي على راحتك

خرج مهدي و بعد نصف ساعة رجع مد لمنال sachet فيها شكلاطة و jus و شيبس و pop corn

_منال:اوه مهدي ليا هاذو مغسي مغسي بزاف 😍

_مهدي : بلا مزيا من واجبي.. و تبسم هيا نطلعو راح لحال لازم ترقد

_منال:اوكي هيا ميسالش نحكم فيك برك متهزنيش

_مهدي :اوكي راحتك

حطت يدها عليه وهو زيرها و طلعو ساكتين قعدت فوق الفرش و هو قعد حداها

_مهدي مغسي على واش درتيلي ليوم تعبتك معايا و قلقتك.. ليوم صح حسيت بلي عندي راجلي يخاف عليا و يحميني .. علابالي متحبنيش بصح اديتي واجب راجل اتجاه مرتو ربي يعيشك مهدي

مهدي يشوف معاها حط صبعو على شفتها و قالها :اششش منحبكش تزيد تعاود لهدرة هذي ومتزيدش تشكرني راك عزيزة عليا و وعدت امك و ابوك نحميك و عندي كلمتي

منال بدات تبكي مهدي تفجع

_وشبيك منال توجع رجلك و لا احتجتي حاجة ؟؟

_نن 😢

_منال تعيش قلي وشبيك بلاك نقدر نعاونك

_بدات تهدر بغصة البكا : من لي انا صغيرة نبكي كي نمرض

_لماه هكا نرمال لكل نمرضو

_لا انا نحس روحي ضعيفة و عاجزة و منقدرش نحمل

مهدي تفكر كلام امها عنقها و هي ارتاحت في حضنو : لا منال مدامني معاك لاك ضعيفة و لا عاجزة نحبك تكون دايما قوية حبيبتي

هي سمعت كلامو انقشعر بدنها و فرحت اما مهدي بهت كيفاه خرجت كلمة حبيبتي من فمو بدا يشك انو حبها ❤

بقى معنقها حتى نعست في حضنو

فطنت صباح لقات روحها معنقتو يبقات تشوف معاه و تهدر بلعقل :ياه هذا راجلي يا عمري يهبل بقلاوة معسلة اه وجهو منظم على حياتي 😝

مهدي فطن سمعها تحكي ضحك و فتح عينيه شافتو تفجعت

_مكنتش نهدر عليك 😐 انسى واش سمعتي

_محبش يحشمها :لماه واش هدرتي

_😅مهدرت والو نتمسخر معاك برك

_ههه مهبولتي صباح الخير

_ بونجوغ و تبسمت

ناضت تقعدت

_مزال 10 ايام و ترجع تقرا

_وي بصح مندخلش ملول

_وشيا 😒 تدخل ملول و تقرا من قلبك لعام هذا لخر لازم تتعب و تتخرج

_ههه بالاك

_ههه هيا تهبط

_محاباش

_لماه

_معرف ههه

_امم بش تعكسني برك يعني

_ههه بالاك تقدر تقول

هزها حطها فوق كتفو و هبط و هي تعيط

_اه مهدي هبطني مبدلتش قشي اه ههه خليني مش عفسة انا كبيرة هبطني اه

هي تهدر و هو مسامعش بيها وصل لقاهم فوق طابلة يفطرو كي شافوهم ولاو يضحكو حطها فوق الكرسي

_آية : هههه مهدي هزيتيها كيما les bébé

_سامي:هههه والله عجبني المشهد

_اسما :هههه لقطة رومنسية ياه 😍😂

_هبة :ههه كيف المسلسلات

_ياه مهدي شوف كيفاه يضحكو علينا هذا لكل نتا 😤

راح ليها عنقها و يضحك :وي مرتي bébé تاعي اتفرجو على المسلسل و ابقاو ساكتين ههه 😜

زادو شويا دق الباب راح سامي فتح الباب سعاد و يوسف وصلو

_علا سلامتكم

_الله يسلمك وليدي

دخلو سلمو عليهم سعاد شافت رجل منال تفجعت

_واه منال وشبيكوواش صرالك

_تكسرت طاطا

_حمد لله على سلامتك مهدي عس على مرتك تعيش ولدي...

عداو ليامات و خلصو 5 ايام مهدي تأكد من حبو لمنال و منال مزالت عالقة في دوامة و تحاول تفهم روحها

ناضو صباح فطرو منال فرحانة ليوم تنحي le blatre

منال : مهدي هيا عيط لصاحبك ينحيلي هاذ لبوط كرهت منو

مهدي : وي درك نعيط

راح هدر معاه و جا : منال مزال يوجعك

_نن نن والله برا نحيولي كرهت

_قالي لكان ارتاحت نحيهولها برك نتا

_فرحت : هيا نحيه درك امالا ازرب

حطها على l fauteille و هز رجلها حطها فوقو هز مقص و بدا ينحيلها فيه و يشوف مع عينيها و يقص بهدوء في لحظة سرح في عينيها لزوز ساكتين و يهدرو بعينيهم لزوز حسو بشعور مزيان ... نحاهولها و مسح على رجلها بيدو

_لحمد لله على سلامتك منال

_قالتلو : يسلمك docteur mahdi و ضحكت

😆

عدا الوقت بسرعة مهدي يخدم كل نهار و غدوة ترجع تقرا منال عيطتلها ايمان

_بونجوغ بب

_بونجوغ ميمي صافا

_صافا پا 😐

_ههه شبيه الزين

_غدوا نقراو و نتي تقلي صافا

_ههه واش ريحين نديرو

-هيا نخرجو ليوم نحوسو مع سارة و كاش ما نشريو

_ماذابيا درك نسقسي مهدي و نقلك

_هيا اوكي حبيبتي

كوبات منال و عيطت لمهدي

مندي كان في بيروه و معاه احلام عندهم خدمة صونا تيليفونو لقاها منال فرح

_الو منال

_مهدي حابة نخرج

_متخرجش وحدك

_مع صحاباتي 😐

_امم اوكي روح و مطولوش و خلي بورطابل في يدك نعيطلك و متهزش نتفاهمو

_اوكي اوكي

كوبا شافت معاه احلام بخبث و حبت تمد الراشي باه تدي الصحيح 😈

_مهدي باينة نتا تحبها و هي محاسبتكش خلاص

_شكون قالك 😕

_انا طفلة و نعرف لبنات من عينيها نفهم

_مهدي صدقها قالها يقدر يكون كلامك صحيح بصح واش ندير درك

_احلام لقات الفرصة راحت وقفت قريبة ليه و تهدر بشوية و تتنفس في وجهو : طفلة كي تعود هكا ملازمش ترخس روحك على جالها تقدر حتى تحب واح.. وسكتت

مهدي توسوس و كأي راجل قرابة احلام منو حركتلو غريزتو ضعف قدامها قرب ليها يشوف معاها في عينيها قرب فمو من فمها صونا لفيكس تاع الخدمة فاق مع روحو وبعد عليها ... احلام كانت فرحانة بقربو ليها خلاتو وخرجت ...

مهدي قعد يخمم في هدرة احلام

منال كانت خلصت shoping راحو قعدو في كافيتيار يشغلو و يضحكو حتى جا وقف عندهم وليد يشوف مع منال و منحاش عينيه منها هي تقلقت

—وليد قتلك متزيدش دور بجيهتي انا مزوجة ازحي افهم اخطيني

_مزوجة براجل خلاف بصح نتي تاعي منال منخليكش حتى ترجع ليا و نوليو كيما كنا

_انسا نرجعلك قتلك نحب راجلي و عايشة la belle vie بلا بيك

_وليد حكمها من كتافها و يخض فيها ويعيط : منخليمش منخليكش منال مرتي منخليييييكش نموت و منخليكش لواحد غيري نحبك ا طفلة ارجعلي

منال مقدرتش بدات تبكي و لي يخدمو في لكافتيار جاو خرجوه

سارة : اسكت عيش اختي

منال : علاه يديرلي هاكا علاه 😭

ايمان :هيا نروحو

حكمو طكسي و روحو لدار منال راسها مش معاها غير تخمم و شافت حالة وليد و خايفة منو لا يعملها شي قعدت في بيتها تخمم حتى جا مهدي سقسا عليها و طلع عندها لقاها غايصة

_منال وشبيك شكون قلقك

_اه والو قلقلنة برك محاباش نقرا

_امم صباح كنتي فرحانة قلقتي من الدار

_بقات ساكتة..

ني نهار صونا réveille تع منال طفاتو وكملت نعست خرج مهدي من الدوش

مهدي:منال افطن راح الحال

منال:مممم،..مهدي stp خليني نرقد

مهدي:بركاي من هاد تدلال ونوضي تقراي فضو ليفاكونس

منال:صامط.😒.من عند صباح هبطتلي المورال

ناضت تدوشت ..لمت شعرها ضفارة الا كوطي ولبست سروال بيض مع شوميز زرقا طويلة وهبطت..لقات العايلة الكل قاعدين يفطرو

سعاد:صباح الخير منال رقدتي مليح

منال:وي طاطا يعيشك😋

هبة:منال باش نروحو كيف كيف للغمة تع الجاميعة😌

سامي:واش عند بالكم العطلة دايما فضت عليكم😂

مهدي:انا خارج هيا لكان تحبو نوصلكم

منال:نو مرسي نروح بالvoiture تاعي

راحت منال وهبة للجامعة هبة راحت مع صحاباتها ومنال قعدت تسنا في ايمان وسارة ...وهي هكاك جا اسلام

اسلام: صباح الخير منال صافا...تواحشناك

منال:يتواحشك الخير حتى انا توحشتك

اسلام:مبانتليش..زيك نسيتينا كي تزوجتي

منال:نو راك فالقلب خويا

اسلام:صار هكا!!

وهوما واقفين جات ايمان وسارة

ايمان:منولتي اسلام صافا

اسلام:سوال عليك ميمي هادي غيبة هذا مزوجتيش وبعدتي

ايمان:نو نتا لي معرف وينك بانتلي راك لاحق منال

سارة:كون تبقاو هك ندخلو روطار هيا مامازالش الحال 😕

دخلو وهوما يقراو ايمان عيطت لمنال

ايمان:مانو ...تشفاي على الطيحة لي طحتيها فليسي

منال:هههه وي جامي ننساها هديك تبهديلة..ولا تشفاي على رضا لي كان يقرا معانا ...

قاطعهم البروف : ااي نتوما من نهار لول بديتيو يا تسكتو يا اخرجو عليا

شافو مع بعضاهم و خرجوا يضحكو...

منال:بنات ...متوحشتيوش الشاورما تع عمي مراد 😻

سارة:اييه يامامي شحال متشهيتها

ايمان:هيا نروحو شنستناو

راحو كلاو وروحو ...منال رجعت للدار سلمت على سعاد

سعاد:كفاه عڨبتي نهار لول

منال:نورمال كيما ساير ليام

سعاد:وهبة مشفتيهاش

منال:لا بلاك مخرجتش ولا اي مع صحاباتها

سعاد:اااه اوكي

منال:نطلع نبدل قشي ونجي نعاونك

لبست منال جبة غوز وهبطت قعدت مع سعاد تعاون فيها

جا وقت العشاء وتلموا كامل عالطابلة ويتغذاو منال كانت تاكل وفي دقيقة تفكرت وليد واللقطة لي دارها لبارح ناضت

مهدي:شبيك منال كمل اتعشا

منال نو شبعت بصحتكم

طلعت ولحقها مهدي...

مهدي:يخي صافا راني نشوف فيك هاد ليام مقلقة

منال:مكاين والو مهدي

مهدي:منال انا راجلك احكيلي

منال:اووه يخي قتلك مكان والو ملا حالة فيك😌

وغطات ورقدت وبقات تبكي ....طلع نهار منال ناضت(اول نهار ناضتك

وحدها😂)..دوشت ولبست غوب غوز فوشيا لركبة طلقت شعرها وخرجت قبلهم كامل...مهدي ناض تخلع لهط على منال ملقاهاش عيطلها لقا تليفونها فدار...منال حبست فطريق شرات jus وقاطو وركبت ...وصلت حدا الجاميعة بقات تاكل ..طبطب عليها واحد فالكارو حلتلو و....

مهدي هبط يفطر

مهدي:صباح الخير سعاد مشفتيش منال!!

سعاد:لا ولدي وينها ..

مهدي:معرف مقيتهاش وتيليفونها نساتو..درك نفطر ونديهولها

مهدي خرج وراح للجاميعة شاف la voiture تاعها ..دخل لقا سارة وايمان

ايمان:هاو مهدي..شبيها منال مجاتش!!

مهدي:لماه مهيش هنا!!😵

ايمان:لا..بلاك درك توصل

مهدي:بصح la voiture تاعها هنا!!

سارة:متقلقوش..بلاك اي هنا مع كاش واحد...نسناوها هنا...

مهدي تقلق وبدا يخاف...

ايمان:راح الحال ومنال مكاش

مهدي:ادخلو تقراو وانا درك نلهط عليها

ايمان:impossible ندخل نقرا ومنال مش معلبليش ويني قلبي مش مطمن عليها

مهدي:نتوما روحو وانا ندبر راسي ..كاش تطورات نخبركم

ايمان: اوكي متنساش

مهدي ركب و راح يلهط عليها

نرجعو درك لمنال ›› بعد ما طبطب عليها واحد فلكارو حلت لقاتو وليد خافت منو

_اه وليد صباح الخير

_صباح لخير حبي

_حبك😑

_هيا امشي قدامي قبل ما يشوفونا

_بدات تعيط منروح لحتى بلاصا خليني وليييد .. سدلها فمها بيدو ركبها في طكسي كانت تسنى فيه و مشاو في طريق تدي لجبل كي نصفو طريق نحا يدو منها بدات تبكي و تعيط

_لمااه جبتيني هنا رجعني كلب رخيس خلينيي 😭

_هيا اسكت درك اغلق فمك 😾 لعشوا نروحو voyage لايطاليا و منوليوش نتزوجو و نعيشو مع بعض

_في حلمك وليد نموت و منروحش معاك فهمتي

_هههه شكون قالك نشاور فيك

وصلو لدار في الجبل هبطها و دخلها في بيت و قفل عليها حاولت تهرب منو بصح مقدرتش 😰

في الوقت هذا مهدي لهط عليخا في كل بلاصة خبر العايلة و اتاصلو بمعارفهم

معدي كان خايف عليها وجهو صفر و روحو فاشلة خايف كان يصيرلها شي يهبل

راح لمركز الشرطة

_كاش اخبار حضارات

_رانا عاملين كل امكانيات تاعنا دوريات البحث منتشرة على كامل الولاية تقدر تروح درك و اي جديد راح نخبروكم بيه

_مهدي تقلق منتحركش من هنا قدام ما تلقاوها

معليش monsieur اهدى انشاالله نلقاوها

مهدي راح قعد حاكم راسو و يخمم

سمعهم عيطولو : من الدورية رقم 3 كاين طلاب من الجامعة قالو شافوها اخر مرة مع وليد بن عمار حددنا مكانو بالهاتف تاعو راهو في دار في ****

مهدي سمع البلاصة هبط يجري ركب voiture تاعو و راح فيتاس الشرطة تاني انطلقت وراه

مهدي اعصابو محروقة يخمم شكون هذا لي خطفلو مرتو و هي تعرفو و لا لا

وليد هز كابتو و راح لمنال حكمها بيدها و يجبد بقوتو و هي تعيط

_واين مديني خلينيي يا كلب

_فرمي فمك لا..... درك نتي زادا راح نسافرو امشي ازرب

هو جا يركبها في الطكسي وصل مهدي و شافهم هبط يجري ليها ضربو بونية جابو طايح في القاعة قعد فوقو و بدا يضرب بجهدو و يعيط

_يا ***** يا رخيس واش داك لمرتي

_منال تبكي و تعيط مهدي راح تقتلو خلاص خليه مهدي تعيش

_وليد : كانت تحبني قبلك هههه نحبها كتر منك علابالك

مهدي سمع هدرتو طاح عليه بقوتو يضرب

وصلو لابوليس فرقوهم و داو وليد بles menottes

منال كانت خايفة تبكي و ترعش راح ليها مهدي كان وجهو راح ينفجر من العصب

_مهدي : كاش ما دارلك ؟؟

_منال : نن 😥

مهدي متحملش حالها ضمها لصدرو و هي قوات فلبكا

_خلاص اشششث منال متبكيش انا معاك

_مهدي كون مجيتيش درك كان راح يديني خارج لبلاد

_مش وقت الهدرة هذي هيا درك اهدى و نروحو اكل مقلقين عليك

منال حست بالامن مع مهدي و فرحت كي شافتو خايف عليها

ركبت معاه و في الطريق عيطت طمنتهم وصلو لقاتهم اكل يستناو فيها خايفين

عنقت امها و بداو يبكيو

_خلاص ماما هاني معاكم و مبيا والو

_لحمدلله بنتي لحمدلله خفنا عليك بزاف

سعاد :اطلع ارتاح بنتي ماش ساهل لي عدا عليك مهدي اتهلا فيها عيش ولدي

طلعو للبيت قفل مهدي الباب

_شوف منال نخليك ترتاح درك بصح مبعد تحكيلي كلش من لول بلا ما تخبي حاجة

_اوكي 😶

منال كانت خايفة من ردة فعل مهدي كي يعرف بلي كان وليد حبيبها قعدت تخمم كيفاه تحكيلو حتى رقدت

طاح الليل طلعلها مهدي لعشا و قرر يهدر معاها و يحاول يفهمها خاطر تأكد بلي يحبها و محبش يعترفلها حتى يفهم واش مخبية عليه

_منال نوض تتعشا او طلعت لعشا

_اممم لماه تعبتي روحك كون هبطت برك معاهم

_نن مش مشكل اصلا حبيت نحكيو وحدنا.. شوف منال احكيلي كيفاه يعرفك هذا ل...

_تردت في لهدرة : مهدي حكاية قديمة و تافهة

_تعصب قوا في صوتو : مناال قتلك درك تحكيلي كلش فهمتيي

_بقات ساكتة تنهدت و قاتلو

كان يقرا معاي حبينا بعض بصح هو خان العشرة (بدات تبكي) ندمت على كل دقيقة من حياتي ضيعتها معاه من لتم عرفت بلي ميستاهلش و بعدت عليه 😰

_مهدي تأثر بيها : كمل و لماه حب يرجعلك

_هو منكذبش عليك حبني من قلبو بصح غلط و انا منقدرش نسمح على حاجا هكا.. حب يرجعلي قبل العرس و محبيتش 💔 كان يعيطلي يقلي بعد على راجلك و نتزرجو و نهار كنا في تونس جا و هددني 😥 و آخر مرة نهار خرجت مع صحاباتي جا و قالي بلي منخليكش تكمل معاه و غير انا لي نديك 😭 وراها شفتي كيفاه خطفني 😰 مهدي فرغتلك قلبي عندك الحق تزعف خبيت عليك بصح هذي هيا منقدرش نخبي كتر من هكا

مهدي حضنها و باسلها شعرها

_متخافش منال مدامني معاك بصح كون حكيتيلي كنت تصرفت و موصلناش لهاذي مرايحش نزعف منك هذي حكاية قديمة و كامل جربنا des relations تاع حب

_مغسي مهدي على وقفتك معاي

_منال هذي ماش مزية مني تعرف لماه

_نن لماه

_خاطر حبيتك😻 تعلقت بيك بزاف دخلتي لحياتي بلا مقدمة.. بلا ما نلاحظ والفتك و درك تأكدت بلي نحبك منال

_منال حشمت و حمارت و بقات ساكتة

_ههه محلاها مرتي كي تحشم شوف منال مقتلكش حبني بسيف كيما حبيتك بصح وقت ما تحس حاجة اتجاهي اهدرلي بلاحشمة

_في لحظة قريب قاتلو انا تاني نحبك و تراجعت حبت تتأكد اكثر بصح فرحت بيه عنقتو و هو زير عليها 😻 سناها رقدت باسها ناض بدل حوايجو و رجع رقد معاها

صباح ناض مهدي بكري راح يقيمها

_مناال نوض تقرا

_اممم مرايحاش

_وشيا هيا نوض نوصلك انا

_تقعدت :صباح لخير

_صباح لخير يا احلى طفلة في الدنيا ليوم اول مرة نوض فرحان هههه

_حبت تتمسخر بيه : و نتا واين تعرف لبنات تاع الدنيا كامل 😂😂

_هههه هيا نوض بركا تمهبيل تاعك

_ناضت لبست chemisier bleu ciel و دخلتها في سروال تجينز لبست صاكا ا دو و هبطو فطرو و خرجو ركبت حذاه في الطكسي وصلها جات هابطة

_باي مغسي مهدي

_اصبر واين رايحة مزلت مديتهاش

_اه واش تدي 😶

قدم ليها باسها من خذها و هي حشمت

_خلاص تقدر تروح درك

_اه مهدي و كون شافونا حنا فلافاك

_يشوفونا نوض نعيط هذي مرتي تسالوني هههه هيا اتهلا في روحك

_ههه باي

هبطت لقات صحاباتها مع بعض

_ايمان : علا سلامتك حنونة ههه

_منال : الله يسلمك حبيبتي

_اسلام : شفتي هذاك الكلب تاع وليد

_سارة : واش بديرولو درك

_اسلام : اا sûre يدخلوه للحبس محاولة خطف مع سبق الاصرار رو الترصد هههه

_ايمان : يستاهل الرخيس

_منال : هيا ندخلو اي بدات la séance

دخلو قعدت منال حذا سارة بداو يحكيو

_سارة عدتي متحكيليش على خويا واش حوالكم

_والله cv قالي نجي نهدر مع باباك باش نجيب فاميلتي و نجيو نخطبو

_يااي فور ا هجالة 😂 خلي نتهناو منك ورا ايمان بعد

_اا فكرتيني عرس ايمان مزالو شهر

_هههه وي

هوما يحكيو و جات ليهم lprof

_سارة كنتي تسمع فيا واش نشرح

_اه prd madam

_و نتي منال واش كنا نحكيو علابالك

_uii bien sure Madame

—alors quoi

_قلنا عرس ايمان مزالو شهر هههه 😇

لونفي كامل بداو يضحكو 😂

كملو قراو و خرجو

_ايمان : علابالك قتلتيني بالضحك بكري

_امين : هههه مهبولة صح نتي

_اسلام : ههه يا جدك lprof و ضحكتيها كون اي خرجتك

و بداو يضحكو و منال ضحكة تاعها تاع لمهابل 😂

_سارة : واا منال فضحتينا اسكت هههه

_منال :.هههه مقدرتش نسكت تفكرت نهار طاحت ايمان في الدروج 😂

_اسلام : هههه خلات درك ما تسكتش طفلة هذي 😜

هي تضحك و جا حكمها طفل من يدها

_واش لمزيانة ضحكني معاك

_نحي يدك وجهك صحيح بسلامتك

_ايي ضهرتي واعرة بصح تهبل علابالك

_اسلام : اي اسمع حبيبنا هبط يدك من الطفلة

_هههه واس دخلك نتا خوها و لا راجلها

_منال : وي خويا و كان عجبك نزيدلك حاجا je suis marié 😇

_ههه خير من راجلك انا خليه و ارواح عندي

هو هكاك و يسمع واحد وراه حكمو من l pull و زيرو بقوة

خير من شكون خويا لكان حاب تفهم معاك راجلها نوريلك تحط يدك على مرتي

_خاف منو : اه اسمحلي خويا ... و راح

_منال : اه مهدي مقلتيليش جاي

_حط يدو على كتفها توحشت مرتي قلت نجي نشوفها

_منال حشمت وضحكت 😅

مهدي : واش احوالكم l'équipe

_ايمان : حنا cv و نتا مهدي

_مهدي : كي يخطيونا لعيباد لحمد لله

_اسلام : ا وي خويا حبيت نقلك منال عوض ختي صغيرة متخافش عليها

_مهدي : مرسي صحيتي خويا 😃 هيا منال نروحو

مشاو...

_منال : وين مديني 😅

_مهدي : وقت غذا مجعتيش

_منال : هههه طليتي على قلبي ميتة بالجوع

_مهدي : ههه او تعود تاكلني مالا

_منال :هههه تزيد شوية عس على راسك نقدر نبدا بيه 😂

_مهدي : ههههه مهبولة امشي

راحو تغذاو

_هيا مهدي راح الحال نقرا درك

_اوكي هيا انا تاني نخدم درك

_على قداه تخرج

_3 ونتا

_اوكي مالا نجي نسناك و نروحو مع بعض

_اوكي

وصلها دخلت تقرا و هو راح يخدم

حتى وصل الوقت هز مفتاح و خرج حكمتو احلام

_مهدي نحكيو درك

_نن منقدرش راح الحال باي

_اممم اوكي باي

راح عند منال جات عندو تضحك

_ههه وشبيه زين يضحك

_ههه فرحت كي خرجت من القراية مفهمتش والو من لكور ليوم

_ههه اسمع نحبك تقرا مليح

_ههه او نوالف

_هيا درك نديك لدار وجد روحك و نخرجو عندي ليك surprise

_يااا صح 😻 هيا هههه

وصلو للدار حلتلهم سعاد الباب سلمت عليهم

_طاطا معليكش

_نحمدو ربي منال و نتي لاباس

_صافا طاطا

_مهدي : شوف سوسو مدامها معاي اكيد تكون صافا هههه

_سعاد : ههه محلاكم ولادي ربي يدومها

_منال : ههه ان شاء الله طاطا انا نطلع للبيت نخليكم

مهدي خرج و منال طلعت فرحانة لبيتها لقات هبة في الطريق

_واش منال عينيك فرحانين واش كاين احكي احكي ههههه

_هههه كيفاه فقتي

_هههه يا بنتي شفتك تضحك وحدك

_ههه ملخر هبة اختك ظاهرلي طايحة على راسها

_يااا بلحق 😍

_هههه نهار نتأكد نقلك بصح خوك اعترف و خارجين مبعد 😻

_يا عمري فرحتلك ارواح نعنقك ربي بكملكم حبيبتي

_ههه ان شاء الله هيا مبعد بب

طلعت منال لبست غوب نواغ 😍 و بوكلات شعرها و حطت ماكياج جات تهبل

زاد شوية طلع مهدي

_مناال واش هذا الزين قتلتيني

_هههه مغسي

_اه انا نروح نلبس و نتي اهبط اسناني لتحت كون تقعد هنا ناكلك sure 😂

مهدي لبس costume noir مشط شعرو حط البارفان و هبط عندها

_هيا منال نروحو

_اوكي هيا 😚

ركبو في الطكسي حطلها غناية تاع و بدا يغني معاها و هي تضحك وصلو لوحد ريسطوغون كبير دخلو لقاوه فارغ و فيه طابلة في النص معبية بالماكلة و الشموه و الورد 😍

_ياا مهدي لماه تعبتي روحك و حكمتي الريسطو كامل

_ههه نحب نكون انا و مرتي وحدنا برك

تعشاو في جو رومنسي وتبادلو نظرات الحب هوما ساكتين و عينيهم يهدرو وحدهم 😽

_منال نحبك 😻

_حشمت بقات ساكتة..

_علبالي فاجأتك و مطلبتش رد ليك تقدر تقول ضعفت و مقدرتش نزيد نخبي حبك كتر 😅

_اا مه..دي اان..ا..

_هههه ماش للزم تهدر درك كي تفهم روحك فهمني

_انا تاني نحبك مهد..دي

_اه منال عاود واش قلتيلي 😍

_ضحكت قتلك نحبك 😅😍 _حشمت بقات ساكتة..

_علبالي فاجأتك و مطلبتش رد ليك تقدر تقول ضعفت و مقدرتش نزيد نخبي حبك كتر 😅

_اا مه..دي اان..ا..

_هههه ماش للزم تهدر درك كي تفهم روحك فهمني

_انا تاني نحبك مهد..دي

_اه منال عاود واش قلتيلي 😍

_ضحكت قتلك نحبك 😅😍

ناض مهدي وراح عندها و حضنها و باسها 💏

_نموت عليك يا منولتي ليوم انا ولدت من جديد 😍نحبك عمري نحبك بزاف و باسها على خذها 😘

_منال: صايي مهدي حشمتني ههه

_مهدي :ياعمري على حبيبتي ليتحشم مني 😋

_منال:مهدي هايا نروحو راح لحال وانا غدوة نقرا

مهدي:oki هيا حبي

_شوف منال نتي من الفراش ما تتحركش فهمتي

_وهو مهدي وشبيك نوض ولم الدار لعشوا يجيو الضياف

_انا ندبر راسي قلنا

_ههه اوكي اوكي

مهدي هبط عيط لهيبة قالها ارواح تعاوني بصح مقالهاش لماه 😂

هو ل تحت و يسمع في منال تعيط

_مهدييي اجريي مهديييي

_تخلع طلع يجري رجليه ا على من راسو

_وشبيك منال 😲😨

_جيبلي مندرين 😋

_اااه 🙁 مندرين في الصيف تتمسخر

_دبر راسك جيبها 😏

_ازح واين نلقاهالك انا

_بفف اوكي اوكي متجيبش بصح كي يجي ولدك راسو كيما المندرينة متلومنيش لوم روحك

_اه يا منال اه منك 😌.. مهدي خرج شويا دق الباب ناضت منال حلت لقاتها هيبة

_منال CV

_ CV و انتي

_حمد لله عيطلي مهدي قالي ارواح اجري عييت فيه محبش يهدر لماه و مفهمتش واش حكاية العرضة تاع ليوم 🙄

_هههه

_اهدر منال متهبلنيش

_enceinte

_شكون 😒 اهدرر

_هههه انا رايحة نولي ام 😍

_ياااا 😍 حضنتها تضحك مبروك مبرروك فرحتيني احكيلي كيفاه عرفتيو .. وينو مهدي

_تواحمت على المندرين راح يشريلي

_ووه واين يلقاه 😂😂

بعد ساعة جا مهدي جابلها المندرين بسيف لقاه عند واحد يبيع tous les saison

فليل تلمت العايلة و خبروهم فرحو بزاف 😻

عداو 9 اشهر غير دلال و حب و راحة لمنال 💟 مهدي تعذب مع وحمها و دلالها 😌

مشافوش sex لبيبي حبو يتفاجأو نهار يولد 😅

ليلة و هوما راقدين منال فطنت بالوجاع يقطع ناضت تعيط

_مهدي 😰 رايحة نولد ا ماما كرشي 😭 ولات تبكي

_مهدي ناض مفجوع كي شاف حالتها دخل بعضو :اه رايحة تولد ؟؟ واش ندير انا !! 🐠

_ااا مهدي متهبلنيش تسقسي فيا نوض اديني لسبيطار 😪😭

هزها و راح يزرب ركبو في الطكسي ..

في الطريق...

_اتنفس مليح منال و متخافش انا معاك 😥

_تبكي : مهدي يووجع مقدرتش 😭

_خلاص خلاص حبيبتي هاو وصلنا متبكيش

وصلو حطوها فوق السرير و يحركو فيها ولا ت تعيط

_اه مقدرتش 😩 ا مهدي وجه الشر هذا لكل نتا لي حملتيني 😠

الفرمليا يضحكو عليها 😅 :اصبر برك مدام لوجاع مزال يزيد

_اه وشيا مالا منولدش خليه في كرشي منوولدش 😭

محبتش تدخللهم للبلوك حتى جا معاها مهدي حاكملها يدها و كل ما تتوجع تتكا عليه مسكين قتلتو 😂

ولدت منال و جابت احلى بنوتة جابوهالها فوقها باستها و نسات الوجع لي فيها 😍 مهدي باس مرتو و هز بنتو في يدو و خرج بيها و دموع يسيلو 😍 دموع اب فرحان بينها و فخور بمرتو حبيبتو لي هدف تل و قطعة منو ..😍 لقا امها و بوها و امو و العايلة لكل تسنا فيهم سماوها ايلين و عاشو احلى عيشة مع بعض

النهايه
على الرغم من كل مجهوداتنا باش نقدمولكم لكرونيك الا ان موقعنا مهدد بالاغلاق على خاطر مكانش لي راه يكليكي على الاعلانات لذلك بليز عاونونا و اطالعو عليها مثلا هدا

الجزء السابق (الثاني)

  رابط تحميل الكرونيك pdf