ابناء عمي

هاجر_وإسحاق بعنوان

ابناء عمي

حب 😍 كره 😢 اغتصاب 😖 تضحية
تحكي عن فتاة كانت تعيش مع عمها و اولاده في صغرها قام اكبر ابناء عمها بغتصابها و بعدها غادت تلك المدينه مع اهلاها لمدينة جديده تمر السنوات و تكبر الفتاة فيتقدم لخطبتها ابن عمها الاصغر (اخ مغتصبها) فكيف ستسير الامور بينهما وهل ستخبره بفعلة اخوه التي اخفتها لسنوات تابعو

سلام الزينات الرزينات...الحكايةبداااااات. انا اسمي هاجر عمري 20 سنة ربي كارمني بالزين و هذا بشهادة لي يعرفوني ملامحي طفولية ...متحجبة و الحمد الله حياتي رسمتها و تحكمت فيها العادات و التقاليد...

انا من عايلة ميسورة الحال وحيدة بابا و يما ..كي نقوللكم وحيدة والديا تتخايلوني مفشة بصح انا العكس كان بابا صعيب و واعر بزاف و يما من النوع لي ما يفتحش العين ...

عشت 8 سنين الأولى من حياتي في الريف كيما نقولو في البلاد... كنا نسكنو مع دار عمي .... عمي عندو 2و لاد و طفلة ...وليدو الكبير اسحاق أكبر مني ب 10 سنين و خالد أكبر مني ب 8 سنين و بنتو أسماء أكبر مني ب 5 سنين..... عشت مع ولاد عمي كي الخاوة يحبوني بالأخص اسحاق الكبير كان مفششني..و اسماء كانت كيما اختي....دايما مع بعض من الصباح لليل وحد النهار زمان الصيف ...السخانة طيح بغل و ترعف جمل ههه و انا جاني سيدي نخرج نلعب برا زارطيت للماما وخرجت وحدي على خاطر

اسماء كانت في دار جدها انا قاعدة نلعب و هو جا ليا خالد (هذاك الوقت انا كان عندي 8 سنين و هو 15 سنة) قالي ارواحي معايا نشروا بعثتني يماك نشريلها..و انا راني مشغول ارواحي معايا انا نشريلك و انت اديلها القضيان..رحت معاه مشينا في طريق خلاف لي نعرفوا قتلو خالد وين رايحين هذي ماشي طريق الحانوت قالي نفوت نجوز على صاحبي نستحقو من بعد نروحوا نشروا...و انا بسذاجتي و برائتي امنتو....و يا ريت مارحتش معاه....كي و صلنا لوحد البلاصة خاليا مخلية دار ليا خالد و طبعني في الأرض و حاول يتعدا عليا انا بديت نعيط ماكنتش نعرف واش كان راح يدير بصح من وجهو عرفت بلي رآه ناويلي على حاجة ماشي مليحة انا بقيت غير نتخبط و نطبع فيه و هو ضربني ضربة دوخني تغاشيت ماحسيت بوالو حتى فطنت لقيت روحي مكسلة وخالد قدامي شفتو بديت نعيط ونبكي نقولو تعيش خليني نروح لدارنا.. شدلي فمي و قالي شوفي لكان تحكي لكاش واحد بلي جيتي معايا اليوم نقتلك و نشرب دمك و ندير فيك كثر من هكذا .... هززت راسي نتاع اطلقني برك...وليت لدارنا و انا ما فاهمة والو؟؟؟؟؟؟ و دفنت واش صرا معايا ما حكيت لحتى واحد ..بصح واش صرالي بدلني و أثر فيا بالطول و العرض وليت مانخرجش لبرا نلعب ...ما نخالطش ديما ساكتة و قاعدة وحدي.....موليتش نروح لدار عمي حتى أسماء و تبدلت عليها.... كامل حسو بيا بلي تبدلت بصح ولا واحد عرف السبة..قبل ما يخلاص الصيف و نرجع للقرايا بابا جاتو خدمة في العاصمة و لازم نرحلو انا جاتني على قلبي حبيت نخرج من تم و ننسى... و هكذاك كان الحال رحنا للعاصمة و ستقرينا فيها.

جازو عوام على واش صرالي باش نقوللكم انسيت نكذب ...بالأخص كي كبرت وفهمت... و لي قاتلني ماعلاباليش واش صرا معايا بالضبط...

الماضي نتاعي اثر على حياتي بالطول و العرض ...وليت نكره حاجة اسمها راجل و حتى البنات جبدت روحي منهم معندي حتى وحدة مصاحبتها و مقربة ليا...ودار عمي من قصة قصة ما زدتش رحت لعندهم .. كان كل ما يروحوا دارنا للبلاد ندير الف سبة و حجة و نقعد عند خالتي تسكن في العاصمة...

وحد النهار حنا نتعشاو و بابا قال ليما السمانة الجاية نروحو للبلاد عرس أسماء مزال عليه شهر انا كنت نأكل اللقمة حصلتلي خزر فيا بابا قالي انت تان تروحي هذي المرة لا خالتك لا قدور..

قتلو بصح مزال على العطلة نتاع الربيع سمانة قالي ياك جوزتي الاختبارات ..انا نهدر مع المدير .

يا ربي شهر؟؟؟؟واش يكملو....

انا من الخلعة طريق فمي تلفتلي حبست الماكلة...بابا خرج و انا قفزت ليما قتلها يما العرس مزالو شهر واش دانا ضرك ...قاتلي ماما تعرفي مراة عمك وحدها لازم نعاونوها...قتلها انتم روحو و انا كي يبقى يامات للعرس نقول لخالتي تجيبني قاتلي ماما سمعتي باباك واش قال ر ماشي كل مرة ماتروحيش...كل مرة ديريلينا سبة نموت و نعرف واش دار ولك على دار عمك.....اااااااه يا يما لكان تعرفي!!!!

المهم تغلقت في وجهي من كل جيه تحتمت عليانروح ....غدوة من ذاك رحت انا و ماما شرينا حوايج باش نحضروا للعرس وجدنا روحنا...وهبطنا للبلاد..طريق كاملة و انا نخمم كيفاش راح نقابل هذاك الكلب نتاع خالد زعما مزال متفكر؟؟؟؟ رآه جاز على هذيك الضربة 9 سنين ..

وصلنا لدار عمي قلبي قريب خرج من صدري.. ماما و بابا هبطو صوناو في الباب و انا بقيت في الطموبيل باش نفتح الباب و نهبط ما قدرتش يدي فاشلة....ماما رجعت ليا قاتلي واش هاجر نجي نرفدك..و لا نجيب الزرنة..خفي روحك...رفدت لافاليز هبطت و وقفت بقيت نشوف في دار عمي فيلا كبيرة الله يبارك تبدلت الحالة و حتى الحومة تبدلت بزاف ...انا قاعدة نشوف هو فتح وحد jeun خمري عينيه معسلين و كبار و شفارتيه مقلوبين شعرو كحل عندو كور الله يبارك... قالو بابا واش راك إسحاق وليدي..ياااه إسحاق كبر و تبدل عندي مدة ماشفتوش...

 

عنق اسحاق بابا و قالو جوز عمي من الصباح و حنا نستناو فيكم سلم على ماما من بعد خزر فيا انا هبطت راسي قالو بابا عرفت هذي شكون قالو و كيفاش مانعرفهاش هذي الهرابة...واش رضيتي علينا و جيتي تبسمت تبسيمة صفرة قالي الله يبارك كبرتي..وشد عليا لافاليز...حنا هكذاك و هي جات مراة عمي طاطا حسيبة (مراة عمي من لي نشفالها قبيحة

و تغير من ماما لكان مالقاتش عمي واعر و مزير دير فيه العجب ) قاتلو شكوووووون اسحااق قاللها جاو دار قالتنا جوزو أي مرحبا مرحبا الدار نورت ...الحق فرحت بينا ... من بعد اسماء جات تجري ليا عنقتني و لا ت تضحك و تبكي من الفرحة نسات ما سلمتش على بابا و ماما ....و عمي بقى ساعة و هو معنقني.... الحاصول فرحو بينا و بالأخص انا...

دخلت و بقيت نحوس بعينيا على لي مايتسماش بصح حسو ماكانش

هذيك الليلة أسماء هبلتني بت نشوف في التروسو نتاعها و حكاتلي على العوام لي جازو كيفاش جوزتهم و على وليد خالتها كيفاش خطبها ( حنا في البلاد الزواج الشايع زواج الأقارب..لي ليك هو أولى بيك و الا فات هدر عليك وليد عمك و خالك و لا...تقبلي بيه سيف عليك....) حنا نقصرو قلت في قلبي نرمي لأسماء الراشي و نجيب الصحيح منها...قتلها تعرفي اسحاق كي فتحلنا و الله ماعرفتو تبدل قالي بابا راه استاذ نتاع رياضيات الله يبارك عليه.. و خوك ااااااا (ما قدرتش نقول اسمو) قاتلي خالد اسكتي ما تفكرينيش فيه راني زعفانة منو قتلها علاش قاتلي ياك راح لفرنسا يكمل قرايتو و ما قدرش يهبط لعرس عندو مشكل في لي بابي...انا سمعت واش قالت و انا

استرحت مزية مراحش نشوف خليقتو

جازو يامات شابين كنت نخرج مع أسماء نقضي و نوجدو للعرس و كي نقعد في الدار نحب نروح نشوف لعواد نتاع عمي (على خاطر عمي عندو firma) و اسحاق نجنبو قد لي نقدر و كي يهدر معايا نجاوبو قيس السؤال و نهرب .

وحد المرة انا مع العواد واقفة نوكل فيهم و انا شفت إسحاق جاي لعندي تلفتلي قالي تحبي العواد كيما انا ...دخلت في بعضايا. هززت راسي برك..قالي تحبي نعلمك تركبي عليه

انا تلفتلي بقيت ساكتة...قالي اسحاق حبيبت نسقسيك هاجر مراكيش مرتاحة عندنا..قتلو لالا رآه عاجبني الحال قالي بصح انا حسيتك راكي مقلقة و بالأخص مني و تجنبيني و تتهرب مني تقولي كلمة و تقصي الحديث...قتلو لالا و الله والو ااااااسامحني أسماء رآه تستنى فيا قالي ها شفتي راكي تتهربي.حبطت راسي و سكت مالقيت واش نقول و صح عندو الحق .. قالي ماعليش خوذي راحتك بقينا ساكتين في زوج .. من بعد قالي واش راكي تقراي راكي مسلكة راسك و لا والو...قتلو الحمد الله العام الجاي bac قالي اااااا ي الله يبارك كبرتي سبحان الله البارح برك كنت نرفدك و اليوم وليتي مراة و نص.. يااااع وليت مراة و نص و انا لا خبر قتلو الله يسلمك سامحني انا نخليك...

اسحاق عندو الحق صح شفت غير الخير منهم بصح تقلقت و حبيت نولي لدارنا ليوم قبل غدوة على خاطر كل شبر في البلاد يفكرني في الجرح نتاعي.

و بيناتنا اسحاق ماشاء الله عليه مثقف مربي و الشكل حدث و لا حرج زينوووووووون....

المهم دارت أسماء الحنة و جا نهار العرس...ماما قاتلي روحي مع بنت عمك للحفافة انا ما حبيتش قاتلي ماما تقول عليك مولات 100 سنة و ظافرة الشيب روحي اتحفي روحك كيما لبنات لي في عمرك....المهم ماما كلاتلي بصلة راسي حتى رحت مع اسماء دانا عمي و قالنا كي تكملو عيطولي .#ام #اويس رحنا للحفافة انا ماكييت و سقمت الخيمار ستيل خليجي سواري على خاطر أسماء راح دير عرس واحد مع ناس دارها و هوما يتخلطو شوية ماعندهم حاجة ... و انا كيما قتلكم بابا مزير ...الحاصول كي كملتلي الحفافة انا و نخلعت في روحي يا جدكم تبدلت مع لي زدت لقطت وجهي زاد بان.... كي كملت قلت لأسماء وين صاكك باش نخلصوا الحفافة ضربنا على الصاك اولااااااش نسيناه في الدار عيطنا لعمي باش نقولولو يجيبو ماحكمناهش مغلوق و اسحاق يصوني و مايجاوبش. . قلت لاسماء ماتقلقيش روحك ضرك انا نروح للدار جرية و نرجع...غطيت على وجهي و رحت للدار (الحفافة ماشي بعيدة بزاف ) وصلت لدار عمي صونيت فتحلي اسحاق قالي هاجر واش جابك؟؟؟؟ياك قتلكم انا نجيبكم. .واش قلقك... انا رفدت الخيمار على وجهي وهو شافني سكت الهدرة تلفتلو و بقى مبوه فيا...احم احم هذا كامل انا ...

انا حشمت قتلو عيطنالك وما جاوبتش أسماء نسات الدراهم. ... جبد التليفون قالي ااااااا صح رآه silencieux. ...

دخلت جبت الصاك و جيت خارجة لقيتو برا واقف عند طموبيل نتاعو قالي وين؟؟؟؟قتلو رايحة للحفافة قالي اطلعي قتلو أسماء مزال ماكملتش قالي و انا ماسقسيتكش على أسماء راني عليك نوصلك قتلو لالا صح ماتشقيش روحك راهي قريبة مشية رجل...#ام #اويس قالي و انا طحان نخلي بنت عمي تمشي في الزنقة و طموبيلتي كاينة...قتلك اطلعي و بلا نقاش....فتح الباب و بقى يخزر فيا و انا ترددت من بعد طلعت قلت 5د و يجوزو....يسوق و مرة على مرة يرمي عينو انا حسيت الطريق طوالت ذبت في حوايجي من الحشمة لصقت في الباب قريب ما خرجت حسيت 5 دقايق جازو 5 سوايع ...كي وصلنا قالي راني هنا نستنا انا جيت راح نهبط و la senteur ماحبتش تنفتح يا خرابي..هذا لي خص . بقيت نجرب نفتحها بالقوة ادنا ليا حتى حسيت بالنفس نتاعو... و حط يدو على يدي ....نحالي يدي يا لهوووووووي و قالي ماشي كل حاجة تجي بالقوة كاين حاجات صعاب و يجو بالسياسة حسيت كاين

معنى في كلامو...

انا لسقت في الكرسي من الحشمة و هو صح سايسها و فتحها ... غير فتحها فتحت الباب و هبطت نجري وجهي حمر طمطومة... دخلت لأسماء لقيتها كملت ولات تهبل.... خلصنا الحفافة و خرجنا ..المهم دانا للدار لبسنا و جاو داو أسماء للصالة

النسا في العرس كلاو ماما عليا وحدة رايحة و وحدة جاية و ماما فرحانة.... تقول بنتي كبرت و كثرو الخطابة عليها.......و انا ربي عالم بحالي انا نشوف مراة جات لماما تسقسي عليا و انا قلبي يتزير نتفكر مواجيعي..اييييه يا ماما لكان تعرفي واش بيها بنتك قلبها رآه يتقطع... و ينقسم

جاز العرس في الخير أسماء رحت لدارها...ناس دارها يسكنو مقابلين دار عمي...كيما يقولو راحت من الزريبة للدريبة.

عيييت من العرس رقدت كي الخشبة و الصباح بكري نضت على صوت الزغاريت حامي الدنيا خرجت لبرا و هنا كانت الصدمة و الصاعقة لقيتهم كامل برا عمي و مرتو و اسحاق و ماما و ناس دار أسماء و شادين ايزار وفيه بقعة دم و يشطحو و يزغرتو. ... يا خلاياااا واش هذا مزال الجهل و الجهال كاين في هذا الوقت؟؟؟؟؟؟؟ مزال كاين هذي العادة ؟؟؟؟ خزرت في ماما و قتلها واش هذا؟؟؟ انا قصدت واش هذا التمسخير. ..و ماما فهمت بلي ما فهمتش واش رآه صاري..قاتلي اسماءتهنات ورفعت رأس والديها لعقوبة ليك انشاء الله كي اليوم نفرحو بيك .... اتخايلو حالتي في هذيك اللحظة..و الله يا لبنات غير الدنيا ظلامت بين عينيا.... صدري ضياق حسيت النفس راح ينقطع و عينيا تعمروا بالدموع.....رفدت راسي لقيت اسحاق يخزر فيا و يتبسم ...هبطت راسي و دخلت للدار..رحت لبيت أسماء غلقت الباب و ترميت على الفراش نبكي .... باش نخمم في الجاي نخاف ...

.زدنا يومين و رجعنا لدارنا و رجعت لقرايتي و حياتي العادية

وحد النهار كنت مع لخر نتاع العام نوجد لاختبارات نهاية السنة...راني شافية هذاك النهار يما راحت ضيفة لعند خالتي و انا قعدت نحفظ ..سمعت التليفون نتاع بابا يصوني ...طول وهو يصوني رحت نشوف لقيت بابا يصلي رفدتو لقيت عمي يعيط انا شفت اسمو و انا لوني نخطف ماشي موالف يعيط لبابا غير للضرورة

رفدت التليفون و جاوبت..قلت لعمي بلي بابا رآه يصلي كي يكمل يعاودلك. .. كوبيت و بقيت نخمم غير الخير هذا واش يحوس... بابا كمل الصلاة و عاود العمي و انا رحت لبيتي و خليت وذني حاشاك عند بابا نسمع فيه غير يقول مرحبا بيكم في كل وقت الدار داركم....

يا خاه ماتقولوليش رآهم جايين....انا نخمم و بابا جا لعندي قالي رآني رايح نجيب يماك عمك و مرتو راهم

جايين غدوة انشاء الله ...يا ربي و الله لي فكرت فيه صار هذا علاش راهم جايين ماشي موالفين يزورونا و زيد ياك غير ما كنا عندهم ....انا وجهي تخطف علبالي هذا المجي موراه حاجة ..واش هي ربي عالم.

ليلتها بت نايضة النوم ما جانيش مع الفجر غفيت شوية نضت الصباح على حس ماما و مراة عمي يقصرو.. خرجت من بيتي لقيتهم قاعدين في الصالون سلمت عليهم و مراة عمي غير شافتني قاتلي هذا وين نضتي يا لالة و حنا معولين نزوجوك.... (مراة عمي شرة كبيرة من بعد نحكيلكم عليها) تبسمتلها تبسيمة صفرة كيما وجهها قاتلها ماما سهرت البارح مع القراية و زيد بزيادة مزال الحال راهي 9 نطقت مرة عمي قاتلها شحال تعيا و تقرأ و اخرتها دار راجلها .. اووووووووف يا لطيف على صباح ربي... تسرسبت للكوزينة انا دخلت و انا لقيت اسحاق قاعد شفتو فشلت تقول طل في جن...لساني بلعتو

تفكرت شعري المطلوق لي بلا خيمار و البيجاما المزيرة لي كنت لابستها...على خاطر انا موالفة نتحجب منو...هو شافني و هو بقى يخزر فيا من بعد حط راسو و قالي صباح الخير و ناض و خرج يجري...انا بقيت مسمرة في بلاصتي...و هي جات ماما تجري قاتلي هاجر نسيت باش نقولك اسحاق رآه هنا ...درت ليها قتلها خلاص شافني و تبخصت...قتلها خير ما جابهم قاتلي ما نعرف مزال باباك ما قاليش خرج هو و عمك راحو للقهوة يقصرو..كي نعرف نقولك

انا بقيت نستنا في عمي و بابا على أحر من الجمر هذا المجي نتاعهم دارلي حجرة في الصباط.

بقيت في بيتي نحفظ كي وصل قريب الفطور دخلت ماما لعندي الفرحة خارجة من عينيها...قاتلي هاجر جبتلك خبر يفرح قتلها خير قاتلي عمك جا باش يخطبك انا سمعت كلمة الخطبة و انا دموعي هبطو و فمي تشل ما قدرتش نهدر...قاتلي يما شكون كان يقول اسحاق يخطبك من لي كان صغير و انا نقول يا سعدو لي يناسبو و يدي بنتو... هي تهدر و انا حسيت راني نوم... قتلها و بابا ...و بابا واش قال؟؟؟قاتلي..و هذا سؤال نتاع صح قبل باسحاق وين تلقاي كيفو..انا سمعت ماما و انا طرطقت بالبكى...قتلها علااااش ترمو فيا ياك مزالني نقرأ و زيد مزالني صغيرة...قاتلي كيما قالت مراة عمك كي تقراي 100 عام اخرتها لدارك

قتلها بصح عندي 18 راني صغيرة نتاجي مزالهم يلعبو ...قاتلي ماما و ما شفتيش نتاجاتك لي في البلاد راهم بولادهم. .. قفزت قفزة جيت عند رجليها قتلها يا ماما الله يسترك ما تقتلينيش بيديك...جبدت يدها و قاتلي أيا امسحي عليا دموعك ... لي يشوف يقول راح نذبحوك ماشي نزوجوك....و لا راح نزوجوك بواحد ميسواش ...اسحاق الف وحدة تتمناه بدارو و بطنوبيل نتاعو و بخدمتو مثقف و متربي...شكون كيفك ...قتلها على بالي بصح !قاتلي باباك قال ايه و خلاص...قتلها واشنو؟؟؟؟بلا مايسقسيني قاتلي نسيتي عاداتنا و لا نفكرك..ولد العم اولى من البراني...قاتلي انا راني رايحة عند مراة عمك اغسلي وجهك و بركاي من التبهليل و الله و يسمع بيك باباك يندبلك... ايا اسكتي مراة عمك راهي قاعدة في الصالون حبيتيها تشوفك و ديريلنا التبهديل ..هي خرجت و انا دموعي ولاو يغسلو رجليا..من الخوف ما قدرتش نخمم في الجاي و الله غير بابا يذبحني#ام #اويس بقيت في بيتي ما حبيتش نخرج حتى للفطور ...ضاقت بيا الدنيا حبيت نخرج لي في قلبي بصح ما عندي حتى واحد نشكيلو همي .. لا اخت لا وحدة مصاحبتها و يما بعيدة عليا بزاف ما تفهمنيش كل كلمة نقولها تقولي باباك قال ... باباك ما يحبش... باباك يزعف ... هذا واش تعرف.... حسيت بلي الحيوط نتاع بيتي ذياقو عليا و خنقوني قلت نخرج نشم شوية هواء ندير السبة بالمكتبة و الحفاظة و نخرج .(بابا على المكتبة ما يقوليش... على خاطر قريبة لينا و علابالو راني مع الاختبارات) .

وجدت روحي وخرجت لقيتهم كامل متجمعين في الصالون غير خرجت جات عيني في عين اسحاق دورت وجهي و قلت لبابا ... راني رايحة للمكتبة

نراجع ساعة و نرجع... تنطق مراة عمي و قاتلي و تروحي وحدك ... يا عيني هذي بدأت تحكم فيا من ضرك...

قالتلها يما المكتبة غير هنا قدام الدار ... نطق اسحاق و قالي واش راح تجوزي جاوبتو بلا ما نخزر فيه و قتلو رياضيات و لغة عربية.. قالي تحبي نعاونك في رياضيات انا جيت راح نقول لالا صحة..عمي قالو تعمل مزية يا وليدي منها اخرج معاها باش ماتروحش وحدها و منها فهمها ... ما عندناش بنات يخرجو وحدهم...انا هنا قريب طرطقت يا حبيبي ولاو يحكمو فيا كامل ...من الزعاف قريب لبست صباطي بالمقلوب#ام #اويس خرجت و الجن لحمر ضاربني.. اسحاق ناض و خرج معايا طريق كاملة و حنا ساكتين حتى وصلنا للمكتبة من بعد قتلو صحة وجيت داخلة قالي ماشي قتلك نعاونك قتلو غير ما تشقيش روحك ما يخلوكش تدخل .. قالي خلاص ما ندخلوش انا راهم موصيني عليك رجلي على رجلك ..امممم عندي حل مكانش كاش جنينة هنا منها نشرحلك و منها تبدلي جو على خاطر راني حاسك ماشي على بعضك..خزرت فيه مخلوعة اوووو فاقلي هه قلت بيني و بين نفسي فرصة و جات لعندي نهدر معاه و نقولو راني رافضة و بابا سيف عليا باش نتزوج بيه و راني متأكدة بلي هو تان بلاك سيفوني عليه ...

قتلو ايه امشي معايا كاين ساحة عامة قريبة منا...وصلنا و قعدنا ...قالي يالله نبداو جبدت الأوراق نتاعي و بدأ يشرحلي و انا غست فيه و بقيت نتمعن فيه و نخمم.... لكان كانت ظروفي مبدلة كنت نفرح بهذي الخطبة بصح انا مارانيش عارفة إلا نصلح للزواج و لا لالا... لكان تخطبت لواحد من المدينة بلاك نحكيلو اذا قبل اللهم بارك و إذا رفضني يبقى الموضوع بيني و بينو بصح في البلاد الكشفة و الفضيحة لازم البلاد كامل تسمع....

اسحاق يهدر و انا غايسة ماشي معاه كامل و نقول ماشاء الله عليك زين و تربية و أخلاق و مثقف مانقصو والو ااااااااااه لكان كنت كيما كامل لبنات....انا مع مخي و نسمع في اسحاق يقولي ألو. .ألو راني نحكي معاك هاجر...وين رحتي.

بلا مقدمات قتلو علاش انا خزر فيا اسحاق و حسيتو فهم بصح حب يتأكد قالي انعم ما فهمتكش... قتلو علبالي بلي سيفوني عليك.. تبسم و قالي علاش انا تبانلك شخصيتي ضعيفة لهذي الدرجة حتى يحتمو عليا حاجة ماشي حابها... قتلو بصح مافهمتش خلاو عليك بنات البلاد كامل و رشقتلك عليا....ضحك و خزر فيا وحد الخزرة حتى هبطت راسي من الحشمة وقالي راكي قلتيها بعضمة لسانك رشقتلي عليك... من نهار جيتي لعند نا حطيتك في بالي و حبيت نقصدك من الباب و إذا راكي شايفة فيا كاش عيب هذيك

حاجة اخرى... قتلو حاشى لله مافيك ما يتعاب بصح انا مزالني نقرأ. و و .و في الحقيقة تستهل ماخير مني .. اذا بيك على القاراية نخليك تكملي انا قاري و نحب مرتي قارية... هو قال كلمة مرتي و انا قلبي فزع و كرشي عصرتني... تمنيت واحد كيما اسحاق بصح !!!! راكم عارفين بلا مانزيد نعجن في الهدرة المهم مين جيتو جاني و السبة لي درتهالو عطاني حلها و هونها. ... قتلو بصح علاش ما قلتليش كي كنت في داركم راك حاب تخطب...قالي و انت خليتيني نهدر معاك كي كنتي عندنا... كنتي غير تتهربي مني...

المهم السبة لي درتها ما قنع بيها

اسحاق و والديه زادو باتو ليلة و راحو للبلاد و انا كملت الاختبارات ...و انا كل يوم نحاول في ماما تقنع في بابا بصح بلا فايدة وحد النهار يما قاتلي باباك حب يهدر معاك انا قلبي تزير شميت بلي الحالة ما تشكرش...رحت لعند بابا قالي بلي رآه تفاهم مع عمي بلي العرس على 3 أشهر...اسحاق رآه مزروب

 انا هبطت عند رجليه و بديت نبكي قتلو علاش يا بابا ثقلت بيا و لا مليت مني ياك علابالك ماكملتش هدرتي... قالي سكري فمك انا راني نقولك ماشي نشاور فيك....قتلك على 3 أشهر تكوني في دار راجلك و خلاصت الهدرة صحلك وليد خويا و تزيدي تتشرطي الف وحدة راهي حاسداتك (ههه بابا يضحك تقول انا خاصتني يد و لا رجل و لا بلاك كاش عين)...

جات يما ليا و نوضتني من قدام بابا و داتني لبيتي قاتلي اسكتي حبيتي باباك يخنقك...قتلها خنقني و كمل ياك قبلتو في بلاصتي و ما قلت والو على الأقل ديرو العرس على رأي خلوني نكمل قرايتي ...تعيشي اهدري معاه قتلي راهو باباك و تعرفيه ما يرجعش في كلامو...

كان لي حبوه والديا و تفيكسات لادات نتاع عرسي...و لا بالأحرى جنازتي...يما هي لي تقضي هي كلش و انا كي الميت قلبي بارد على كلش و انا وليت ما ناكل ما نشرب غير نبكي ليل مع النهار و نخمم غير في واش رآه يستنى فيا ليلة عرسي اااااا قصدي ليلة موتي...وزيد فوق هذا كامل راني رايحة للدار لي فيها العبد لي هو سبة عذابي (خالد)

اسحاق بعثلي مع أسماء اختو قالي اذا يقدر يعيطلي و انا رفضت بحجة العرس قريب و انا في الحقيقة خفت نتعلق فيه و نعيش في حلم معاه و بعد 3 أشهر نفطن على الواقع المرررر

كان كل يوم ينسيستي على نيميرو حتى وافقت.... مسكين ظهر يحبني يعيطلي كل دقيقة و يشاور فيا في كلش على الصبيغة على القش...على ابسط حاجة ... (كيما قلتلكم نسكن وحدي بأني فوق دارهم)... كي شفت اسحاق هكذاك زاد وجعلي قلبي ... قلت لكان مكنتش

هكذا ضرك normalement راني طايرة من الفرحة..بصح الخيال حلو و الواقع مر. اكتشفت بلي هو إنسان متفتح و عقليتو تهبل حنين...رومانسي...و انا كل ما يعيطلي نبقى ساكتة نقول غير ايه و لالا كان يعيطلي الحشامة نتاعي....كان كل ما يعيطلي قلبي يبكي دم تعلقت بيه و انا ماشي حابة ..حتى مرة وصلت قريب صارحتو و تراجعت في آخر لحظة.

المهم جازو 3 أشهر عليا كي رمشة عين ...كنت كل مرة نتهدد نقول نروح للطبيبة و نتأكد بلاك راني غالطة بصح كي نتفكر و نرجع للماضي نقول موحال راني غير نطمع في روحي... والله قبل عرسي بنهار خممت نشرب كاش لاسيد و لا الدواء و نتهنى بصح خوفي من ربي ما خلانيش..

جا نهار جنازتي تفاهم بابا و عمي بلي يكون عرس مشترك بحكم أهلنا و حبابنا كامل في البلاد...رحت للحفافة مقدرتش كامل تخدملي درت حالة بالبكى و كي جاو يدوني درت المندبة. .. كامل فهمو بلي على سبة انا وحيدة و بابا و يما و مزالني صغيرة بصح انا ربي عالم لي في قلبي.... عمي راكب معايا في الطموبيل و يقولي اهاجر بنتي علاش البكى داري هي دار باباك تحبي نزيدو نجبوهم معانا يسكنو نجيبوهم.... و مراة عمي تضحك معايا بضحكتها الصفرة و تقول لعمي شفت الفشوش واش يدير...

مراة عمي عجوزتي طريق كاملة و هي تمص عليا في القارص و تقولي مراحش نقتلوك و لا ناكلوك....اووووف انت و ين و انا وين قريب طرت فيها و قتلها بلعي فمك عليا لي فيا كافيني

وصلت للدار عمي اااااا قصدي داري لقيت اسحاق واقف يستنى باش يدخلني (دارو العرس في الدار) كان يهبل لابس costume bleu nuit زايد فيه النص و محسن لحيتو كان يبان زلق من كاش مسلسل تركي....ههه...و حاط برنوس فوق كتافو ...هبطت قرب ليا و غطاني برنوسو انا هنا لحمي شوك و قلبي عصر دم..عينيه يضحكو من الفرحة انا شفتو و انا قتلو في قلبي سامحني بصح انا تان ما عندي حتى ذنب...ماقدرتش نرمي رجلي و نهبط من طموبيل شدني هبطني و دارني تحت جناحو و سترني بالبرنوس...في هذيك اللحظة دعيت ربي و قلت يا ربي يستر عليا كيما رآه ساترني ببرنوسو

الناس تشطح و تردح و انا نسايف على روحي باش نتبسم و ما قدرتش...تمنيت لكان العرس مايخلاصش ماشي باش مانطلعش لداري و يتغلق عليا الباب و نتفضح..

خلاص العرس و جا الوقت باش نطلع لداري..دخل اسحاق و عمي و بابا باش يدرلي اسحاق الخاتم و يتصورو.... اسحاق طلعلي voile و خزر في عينيا و قالي باسم الله ما شاء الله ربي يحفظك من العين ..غاضني مسكين و غاضتني عمري أكثر بالحق هذا أجمل نهار في حياتي.

بابا و عمي تصوروا معايا و كي كان بابا خارج عنقني و قال لاسحاق حطها في عينيك هاجر أمانة في رقبتك...قتلو في قلبي راح يحطني في قبري ماشي في عينو....عنقت بابا و قتلو اسمحلي..

قالي بابا واش نسمحلك يا المهبولة و اسحاق بقا غير يشوف...خلاص العرس و راح تبدأ الجنازة جا الوقت لي نطلع لداري يا ربي استرها معايا. يا ربي هون عليا مصيبتي.... طلعت لداري يدي ترعش في يد اسحاق...و هو حس بيا بلي راني خايفة طالعة في الدروج الناس الكل تزغرت و انا باش نطلع رجلي ماقدرتش من الخوف ..اسحاق قالي في وذني تطلعي و لا نرفدك تبسمتلو من فوق فوق قلبي....

دخلت لداري ماشاء الله عليها صغيرة و متحوفة دخلت لبيت النوم قعدت على الفراش و قلبي يعصر ..كرشي توجع و رجليا يخبطو في بعضهم تمنيت في هذيك اللحظة نموت و نتهنى.

اسحاق قعد قدامي رفد voile و سمى برحمان و سلم على جبهتي و شدني من يدي و سلم عليها و قالي شحال ستنيت هذي اللحظة و الحمد الله لي تمنينها تكون حلالي ربي كتبهالي..و قال كلام طويل و عريض ماركزتش معاه من قوة كنت مبحرة و لاهية بقلبي لي حسيتو راح يخرج من صدري يا درى اذا يطل عليا نهار غدوة و لا لالا... يا ربي واش راح نقول للناس غدوة الصباح ...إذا سلكت من اسحاق و عمي بابا يقتلني

قالي اسحاق علبالي راكي خايفة و راني حاس بيك مقلقة...راني عاذرك علبالي بلي الخطبة و العرسجاوك على غفلة .. وزيد خليتي المدينة و جيتي للبلاد ...بصح نوعدك بلي نحطك في عينيا تامنو في لحظة غست معاه و آمنت و نسيت حالي و حالتي...من بعد

جا راح يسلم عليا و انا طرت من بلاصتي ... و بديت نترعد و نحلل ..تعيش يا اسحاق تعيش لالا ... لالا تعيش.....نهدر و نصوطي كي المهبولة...

هو نخلع فيا جا ليا و شدني من يدي و قعدني على الفراش قالي هدني روحك علبالي راكي خايفة عادي و كلشي يجوز ماتقلقيش روحك برك... خلاص نوعدك ما نمسكش غير برضاك أهدني برك نحيتلو يدو و قتلو ماتمسني لا ليوم لا غدوة.... اسحاق نخلع قالي علاش غير الخير واش بيك راكي مريضة ..قتلو لالا ما بيا والو. ماتمسنيش و خلاص..اسحاق لون وجهو تلف

علبالي تقولي عليا مهبولة بصح قررت نقولو قولو عليا واش تحبو على خاطر خممت بيني و بين نفسي مايمسنيش اليوم و لا غدوة و لا على شهر يجي النهار لي يعرف...يعني يعرف اليوم و لا غدوة كيف كيف على هذا قررت نفضح سري لي خبيتو 9 سنين و أمري لله...قالي ما فهمتش واش تقصدي و لاااااا و لااا كاش ما راكي مخبية عليا..؟؟؟؟؟؟.انا ما قدرتش نهدر هبطت راسي و بديت نبكي..رفدلي راسي و قالي حطي عينك في عيني و قوليلي هاجر كاش ما صرالك دورت وجهي ماقدرتش نخزر في عينيه حشمت منو و ما لقيتش كيفاش نقولهالو ومين نبدها ..بدأ يهز فيا و يقولي هاجر بجاه ربي قوليلي لي في راسي ماشي صح...هنا طرطقت قتلو ماعلباليش... انا و ماعلباليش..كنت صغيرة في عمري 8 سنين و سكت ..و هو ولا ما يضويش خبط الحيط بيدو قريب ريبو. ..انا قفزت من الخلعة و عاود رجع

ليا عطاني كف عينيا لعبو...طحت على الفراش وليت نرعش من الخوف ولا اسحاق عبد آخر عمري ولا شفتو مقلق و لا زعفان والفت نشوفو calme و حنين...و لا وحش....و انا قلت اليوم نهاري  انا بقيت مرمية على الفراش و نبكي و اسحاق فتح البالكون شم شوية هواء ..قعد شوية و رجع ليا قعد فوق الفراش و قالي نوضي ياالله احكي راني نسمع فيك   هو نخلع فيا جا ليا و شدني من يدي و قعدني على الفراش قالي هدني روحك علبالي راكي خايفة عادي و كلشي يجوز ماتقلقيش روحك برك... خلاص نوعدك ما نمسكش غير برضاك أهدني برك نحيتلو يدو و قتلو ماتمسني لا ليوم لا غدوة.... اسحاق نخلع قالي علاش غير الخير واش بيك راكي مريضة ..قتلو لالا ما بيا والو. ماتمسنيش و خلاص..اسحاق لون وجهو تلف

علبالي تقولي عليا مهبولة بصح قررت نقولو قولو عليا واش تحبو على خاطر خممت بيني و بين نفسي مايمسنيش اليوم و لا غدوة و لا على شهر يجي النهار لي يعرف...يعني يعرف اليوم و لا غدوة كيف كيف على هذا قررت نفضح سري لي خبيتو 9 سنين و أمري لله...قالي ما فهمتش واش تقصدي و لاااااا و لااا كاش ما راكي مخبية عليا..؟؟؟؟؟؟.انا ما قدرتش نهدر هبطت راسي و بديت نبكي..رفدلي راسي و قالي حطي عينك في عيني و قوليلي هاجر كاش ما صرالك دورت وجهي ماقدرتش نخزر في عينيه حشمت منو و ما لقيتش كيفاش نقولهالو ومين نبدها ..بدأ يهز فيا و يقولي هاجر بجاه ربي قوليلي لي في راسي ماشي صح...هنا طرطقت قتلو ماعلباليش... انا و ماعلباليش..كنت صغيرة في عمري 8 سنين و سكت ..و هو ولا ما يضويش خبط الحيط بيدو قريب ريبو. ..انا قفزت من الخلعة و عاود رجع...بسيف باش قدرت نهدر من قوة البكى.. قتلو كان في عمري 8 سنين و هذاك الكلب كان أكبر مني ما كنتش نعرف بصح حسيت بلي ماشي ناويلي الخير ...قاومتو بصح كانت ضعيفة مقدرتش ...ظربني حتى تغاشيت من بعد ماعلباليش واش صار و لا واش دارلي و كي فطنت لقيت روحي في حالة انا نهدر و نبكي...و اسحاق شاد روحو عليا بسيف النار كانت شاعلة فيه..قالي علاش ما حكيتيش في هذاك الوقت قتلو هددني و راك تعرف بابا و طبايعو و الله يدفني حية..قالي قلتيلي كان عندك 8 سنين يعني كنت هنا في البلاد شكون هذا الكلب...قتلو واش يهمك ضرك في اسمو... زاد لي كف ثاني و شدني من شعري قالي هاجر قتلك قولي خيرلك...قتلو اقتلني اذا حبيت بصح غير أسمو ماتعرفوش...قالي وتزيدي تخبي عليه و طاح يضرب فيا و انا العياط ما عيطتش نبكي بلا حس و نتوجع دخلاني..ضربني خرج كامل زعافو فيا من بعد خرج وخلاني نضت بسيف فمي كامل دم و لحمي كامل يوجع بكيت حتى راسي وجعني و رقدت فطنت على صوت باب تخبط فتحت عينيا لقيتو اسحاق تكمشت في بلاصتي من الخوف كان وجهو يخوف سمايمو تلفو و عينيه حمر...حط كرسي و قابلني و قد يخزر فيا و انا حشاكم البول قريب طلقتو تحتي من الخوف....من بعد ناض و بدأ يقلب في الخزانة و جبد نويزات بيضة انا شفتو و انا دخلت بعضايا يا ربي على واش رآه ناوي ... خزر فيا وحد الخزرة تخوف

انا مخي ولا يدي و يجيب خرج من البيت من بعد رجع يدو مربوطة و رمى عليا هذيك النويزات معمرة دم و قالي هاكي هذي كي يجو ليك غدوة صباح اعطيهالهم...انا بقيت مصدومة من الموقف نتاعو لكان جا وحد اخر راه دار بيا التبهديل ..جيت راح نهدر معاه ...زاد خرج و خلاني

ماعرفتش هذيك الليلة كيفاش جازت عليا كي طلع الصباح جات لعندي يما و عجوزتي باش يشوفو الأحوال يما غير شافتني نخلعت على وجهي أزرق قتلها بلي زلقت في الصال دو بان و مراة عمي تسقسي فيا غير على واش صرا عطيتلها النويزات داتها وخرجت تجري و تزغرت و يما بقات تعنق و تبوس فيا (يا خي عوايد نتاع الجهال)...

يما و بابا جوزو الصبوحي و ودعوني وراحو بعد لي تهناو عليا... و انا نهار كامل و انا نخمم كيفاش الليلة1 جازت بصح واش راح يجوزلي الليلة الثانية مع اسحاق و اليامات الجايين ... بعد العشا طلعت لبيتي بديت نخمل فيها ....انا سمعت حس اسحاق و انا جمدت قلبي من بعيد تسمع صوتو... قالي هاجر ماعليش نهدر معاك ...هززت راسي قالي اسمحيلي على واش درت فيك البارح الله غالب فوق طاقتي ... نصدمت...شحال و انا نستنى في النهار لي تكوني ليا و تولي حلالي و انت قابلتيني بخبر كيما هذا واش حبيتيني نفرح و نشطح

.قتلو و الله عاذراتك بصح انا تان فوق طاقتي الله غالب عليا.وفي بالك انا كنت حابة هكذا ...قالي راني مامنك و علابالي ماشي ساهل واش جوزتي...بصح انت تان ما حبيتيش تعطيني أسمو و تبرديلي على قلبي ..قتلو و الله و لقيت الفايدة كي تعرف أسمو راني قتلك...قالي قوليلي برك و الله نفرجك في هذاك الحيوان...ااااااه يا اسحاق لكان تعرف بلي خوك تندم على نهار لي حبيت تعرف فيه اسمو... قتلو بصح واش الفايدة سكت شوية من بعد قالي شوفي هاجر علبالي بلي غبنك الزمان و راكي مظلومة بصح باش ننسى مانقدرش..و باش نطلقك و لا نفضحك ثان ما نقدرش ...حط راسو بين يديه و بقى يقول علااااش يا هاجر علاش راسي راح يطرطق و ما عرفتش واش ندير راني حاب نفطن و نلقى كامل هذا منام...و نلقى عرسي مزال ماجزش... قتلو والله يا اسحاق غير ماحبيتلك لي راك فيه و تمنيتلك لي خير مني و انت شاهد بصح بابا سيف عليا....و انت واش تقرر راني راضية و قابلة ...ماشي لازم عليك تتحمل غلطة غيرك و تخسر حياتك على جالي...حط يدو على فمي و قالي شوووووووووت تعيشي يا هاجر مخي عيا عيييييييييت خليني نرقد و ننسى بلي هاجر لي خيرتها مرتي ماشي مرتي و ماراحش تكون ليا ..و طاح فوق الفراش و تغطى ساس و راسي...جاتني الدمعة ماشي على حالتي على اسحاق و الله قطع في قلبي ...و زاد كبر في عيني صح ضربني بصح ستر عليا لكان وحداخر كانت تكون فضيحتي بجلاجل...

ليلتها انا رقدت على كرسي جاتني صعيبة نرقد قدامو.

نضت الصباح على صوت اسحاق ينوض فيا نضت مخلوعة قالي واش راكي ديري هنا ارقدي على الفراش ... قتلو ما قدرتش جاتني صعيبة قالي ما عندكش حل اخر و انا ما نقدرش نرقد في الصالون يما و تعرفي طبايعها و الله غير تفيق بينا(على خاطر عجوزتي من النوع لي ما يعرفش حاجة اسمها دقديق...تزدم على طووول)..شوفي اذا راكي خايفتني نوعدك علاقتي بيك شغل علاقة أخ مع اختو راكي مرتي بالاسم برك و قدام الناس ...قتلو و انت واش محتم عليك..طلقني و تهنى قالي ما نقدرش نلوحك مهما كان انت بنتعمي و مايهنينيش خاطري نخليك لباباك يقتلك...رآه عمي و نعرفو..غير بسبة الطلاق يدير فيك حالة...و تعرفي العوايد نتاوعنا كيفاش يديرو للمرأة المطلقة..خممت لقيت عندو الحق...نرضى بواش كتبلي ربي و خلاص لقيت لي يستر عليا و نزيد نتشرط

المهم كنت أنا و اسحاق في دار وحدة و بيت وحدة و فراش واحد بصح كل واحد عند حدو ....حديث قياس بصح قدام دارهم يعاملني عادي بالاخص قدام عجوزتي...وهو نهار طول برا يجي للفطور ...و في الليل يدخل يرقد قبالة. بصح كي جي عيني في عينو نحسو حاب يقولي بزاف حاجات نحس بلي النظرة نتاعو ليا فيها حب يا لكان ذرة ..

جاز شهر على عرسي و انا على هذا الحال... كنت مخنوقة في الدار غير مع الشغل و التنقريش نتاع مراة عمي تحب دير المشاكل على المنوض نتاع الصباح و على الشغل و على كلش ....كنت مقسومة بين زوج ديار داري الفوق و دار عجوزتي و انا جاتني صعيبة المسؤولية راكم عارفين صغيرة و كنت لاتية غير بقرايتي..و هي مين يطلع ربي النهار و هي تعيط...هذي ماشي ممسوحة ...عاودي سيقي ما مسحتيش مليح...تدخل في لبستي. في كلش..و انا غير ايه و ماعليه...نتجنبها قد لي نقدر في وجه عمي و في وجه اسحاق

خلاصت العطلة و لحق وقت القراية...حبيت نقول لاسحاق بصح حشمت... شحال من مرة توصلي على شط لساني و نبلعها...وحد النهار اسحاق خرج العواد باش يغسللهم قلت فرصة نروح لعندو و نقولو...كي رحت لقيتو مع الحصان نتاعو قتلو اسحاق حبيت نهدر معاك قالي تفضلي راني نسمع قتلو راك عارف بلي الدخلة نتاع لمسيد قريب...وووو...سكت قالي علبالي و انا مزالني عند وعدي..هو كان يهدر و الحصان نتاعو هاج عليا قريب جيت تحت رجليه عيطت و غطيت على وجهي حسيت غير يد جبدتني...حليت عيني لقيت اسحاق معنقني و يهدن في الحصان...ذبت في حوايجي من الحشمة قالي ça va ? ??ياك لباس..قتلو ايه قالي خلاص روحي للدار و ضرك نجي و نهدرو في الموضوع...هو يهدر و انا بعيدة مع مخي نقول يااااااه يخاف عليا قالي هاجر راني معاك ياك لباس قتلو ايه ...راني رايحة.

رحت للدار فرحانة على خاطر اسحاق شد في كلمتو...يا جماعة و الله رآه كل يوم يزيد يكبر في عيني ....رجع اسحاق للدار مع العشيا تعشينا و غسلت لماعن طبعااااا و طلعت لقيتو يستنا فيا قالي غدوة انشاء الله وجدي روحك الصباح نخرجو قتلو علاش قالي غدوة و تعرفي تصبحي بخير...بقيت حايرة وين راح يديني؟؟ليل كامل و انا نخمم...

نضت الصباح وجدت روحي طيبت القهوة شربنا انا و اسحاق و جينا خارجين تلاقينا بعجوزتي قتلها صباح الخير يما قاتلي واش من الخير وين بيها صباح ربي انا سكت لكان نقوللها ماعلباليش ماتامنيش...خزرت في اسحاق نتاع انطق قاللها عندي شغل مع الظهر نرجعو..قاتلو و هذا الشغل نتاعك و هي علاش راك مكركرها معاك كنت تخليها تعاوني ..قاللها يما المخلوقة عندها شهر ما شافتش برا و مراحش نباتو ساعة و نرجعو و إذا بيك على الشغل خليه و كي تجي هاجر تخدمو...

عجوزتي خبطت روحها و راحت و هي تمتم....و انا بقيت مخلوعة في اسحاق كي دافع عليا...

ركبنا في الطموبيل و رحنا ...حبس عند السوق قتلو واش جا بنا هنا قالي جبتك تشري حوايج نتاع المسيد ...ماتوجديش روحك للقراية... ياااااه مسكيييييين قلبو حنين آخر حاجة كنت متوقعتها منو...والله هذاك النهار كنت طايرة من الفرحة حسيت روحي راح ندخل سنة اولى..ههه فرحانة بدوزاني و حوايجي كيما الذراري الصغار و كي كنا برا قلت لاسحاق بصح تعود يما و لا بابا ما يحبوش قالي انا نقوللهم و زيد بالزيادة راكي مرتي و انا نحكم فيك....ياااه هذا كامل و مزال يقول عليا مرتي ..المهم شرينا ورجعنا للدار لقيت عجوزتي قالبة خليقتها..قتلها في قلبي لكان تعرفي الجاي تاكليلحمك.... فطرنا و كملنا انا نطم في الماعن و اسحاق قال ليماه يما انشاء الله إذا سهل ربي هاجر راح ترجع للقرايا...طرااااا....و تنطلق عجوزتي

عجوزتي سمعت واش قال اسحاق و بدات للدواس...دارت ليا وقاتلي فاش راح تنفعك القراية...ماعندها ماديرلك الصح في دارك و راجلك حنا ماعندناش بنات متزوجات و يقرو...ماتنسايش راكي بدارك و عندك مسؤوليات.. يا يما حبو يبهدلوني مع الجيران ...تهدر و تخبط في صدرها ...قتلها يما انشاء الله راح نظم وقتي و نوفق بين قرايتي و داري و را....راجلي قلتها و هبطت راسي...نطق اسحاق و قال ليماه هاجر ماعندها علاه انا لي خليتها ما دخلني في هدرة الناس و إذا عندك هدرة قوليهالي ليا هي ما عندها علاه...قاتلو حللها عينها و زيد هذي واش راهي دايرتلك تقول ساحراتك بعيد الشر قاللها يما الله يعيشك هذي حياتي و مرتي و انا حر ..انا غلبتني الدمعة طلعت لداري نجري اسحاق جا يجري مورايا قاتلو يماه روح تبع فيها ..جيل آخر زمن..

بقيت نبكي قالي هاجر يما و تعرفيها من قبل..ياك راهي تهدر برك و صح انا قتلك تقراي يعني تقراي..

خلاص حبسي من البكى...

ياااع صح كنت نبكي و غاضني الحال بصح كنت فرحانة من داخل كي وقف في وجه يماه على جالي .هههه انا شريرةوصح هكذاك كان الحال نهار الأول نتاع القراية نضت الصباح وجدت روحي كنت فرحاااااانة على خاطر راح ندخل نقرى في الليسي لي يقري فيه اسحاق كي كنت خارجة قالي اسحاق حبيت نطلب منك حاجة ...في الليسي ماذا بيا ما يعرفوش بلي متزوجين...قولي بلي احنا ولاد عم و انت عايشة عندنا بس...قالي هذا في مصلحتك باش ماتكثرش عليك الهدرة...وا علبالي لبنات يهبلوك.....قتلو يهبلوني علاش.....تبسم و ما جاوبنيش

كنت فرحانة رحت لليسي مع اسحاق دخلت لكلاصتي قريت الساعة الأولى و الساعة الثانية نشوف في اسحاق داخل يااااااه ماتقولوليش راح اسحاق يكون البروف نتاعي....ياااع شحال حالة

هو دخل و البنات بدأو يتغامزو عليه فرحانين ...لي كانت قاعدة معايا قالت يا عمري راح يقرينا اسحاق شحال يعجبني يا محاينك كور و ديكور... ضرك فهمت واش قصد.....خزرة فيها وحد الخزرة قلتلها في قلبي تجرب كاش وحدة تسيي زهرها معاه عينيها نجبدهملها...

اسحاق يهدر و يخزر فيا و انا مت ذبت تحللت من الحشمة...يا ربي واش يكمل العام هذا نهار صرا فيا هذا كامل...

المهم وليت الصباح انوض بكري نخمل و نروح نقرأ و كي نرجع نلقى المسيح و العشا يستنى فيا و من فوهذا كامل الهدرة الزايدة نتاع مراة عمي...

اسحاق البنات كامل هابلين عليه في الليسي يكحلو عليه أي و صح عندهم الحق زين و رزانة و تربية...و انا كنت كل ما نسمعهم يهدرو عليه النار تشعل فيا الله غالب لي يحب يغير و انا حبيتو أكثر من روحي بالأخص كي زدت عرفتو اكثر...ايه شوفو برك انتم راكو تقراو و طحتو فيه و انا واش نقول.

وحد النهار رجعت من القراية مع اسحاق لقيت عجوزتي قالبة خليقتها اسحاق دخل يدوش و انا رحت قبالة للشغل كي العادة و عجوزتي بقات تزن عند راسي

راسي نفختهولي....ماحبتش تسكت ...صبرت من بعد قتلها واش راكي حابة يما قاتلي راني حابة تحكمي دارك كي لبنات الساجيات مضيعة دارك و راجلك على جال زوج حروف بقات تهدر و تعجن..و انا شادة روحي على شعرة..حتى سمعت اسحاق قاللها و لخر معاك يا يما.. ياك راهي تخدم و تعاونك...قاتلو اه اه يا حسراه على تربيتي فيك...هذا لي قالك كي شاف الضيف طلق مول الدار.... و تشادو حتى جا عمي و سكتها...قاللها حبيتي تاكلي الطفلة

المهم هذا الروتين نتاعي قراية. .. شغل الدار....و تنقريش نتاع عجوزتي...ة علاقتي مع اسحاق هي هي انا كل يوم نزيد نحبو و نتعلق فيه و هو واش حاس من جيهتي ربي عالم زعما مزال يحبني...زعماينسى الماضي نتاعي و يسامحني...الله اعلم اليامات الجاية تبين

وحد النهار كي العادة رحت نقرأ هذاك النهار كنت راح نخرج على 4 ...واسحاق تان يكمل خدمتو على 4 بصح انا ماقريتش الساعة الأخيرة الأستاذة نتاع العربية ماجاتش...قلت نبقى في الكلاصة منها نستناه و منها نراجع على خاطر عندي اختبارات غدوة من ذاك و في الدار مانقدرش نقرأ مع عجوزتي و الشغل .. قعدت و قعدو في الكلاصة معايا وحد الطفلة و ولد (يبانو متصاحبين)و الباقي كامل خرجوا ... انا جبدت كراسي و بديت نحفظ و هي نطقت الطفلة هذيك قاتلي ما راحش تهرب منك الحفاظة لاحقة عليها

ماعييتيش منها نحي شوية على خاطرك...قاتلي حبيت نسقسيك ماعليش؟؟؟ صح استاذ اسحاق وليد عمك على خاطر كل يوم نشوفك تجي و تروحي معاه...قتلها ايه صح نطق لولد و قالي يااااه تهدري؟؟؟تبسمت..( صح انا ماشي موالفة نهدر ...على خاطر منخالطش و ما نقصر مع حتى واحد عقليتي و راكم تعرفوها)... ناض لولد وجا قعد فوق طابلة نتاعي و صاحبتو حسيتها تقلقت منو...قالي كنتي تسكني في Alg يرحم باباك مخلية المدينة و جاية لهذا الثلث الخالي ... ضحكت طابس عليا قالي ماشاء الله عليك انت شابة و كي تضحكيتزيدي كثر ماتحرميناش من ضحكتك الحلوة انا حشمت كي لصق فيا انا دورة وجهي من الحشمة و نشوف اسحاق واقف في الباب انا من الخلعة ريقي حصلي....#ام #اويس اسحاق كان وجهو حمر من الزعاف كي شاف هذاك الولد معايا على خاطر هذاك الولد من النوع لي يضل يتحرش بالبنات...قالي و النار تخرج من عينيه هاجر طمي دوزانك و يا الله ... و انتوما يالله كل واحد يروح لدارهم واش راكم ديرو هنا الناس تحفظ و انتم مع التمسخير... هذوك الزوج تسرسبو و انا ماعرفتش كيفاش طميت دوزاني من الخوف و اسحاق غلق الباب نتاع الكلاصة و جا ليا ..انا فشلت خفتو نعرف كي يزعف كيفاش يولي...شدني من يدي زير عليها قريب نحاهالي قالي جابلي ربي جبتك تقراي ماشي باش تجمعي و تقصري قتلو لالا انا كنت نقرأ قصدي كنت نستنا فيك وو.ووو.. قاطعني وقالي و هو جا يتمعشق و يتغزل بيك و انت عاجبك الحال و تضحكي و تحليلو في العين..يهدر و يزير عليا..قتلو اسحاق يدي راح تكسرها...كي شافني نتوجع طلقني..قالي راني نستنا فيك برا...قتلو اسحاق و الكلاصة لي خليتها قالي اخرجي و اسكتي

اسحاق عرف من الإدارة بلي ما قريتش جا يقولي نستناه و كي شاف واش شاف زعف...

وصلني للدار و وجهو مقلوب ما هدر معايا حتى كلمةو انا ما حبيتش نخلط فيه ...دخلت للدار رحت قبالة للشغل كي العادة.. وجدت العشا تعشينا كي كملنا طميت لماعن ...و جيت راح نغسلهم... جا اسحاق ليا قالي ماشي غدوة انشاء الله تبداو الاختبارات يهدر و مدور وجهو الخزرة ما خزرهاش فيا... قتلو ايه...قالي طميهم روحي تراجعي و الصباح اغسليهم...يهدر و مشنف زعما يبينلي رآه زعفان ..هههه يؤبرني الزعلان انا...

.درت على رايو طميتهم انا جيت خارجة من الكوزينة و انا تلاقيت مع عجوزتي..قاتلي وين يالالة..قتلها راني طالعة لداري قاتلي علابالي طالعة لدارك اغسلي لماعن و اطلعي على روحك ...و بدات تخلط في الهدرة كي العادة و هو اسحاق سمعها جا يجري هي شافتو..و هي قاتلو ماتجريش ما رانيش نقتل فيها راني نوريلها في صلاحها...قاللها بصح علاش هذا كامل ياك الماعن ما راحش يهربو غدوة انشاء الله تغسلهم...زاد جا عمي اسحاق قالي اطلعي للدار...طلعت و خليتهم معاها....

قريب اطرطقت...من هذا الضغط قلت ندوش بلاك نستراح...دخلت دوشت و نسيت الصورتي دو بان... لفيت روحي في سربيتة و خرجت للبيت جيت راح نلبس حوايجي شفت يدي زرقة كيما شدني اسحاق من يدي ...بقيت نخزر فيها ونضحك...زعما اسحاق غار عليا اليوم....زعما مزال يحبني...انا غايسة واسحاق دخل انا ما لقيت ما نغطي في روحي و هو بقا يخزر فيا و يكيل و يعاود...كلاني بعينيه...حتى حشمت دخلت نجري تحت لاكوات....وقف..وقف..ولا خبط الباب بالزعاف و خرج....

يا ربي واش بيه زعما كاش ما قاتلو يماه عليا

راجعت شوية و حبست ما قدرتش نقرأ تقلقت على اسحاق وصلت قريب 12 و مزال ما جاش ماشي عوايدو يسهر لهذا الو قت ....

الوحدة .. الزوج ...و مزال ما جاش تقلقت بقيت نعيط و نعاود ا هو ما يجاوبش ...وليت نقعد و نوض من القلق ..حتى سمعت حسو نضت نجري ليه قتلو وين كنت اسحاق تقلقت عليك قالي تقلقتي عليا علاش بصفتك واش مرتي....و في نفس الوقت ماشي مرتي ....بالاسم برك علاش..يهدر و عينيه حمر

قتلو اسحاق واش بيك كاش ما راك شارب ..مراكش في عقلك قالي لالا اليوم راني في عقل عقلي..عييت ...هاجر عييت ...المرأة لي نحبها كل يوم معايا قريبة مني و في نفس الوقت بعيدة حبيت اليوم نحي هذا المشكل من راسي و بدأ يقرب مني...قتلو راك تخوف فيا اسحاق..... اسحاق ولا عبرني....شدني و طاح عليا و انا بديت نعيط لربي لخلقني...هذا اللقطة فكرتني فلي جاز عليا ....نحلل فيه يا اسحاق تعيش ما تخليش روحك طيح من عيني و تكون كيما هذاك الكلب....تعييييييش....بصحهو لا حياة لمن تنادي قالي حبيت نحي الشك لي رآه في راسي عيييت يا هاجر عيييت...

كنت نبكي و نعيط حتى تبح صوتي... حتى صار لي صار ...ما فقت غير باسحاق يعنق فيا و يقول الحمد الله يا ربي لكنت شاك فيه صار ....و انا ما كنت فاهمة فيها حتى حبة قاعدة غير نبكي و نخبط في اسحاق شدلي يدي و سلم عليها و قالي سامحيني بصح لازم كان يصير هذا الشي باش نحي الشك و نتهنى و تتهناي معايا..و انا بقيت نبكي شدلي وجهي بيديه و قالي حطي عينك في عيني هاجر و سمعيني كنتي لباس عليك يا المهبولة....يعنق و يعاود... و انا ماشي مصدقة حتى شفت الخريطة لكانت تحتي ههههه...وليت نبكي من الفرحة و نقولو مافهمتش و هو يقولي يا المهبولة واش مافهمتيش باينة عين الشمس كنت لباس عليك و ضرك وليتي مرتي نتاع الصح ...نشفتيلي ريقي 5 أشهر كاملين يهدر و يضحك ..قالي راني رايح عند يما نقوللها تزغرت..قتلو هبلت ضرك انت لي مهبول...ليلتها اول ليلة بت مرتاحة حسيت جبل و تنحى من فوق ضهري.

الصباح نضت على صوت عجوزتي تكسر في الباب بالدقديق و العياط كي العادة... نضت لقيت اسحاق نايض و يخزر فيا غير شافني قالي صباحية مباركة يا عروس..خبطتو على كتفو..قتلو علاش ما نوضتنيش شحال الساعة ... يااااه نوض راهي8...قالي مانوضش عجبتني الدار...قتلو نوض اليوم عندي اختبار قالي اقعدي معايا شوية برك نعطيك عشرين على عشرين هههه قتلو راك ترشي فيا ...هو جا راح يهدر و عجوزتي ولات دقدق..قتلو نوض ليماك شوفها راح تكسر الباب...ناض فتح الباب سمعتها تقولو..وين راهي هذي حتى لضرك و قتاش تخدم الشغل و قتاه تروح....هههههه نسيت الماعن لي ما غسلتهمش...جا اسحاق ليا قالي يا الله راهي قريب 8 باش نروحو...(كان عندي اختبار على 10) قتلو نسيت لماعن ..قالي انا نغسلهم برموشي اذا حبيتي...قتلو هذيك هي حبيت يماك تنتفني و تنتفلك هذوك الرموش....نضت بسيف كنت مكسرة... غسلت الماعن و خملت و وجدت روحي ...رحت مع اسحاق لليسي..طريق كاملة و اسحاق يتغزل بيا و يعسل في الكلام الحروف لي حفظتهم نساني فيهم.هههههه

.جوزت الاختبارات الفصل الثاني جبت مليح. ..

قرب العام يخلاص و قرب الباك ..كنت نوجد و كان اسحاق يعاون فيا كنت طايرة من الفرحة و اسحاق كثر مني كان الحب نتاعنا كل يوم يزيد حتى في الليسي بدأو يحسو بلي كاين حاجة بيناتنا و بدات الهدرة و الإشاعات. ..

وحد النهار كنت في القسم مع مجموعة نتاع بنات نحلو في شوية تمارين و نراجعو.. و هو دخل اسحاق يحوس عليا نطقت وحدة قاتلي رآه جا مموالعين..بدأو يضحكو البنات و بدأ يتمتمو بيناتهم اسحاق شافهم و فهم

قالت وحدة خلاص الحيا خلاو الاولاد لي معانا و دارو للاساتذة خزرت في اسحاق شفت بلي وجهو حمار عرفت بلي شافهم كي كانو يهدرو و سمعهم..نضت نجري ليه و خزرت فيه و قتلو بين شواربي اسحاق أرواح برا نهدر معاك ..و هو شدني من يدي و قالي خلاص مليت لازم ندير حد البنات نخلعو..هههه راح ليهم و قاللهم لكان تلتهاو بقرايتكم ماشي خير هذي لي راكم تشوفو فيها على الأقل راهي تهدر مع راجلها شوفو رواحكم... لي والديكم يبعثوكم تقراو تجو تتمعشقو هههههه بقاو مخلوعين و يتخازرو في بعضاهم لسانهم تعقد. شغل فهمو و ما فهموش.... انا جاتني على قلبي.. قاللهم انا و هاجر تزوجنا..و لي نزيد نسمعو يهدر بسيرتها ناكلو...

و شدني من يدي وخرجني...قتلو اسحاق هبلت ...قالي راني هابل عليك و منك... قتلو أي يعود كاش واحد يشوفك...قتلي ضرك ما علبالي بحتى واحد تحبي نعيط في ساحة و نقول هااااااجر مرتي و نحبها...ههههه مهبول

قرب الباك كنت موجدة مليييح و هذا راجع لحبيبي اسحاق كان معاوني...جوزت و ربي فرحني وجبتو...قريب هبلت من الفرحة اسحاق قالي اطلبي واش تحبي كادو...قتلو شوف معاك ماخاصني والوحاجة وحدة حبيت نسكن وحدي..اسحاق قالي و الله ماذا بيا بصح راكي عارفة العادات نتاعنا الولد الكبير عيب يخرج من الدار اطلبي أي حاجة غير هذي..قتلو خلاص عندي طلب دايما كنت حابة نقلهولك و نحشم اديني نضرب دورة على ظهر لحصان...قالي هذا مكان غالية و الطلب رخيس....داني و خذا بخاطري ركبني على الحصان و ركب معايا ...لحظتها حسيت روحي كيما الاميرات نتاع القصص مع فارس أحلامهم. ..

كان كل نهار يجوز عليا معاه يكون أحلى من لي قبلو..#ام #اويس قبل ما نرجع للدار قالي اسحاق على المفاجأة نتاعو قالي بلي غدوة انشاء الله راح نهبطو ل alg نروح نشوف دارنا قريب هبلت من الفرحة ...

رحنا للدار و قال ليماه ناضت تزن على راسي كي العادة ...بنات آخر زمان مفشين...انا كي كنت عروسة قعدت عام باش شفت دارنا....و قعدت ساعة و هي تهدر على روحها كي كانت عروسة حتى صرعت اسحاق...انا ما قلقتنيش على خاطر كنت فرحانة كي راح نروح لدارنا توحشت والديا بزااااف.

رحت لدارنا مع اسحاق فرحوا بينا جوزت 5 أيام ما يتنساوش...كنت نبات و نسهر في دارنا و في النهار نخرج انا و اسحاق نحوسوا ماخلينا حتى بلاصة.

ودعت دارنا و عودت رجعت لداري في الطريق قالي اسحاق خلاصت ضيافتك و راح تولي لعياط

حسيبة..ههه حسيبة عجوزتي..قتلو واش ندير

وصلنا للدار دقدقنا فتحت عجوزتي و هي طايرة من الفرحة و تضحك فمها مفتوح لوذنيها...انا نخلعت حطيت في بالي نلقاوها مشنفة...قالت لاسحاق ارواح تشوف شكون جا انا سمعت حس اسماء..قلت هذي راهي فرحانة بأسماء ياك موالفة تجي...

دخل اسحاق للصالون و دخلت موراه... واش نشوف يا جماعة يا الله يا لبنات لي تجيبها فيكم فحلة...

ايوااااااا شفت كابوس حياتي واقف الكوشمار نتاعي هو بالذات و الصفات الكلب نتاع خالد بشحمو و لحمو ...انا شفتو و انا قريب طحت من طولي....شديت روحي بسيف ...اسحاق يعنق فيه و يعاود قالك حقة حقة كمل قرايتو و رجع و حب يديرها مفاجئة الله يفجعو انشاء الله ....خزر فيا و قالي الله يبارك هاجر و الله ما عرفتك كبرتي يا ......مراة خويا...و رمى يدو يخمس جبدت روحي و شديت في اسحاق و قتلو يسلمك...شعرة و كنت راح نبزق عليه ما نعرف كيفاش شديتها#ام #اويس كلاني الكلب بعينيه..انا حسيت النفس ضاقت بيا .. و اسحاق حس ..قالي واش بيك هاجر قتلو والو برك راني عيانة من الطريق انا سامحوني نطلع نريح شوية...تنطق مراة عمي ماطوليش باش توجدي العشاء...نطقت أسماء قاتلها خليها تريح راهي عيانة من الطريق ياك راني هنا و نعاونك.طلعت لداري و سكرت الباب و طحت في الارض...يا ربي علاش قعدت قريب 10 سنين باش نسيت الماضي و كي نسيتو عاود رجع و يعيش معايا في نفس الدار...يا ربي كيفاش راح ندير...

هبطت من فوق قلبي تعشيت و سهرت معاهم و هو سهرة كاملة يبحلق فيا و انا قلبي وجعني منو شادة في اسحاق مكرشة فيه حبيت نقولو بصح مهما كان يبقى خوه و لي فات مات ....

جازت السهرة حسيتها عام غدوة من ذاك نضت روطار مالقيتش اسحاق سقسيت عمي قالي راح لعند العواد يخرجهم....رحت لعندو...كي وصلت بقيت نعيط باسمو. ..حتى قالي واحد راح و انا منعمرلكش عينك... انا شفتو خالد و انا فشلت جيت رايحة عرضلي طريقي قالي شكون كان يقول هاجر تكبر و تتزوج باسحاق...و الله خويا رآه قافز يعرف يصيد...ايييييي كبرتي و حلويتي....قتلو قادر روحك ما تنساش واش نكون...راني مراة خوك اذا نسيت نفكرك...لالا نسيت تعرفي علاش زينك نساني...اااه على اسحاق خطفك مني...جيت راح نسيو

و سمعت صوت عمي جا قالي لقيتيه قتلو لالا سامحوني انا نروح للدار بلاك رجع.

رحت للدار لقيت اسحاق ثم غير شفتو عنقتو و بديت نبكي هو نخلع بقى يسقسي فيا و انا ما نقدر نقولو والو...قتلو تحبني. .قالي مهبولة انت انا مانحبكش...انا نموت عليك...قتلو اذا تحبني صح خرجني من هنا...قالي مزلنا مع هذي الحكاية ياك هدرت معاك و فهمتك 1000 مرة و قتلك مانقدرش...حبيتي والديا يعادوني....

و الله نغلقت في وجهي ...عايشة مع عدوي في دار وحدة

#ام #اويس جازو عليا اسوأ أيام حياتي....كانت الدار خانقتني من داري مانخرجش غير باش ما نتلاقاش بلي ما يتسماش...كرهلي حياتي وين يلقاني يبدأ يسمعلي في الكلام باش نقول لاسحاق ما نقدرش كنت مهبلة اسحاق غير بكلمة امشي نروحوا من هنا ...حتى كرهتلو حياتو...ولينا غير نداوسو...و زادت عجوزتي في هذيك الفترة هبلتني...فلانة رفدت..فلانة جات موراك و راهي ثقيلة زادت كملت على جدي ...

وحد النهار توفات وحدة من أهل عجوزتي و يسكنو بعيد راحت هي و شيخي باش يحضروا الجنازة و يباتو...و داهم لي مايتسماش....و اسحاق هذاك النهار راح يخرجلي وحد الورق من alg ....

بقيت وحدي في الدار و اسحاق بطى...نعيط تليفونو مغلوق سمعت الباب تحل رحت نجري انا هبطت و انا لقيتو خالد يا ربي هذا واش جابو ...و هو الظاهر وصلهم و رجع

جيت راجعة نطلع لداري و هو لحقني و شدني من يدي قتلو اطلقنيماتمسنيش...و لا تندم...قالي انا ندمت وخلاص ندمت على هذاك النهار لي خليتك فيه و ما مسيتكش لكان درت واش كنت ناوي راكي اليوم مرتي...كنتي راح تكوني ليا و ترفضي أي واحد يخطبك... رفدت يدي قد لي قدرت وعطيتو كف قتلو كلب و تبقى طول عمرك ماتسواش...فرحان و تزيد تهدر...ماتحشمش...دمرتني بواش درت عقدتني. .عذبتني

جبدني ليه و قالي سامحيني هاجر و الله غير نحبك منلي كنا صغار...وكنت حاطك في بالي بصح اسحاق سبقني و خطفك مني ...نكرهو من صغرنا و هو كلش ليه...قتلو اطلقني...خوك هذا لي راك تهدر عليه ما تلحقوش في ظفروا دنا ليا و قالي كبرتي و تعلمتي تهدري...كي قرب ليا شميت ريحة الشراب.حشاكم ...طلعت نجري جا مورايا شدني من روبتي..و قالي هربتي مني خطرة وحدة ما تتعاودش كي جبدني زلقت رجلي و طحت في الدروج عاود حكمني...قلت هذي المرة ما راحش نسلك...جا بين عينيا اسحاق..حكمت وجه خالد ندبتو بظوافري....طلقني وشد وجهو...و انا خرجت نجري و نبكي انا فتحت الباب و انا نخبط في اسحاق

اسحاق شاف حالتي انا شفتو و انا عنقتو و قتلو تعيييش خرجني منا هو ما فهم والو هو جا راح يسقسيني و هو شاف خالد خرج وجهو كامل دم بلا ما نهدر و نفسر فهم كلش .... خالد عاود رجع للدار يجري و اسحاق راح للكاميون نتاع باباه و جاب موكحلة نتاع الصيد و جا يجري...انا فشلت اليوم راح طيح روح شديتو و بديت نحلل فيه قتلو يا اسحاق تعيش اذا تحبني خليك منو ما توسخش يديك بيه..خرجني من هنا برك قالي خليني اليوم نشرب من دمو..الكلب لي مايسواش...شديتو بصح ما قدرتلوش كان فيه جهد 10 رجال نشد فيه و نقولو يا اسحاق و انا شكون بيا انعل بليس...مزية و مزية ربي خالد هرب من الدار لقيناه خرج من التاقة ... انا من الخلعة فشلت طحت في الارض و اسحاق كي شافني رمى السلاح من يدو و جا ليا و عنقني قالي اسمحيلي...انت تتعذبي و انا ماشي حاس بيك فتحتلك جروحك بلا مآ نجيب الخبر.....

اطلعي لمي حوايجك...قتلو وين قالي ماعندنا ما قعدنا هنا قتلو و والديك قالي يزعفو من بعد يرضااو...وين بصح راح نروحو..قالي عندي دار في alg شريتها حتى واحد ما سامع بيها راني كاريها لواحد.

و هكذاك كان الحال طميت حوايجي و رحنا لوتال حتى ما بيد يخرج الكراي..

ليلتها بات اسحاق معنقني تقول راح نهرب...كان متأثر بزاف لدرجة انو بكى و عندو الحق جاتو طعنة من أقرب انسان ليه خوه وليد يماه و باباه.....صعيييبة بزاااف..

قالي هاجر زدتي كبرتي في عيني حملتي الضرب ليلة عرسك و ماحبيتيش تقولي على اسم...و سكت...ما قدرش..

المهم جازو آليامات و والدين اسحاق قريب هبلو حبو يعرفو علاش رحنا بصح حنا ما قلنا والو تحججنا بلافاك...مراة عمي كلات لحمها من بعد رضات.....و مسود السعد عرفتوه ياك...همل لفرنسا...الله لا يردو..

و انا دخلت للجامعة و اسحاق ولا يخدم في ليسي قريب للدار....عشت مع تاج راسي و حبيبي و قرة عيني أحلى الايام... و ضرك راني ام لبنت و ثاني راه جاي في الطريق وربي يفرحكم كيما فرحني  دعينالكم ههه عاونوناا و كليكو على الاعلانات بفضلها الموقع مستمر بليز باش مانطروش نغلقو 

تحميل الحكايه و قرائتها على الهاتف PDF

النهاية 
إذا عجبتكم عطوها تقيم من 10 في الكومونتاغ