حب بعد الزواج (منال و مهدي )

حب بعد الزواج منال و مهدي

كرونيك جزائريه

الجزء الاول 1 ❤

_بنتي كاين واحد صاحب باباك حاب يخطبك لولدو فاميلية ناس ملاح نعرفوها حنا من جيهتنا قابلين بيهم بصح الكلمة اللخرة تولي ليك هدي حياتك و رايك نحترموه 😘

_ماما مازلت صغيرة و مخلصتش قرايتي في الجاميعة 😶

_معليش منال مزالك عام برك و مش مزروبين على العرس واش رايحا نقلك خممي و قوليلي 😍

...منال طفلة عمرها 22 سنة شابة زينها يقتل عينيها ماغون و شعرها شاطان طويل و ملس حرير 😍 طفلة الصغيرة في عايلتها مدللة ❤و مهبولة عندها ضحكة فانطاستيك 😂 عايلتها غنية لاباس عليهم عندهم فيلا كبيرة بجاردان و لابيسين.. امها مريم طبيبة 

و بوها محمد يخدم في شركة تاعو💗 اختها ريم لكبيرة 28 سنة مزوجة في ولاية بعيدة و خوها رمزي 27 خلص قرايتو و يخدم

*منال عاشت قصة حب مع وليد طفل بوڨوص كان يقرا معها دارت فيه كونفيونص و حبتو هو تاني حبها 😑 نهار شفتو مع وحدا 😓خانها و طعنها في ظهرها تشوكات هدا هو لي كان يقلي منشوفش مع وحدة غيرك هذا وليد لي حسبتو فيدال 😭 هي بطبيعتها قوية و متحبش تبين ضعفها جمعت قوتها تنفست باه متبكيش و راحت وقفت قدامهم في الطابلة ضحكت ضحكة مع الطفلة لي معاه و دارت ليه وليد مغسي بوغ ثو حبيتك و خدعتيني و ضهرتي رخيس ربي وكيلك باي 😷 دارت مروحة بزربة حكمها من يدها منولتي نحبك 😯 قاتلو مزلتي تحل في فمك و تقول نحبك 😒 قالها و عشرتنا ياك قتلك كي تخلص لقراية نخطبك 😍 هزت يدها و ضربتو كف ✋ قاتلو انسا طفلة اسمها منال انا منكملش مع واحد كيفك 😑 و دارت تمشي بزربة طالو يخبط في الارض بقوة وليد كان عارف بلي هو لغالط و خسر جوهرة كانت بين يديه 😦**

نرجعو لحوار منال مع مها طلعت لبيتها راسها يخمم بعيد 😶 جازو 5 شهر ملي بعدت على وليد بلوكاتو في الفيسبوك و كسرت لا بيس و قطعت كل خيط يقدر يوصلها بيه 😓 هزت تيليفونها و عيطت لايمان صحبتها من الصغر و اكثر من اختها تحكيلها كلش و هي لي تعاون فيها باش تنسا وليد😍

_الو ميمي

_منولتي صافا

_عندي منحكيلك بب

_شبيه صوتك ياك غير الخير

_لالا متقلقيش مكان والو

_اا حمد لله ارواح عندي نتي انا لازم نشاور لموسيو سي نو يقتلني ههههه

_ههههه داكوغ درك نلبس و نجيك

**ايمان طفلة تهبل مخطوبة ايه جربت قداه علاقة و فشلت حتى اقتنعت بلي ولد لحلال يجي من باب الدار 😍 خطبها صافي 3شهر فارس طفل شباب و خدام حبت و تعلقت بيه

لبست منال صالوباث و لمت شعرها كود شوفال و هبطت قالت لماماها و راحت 😘 ايمان تسكن قريبة ليهم و صلت صونات خرجتلها امها لايمان(سلاف)

_مانو توحشناك _باستها_ هدي غيبة يا بنتي😍

_والله يا طاطا سخانة تع صيف او تعرف تخرج تندم او جيتكم ليوم مام انا توحشتكم 😍 وايني ميمي

_اي لفوق في بيت عبدو (خوها لكبير) يلعبو بالبلاي هبلتني متعاونيش خلاص كي نقلها تقولي جيب خدامة و انا منرضاش بخدمتهم و طيابهم لازم نوقف على كلش انا ههه

_ههههه ماما جابت خدامة بصح دايمن فوق راسها دير هكا و دير هك 😂

_

ههههه حتى ماماك ليها وحشة توحشت الشغلة معاها

هوما يشغلو و تهبط ايمان تجري ببيجاما قفزت عليها تبوس و تحضن ولاو يضحكو 😂😂😂

طلعو لبيتها بداو يحكيو .

❤

_واش حوالك ميمي مع فارس صافا

_اي بيان حبيت نخرج معاه بصح حتا نشاور ماما

_توحشتيه ا كلبة 😂

_ههههه مالا او غاجلي هداك

_ههههه وي

_هيا ابدا وش عندك تحكي 😂

_ملخر ولد يوسف صاحب بابا طلبني لولدو

_يااااا صح ا خراا ولادو اكل بقلاواات

_ههه اسكت خليني نكمل هدرتلي ا لموصيبة ههه هدرتلي ماما برك و قاتلي او يزيد يهدرلك باباك و انا حابة نشاورك كيفاه نهدر معاه تعرفني حشامة هههه

_هههه وجه الحشمة هههه كي شغل ماماك سربتلك سيجي 😂 نورمال يقلك واش رايك قولو كيما تحب و هو يفهمها بلي قابلة 😍

_وشياا شكون قالك قابلة 😑

_مهبولة لاكان مقبلتيش واش خصهم فامي معروفة و بڨاڨيص شايفتهم ديجا

_بصح منحبوش 😿

_اه نتي واش دارلك لي حبيتيه خانك و دمرك و لا شوف انا قداه طفل صاحبت و مكتبليش معاهم و درك مع فارس حبيتو بعد ما خطبني و حمد لله عايشة لابال vie

_منال تفكرت وليد طاحتلها دمعة مسحتها بزربة و تنهدت قالتلها في هذي عندك الحق بصح كون منحبوش بعد الخطبة كيفاه ندير ??? 😔

_بفف رايحة تهبلني نتي تقول بهلولة هذي باينة تحبو ورا زواج

كملو شغلو منال رتاحت كي حكات معها و بدات تقتنع و بقات تخمم روحت لدار عاونت ماماها وجدو طابلة حطت الخادمة فريدة لعشا و روحت

**فريدة مرا كبيرة ملي سكنو في الفيلا مريم مقدرتش لشغل الدار و تربية الدراري جابتها عاونتها بزاف و والفو عليها ولات فرد من عايلتهم 😍**

تعشاو و كي قريب يخلصو نطق بوها قال ايه بنتي كبرت و ولاو يجيو يخطبو فيها و شاف مع منال حشمت و هبطت راسها و مها مريم ضحكت قال رمزي

_شكون هذا لي طلب ختي منمدش تاعي

ضحكو كامل و قال محمد

_مهدي ولد يوسف عبد الحق صاحبي هدر معاي قالي حاب نخطبلو و منلقاش كيف بنتك نتا كيما خويا و بنتك كيما بنتي متخافش عليها

_سكتت منال و قالت بابا منعرفوش منقدرش نقبل درك مام با شفتو

_قال رمزي يا ستوتة او بوڨوص نعرفو ههههه

بحكم بوها متفتح قالها _ خمم مليح و تقدر تخرج معاه و شوف عقليتو لاكان عجبك يجيب لا فامي و يجي

_قاتلو بابا لي ديرو نتا انا راضية بيه و ناضت باستو من جبينو و زادت ماماها

_رمزي قال و انا 😒 راحت حضنتو و تبوس فيه و هو يدغدغ فيها و يقلها صغرونتي رايحا تزوج 😂😂

هو صح صعيب و ميخليهاش تخرج بزاف ولا دير كيما تحب بصح يخاف عليها من نسمة الهوا و حنين و يحبها بزاف❤

طلعت لبيتها حست روحها مرتاحة من كلام بوها و عندها ثيقة في بوه و علابالها ميمدهاش لي من جا 😍

عيطت لميمي حكاتلها و فرحت بزاف كوناكتات شوية و نعست

❤

نروحو درك لمهدي و عايلتو 😍

**مهدي طفل 27 سنة طبيب بوڨوص لي يشوفو يتغرم بيه طويل و لكور تاعو مخدوم سمر و عينيه مارون كلار و شعرو ملس متهلي في روحو دايما حطة 😍😍

عايش في عائلة ثرية بوه يوسف مقاول و امو سعاد متخدمش عايشين في فيلا كبيرة تهبل عندو ختو كبيرة اسماء مزوجة و عندها دراري و خوه سامي صغيرعليه بعام و اختو صغيرة 21 هبة يحبها بزاف و مدللها 😍😛 البنات عليه تترامى و هو عليمن يرضى صوحب بنات بزاف و دايما يسهر مع صحابو يدخل للدار نصاص الليالي 😜 من صغرو تقولو امو نتا ولدي صغير انا لي نخيرلك عروستك بصح هو مكانش معول يتزوج باسكو ملخر ميقدرش على هذيك المسؤولية 😷

جات امو تحكي معاه...

_واينك يا ولدي مزلتي مع السهرات و انا رايحة نزوجك

_هههه يا سوسو قتلك منيش تع عرس انا تعرفني

_سي بون باباك هدر مع عمك يوسف و خطبلك بنتو منال صغيرة لكان قبلو سمانة لجاية نروحو

_اه هذي اللخرة تخطبولي و انا ٱخر من يعلم بلاك تشوفو فيا صغير نرضع في صبعي

_انا كلمتي هدرتها و طاحت الكلمة بين الرجال نخلي ولدي هامل من طفلة لطفلة و سهريات و الدخان اتسڨم يا وليدي و خليني راضية عليك❤

مهدي قلق لبس و خرج يخمم يعرف امو كي تحط حاجة في بالها ديرها

راح عند صاحبو امين صحبة من لي كانو صغار حكالو

_هههه راحت عليك يا ولدي

_ايا روح.... نتا زادا كمل على د.. امي

_هههه واش خصك اتزوج خير تنقص شويا هملات

_ايه لهملات خليتهم ليك

_يا خويا حتا انا امي دايما ورايا اتزوج اتزوج...

بعد سمانة ملي هدر بوه معاهم جا عندو بوه

_مهدي ليوم جا عندي محمد قالي رانا قابلين بصح اتلاقا قبل بالطفلة اتعرفو و لكان تفهمتيو نديرو حاجة رسمية

_اوكي

_محابش تديها 😒

_نن نرمال

_راني فاهمك يا وليدي حنا عاداتنا نحبو الزوجة بعد الزواج المهم تكون متربية و عاقلة و تهنيك في حياتك و تفرحك و تربيلك ولادك كيما يماك 😍

_ههه اه يا بابا العاشق او نسيتي روحك 😂😂

_هههه هيا احشم راني باباك 😑 هيا واش قولتي و كتاه تخرج منال

_شكون منال :/

_😒😒😒

_ااا سي بون بنت محمد ههه اصبر عليا نخلص صطاج هدي سمانة و نتفاهمو

_اوكي يا ولدي

خلص الصيف و وصل وقت لقراية منال العام هذا تكمل قرايتها بصح حلمها تكمل دوكتورا😍 مهدي خلص قرايتو و هدا العام يعڨبو دي سطاج❤

مهدي قرر يخرج مع المخلوقة هذي لي تقدر تكون مرتو 😂مكانش حاب يخرج بصح احترام لبوه و لمحمد هدر مع باباه مدلو نيميرو تعها (محبش يدخل الوالدين في لافار )

منال كانت في لافاك مع صحاباتها و لي يقراو معاها صونا تيليفونها معرفتش نيميرو محبتش تريبوندي قالها اسلام انتيمها اعطيني نهز مدتلو

اسلام:الو سلام عليكم

مهدي :و عليكم سلام هذا مش نيميرو تع منال كيناز

اسلام:وي وي تعها

مدلها تليفون

منال:الو C qui !!

مهدي ديجا قلق :مهدي ولد يوسف عبد الحق

منال تربكت:اا داكوغ صافا

مهدي : لاباس جو بونس مقاعداش مش وحدك و انا قلقتك😒 حسبها مع صاحبها

منال:نن انا في لافاك اسمحلي 😶

مهدي :امم اوكي مبعد نعيطلك نتفاهمو وصاني بابا نخرجو

منال:وي سيبا ڨغاف مام نا قالي papa باي

مهدي :باي اتهلا و كوبا

راحت منال مع ولاد كلاستها سقساها اسلام شكون ضحكت و شافت مع ايمان قاتلو مش وقتو وصلت 12 روحت مع ايمان حكاتلها و وصاتها كيفاه تهدر معاه

>>مهدي عجبو صوتها حنين بصح حسها متكبرة و معجبوش الحال كي هز علية طفل 😕<<

>>منال حستو موهر صوتو رجولي و يبان واعر 😷>>

هذا رأي منال و مهدي من اول مكالمة مع بعض

راحت لدار لقاتها فارغة جازت للكوزينة لقات فريدة الخدامة طيب و معها بنتها سلمت عليهم

_طاطا وشبيها الدار فارغة

_خرجو من صباح يخدمو

_ااا اوكي

_نحطلك تتغدا بنتي درتلك لازانيا كيما تبغيها

_ياا لازاني حطلي حطلي فيفي لعزيزة هههه نبدل قشي و نهبط😜...دارت لريان(بنت فريدة ) رورو صافا مع القراية

_ههه وي حنا بدينا من درك او تعرف الباك مش ساهل

_ههه صح عندك الحق تكمل قرايتك و نزوجوك ا كشرودة ههههه

_ههههه وي بحياتك حبيبتي

_ههههه باستها و طلعت

**منال اكل يحبوها من عايلتها لصحابها لفريدة و بنتها لولاد الحومة خاطر دايما تضحك و تتمسخر😂 و حشامة و عاقلة 😍 **

منال طلعت لبست غوب بيجاما قصيرة لمت شعرها طوماطيشة و هبطت تقفز في الدروج هههه مهما كبرت تبقى تحب تلعب و تضحك و تتمهبل

تغذاو غطست في الماكلة شغلت معاهم و طلعت لبيتها قرات شوية و نعست (الماكلة و الضحك و النعاس الهوايات تعها 😂😂)نعست حتى للعشية جات يماها سقسات عليها طلعت عندها طبطبت ودخلت مسحت على شعرها و قالت

_مانو نوضي حبيبتي نعستي بزاف يوجعك راسك

_حلت عينيها و صوتها مزال بنوم امم ماما جيتي درك نوض

_وي منال خالتك وفاء جات تتعشا معنا

_اا بيان يخي تجيب ولادها 😍

_وي قولتلها جيبهم

_اوكي مامي تقعدت و لمت شعرها ماما عيطلي ولد طونطون يوسف بكري

_اا مهدي وش قالك

_كنت فلافاك و قالي مبعد نعاودلك نتفاهمو نخرجو

_اا داكور او محمد قالو اتعرفو قبل ما تجيب لافامي

_وي ماما واش نقلو

_كون عاقلة و خليه هو يقرر لازم تخليه يمد كلمتو خاطر تحسسو بروجولتو

_و كون ميعجبنيش

_زيو 😶!!

_وي ou bien عقليتو

_ههه مهدي نعرفو شباب يهبل لكور و ديكور كيما يقولو هههه و ديك ضحكة تقتل اما نتي خير 😎

_ههههه

_و عقليتو كيما تكون توالف بيه و نتي تبدلها كيما تحب لازم تكسب محبتو و تشوف كيفاه تعيش احلى معيشة ربي يهنيك بنتي باستها و ناضت

_ماما ضهرتي خبيرة في لي غولاصيون و انا معلبليش ههههه

_هههه مالا حبيبتي خليت بوك يجري في جرتي اعادا قبلت بيه هههه ليامات

_ههههه وحيدة نتيا هههه

هبطت مها هي دخلت دوشت خرجت ب صوغتيدبان و شعرها يقطر قعدت صونا تيليفونها نفس نيميرو تع بكري خلاتو شوية و هزت حشمانة😛

_الو بونصواغ

_بونصوار صافا ياك مديرونجيناكش

_ههه نن (صوتها بالكاد يتسمع)

_الووو !!!

_وي اني نسمع

_ ضحك اه مسمعتكش تقدر تصوت شوية

_ههه اوكي

_عيطتلك على الخرجة وكتاه حابة نخرجو

_معنديش بخوبلام كيما تحب

_غدوا تقرا !!

_وي نخرج 11

_مالا غدوا كي تخرج نتلاقاو في ريسطو **** تعرفو !!

_وي وي داكوغ

_اوكي هذا نيميرو تاعي عيطلي كي توصل

_اوكي a bientôt و كوبات

لبست بيجاما شابة و هبطت للكوزينة قاتهم يوجدو لعشا قالت لمها غدوا نخرج قالتلها اوكي

""منال تهدر كلش لمها بصح متمدشles détailles بصح في الامور المهمة تشاورها 😍""

نوقز الباب راحت فتحت لقات خالتها وفاء و بنها لكبير حسام و ختو مايا ضحكت سلمت عليهم و رحبت بيهم دخلو قعدو شغلو شوية و حسام خرج مايا طلعت معها للبيت حكاتلها على لافار تع خطبتها فرحتلها و شجعتها و كي قالتلها مهدي عبدالحق

_ياا منال مهدي عبدالحق ولد يوسف

_وي واش بيه 😕

_نن هههه مبيه والو كان يقرا معاي في ليسي بوڨوص لبانيت عليه و هو ميقيمش

_هههه زيد احكيلي

_هو عاقل و مربي اما صعيب و واعر شوية بصح يهبل هكا تحسو رجلة سيغ ثو مع الكور تعو طويل 😍

_ههههه 😂😂

_ههههه ليصونسيال كي تهدر معاه او سيغ تحسو متكبر بصح او مع الوقت توالفو

_ههههه وي

_عيطولهم هبطو تلمو على الطابلة تعشاو و سهرو مع بعض❤ نطقت وفاء قالت انا رايحة نخطب لحسام بنت جارتنا 😍 و مدابيا تروحو معاي نتعرفو عليهم

فرحو اكل و مريم بدات تزغرت حسام حشم و ضحك يعيشك مريومة يخليك لينا و باسها

طلعت منال لشبرتها عيطت لميمي

_عمري صافا

_صافا و انتي بب

_حمد لله غدوا خارجة مع غاجلي

_ههههه ولا غاجلك ديجا 😂

_ههههه كارهة 😓هيا قلي واش نلبس...واش نهدر

_لبستك كاملة تهبل البس حاجة سامبل و شعرك خليه محلول و اهدر على طبيعتك بب

_هههه اه وي هيا بونوي

نعست منال صباح جات امها تفيقها

_مانو نوضي راح الحال من بكري يصوني reveille منضتيش

_اعع مسمعتوش و راح الحال عندي كونتغول ناضت تجري لبست و راحت في طكسي تعها (شراهالها بوها كي دات الباك) راحت للفاك وصلت

_bnjGh monSieur prd pour le retard

_entrez C la derniére fois mademoiSelle 😠

_hhhh mghsii

طلعت قعدت حدا ايمان و بداو يوشوشو

_جيتي تهبل ا ق... 😂

_عينيك يهبلو ا هجالة هههه

_وشبيك محطيتيش ماكياج

_راح الحاال مبكرتش مبعد حطلي شويا نتي تعرفني نحب سامبل... وراتلها وحدا حاطة طلية مكياج و طرطقو بضحك لونفي كامل دار ليهم 😬الاستاذ تغشش

_eeey la bas arettez de regoler vous deux 😠

_......

_changer vos places 😒

ناضت ايمان و جا حدا منال طفل عينيه كلاوها

_بسس نقدرو نتعرفو انا سيف 😃

_انا منال وماحاباش نتعرف 😇

جوزو كونترول و خرجو حطت شويا ماكياج و راحت

مهدي كان قاعد يشوف في طفلة شعرها محلول و لابسة lunette solaire لابسة سروال جينز مقطع وpull بيض وجيلي نواغ تهبل 😍 عرفها هي هزت بورطابلها عيطتلو

_الو انا وصلت

_لا طابل لخرة ادغواط

_okii j'arivve

_وصلت مدتلو يدها

_بونجوغ طولت عليك كنت نجوز في كونتخول

_نن نرمال... واش تاكل

_des repas simples comme toi c tt

_T'es une franCaiSe !!

_nn mais j'etude franC

_ا داكوغ ندوموندي واش ناكلو و نحكيو انا مادا بيا نتفاهمو وحدنا خير من لافامي

_uii uii C sugh

دوموندا و رجع قالها انا مهدي عبدالحق قاري medecine et j'ai 27 ans

_هي مهبطة راسها حاشمة قاتلو الله يبارك enchanté و مدتلو يدها

_C manel kinaz j'étude francais et je peux continuer ma doctorat

_ضحك وي c mieux

جابولهم بيتزا و بانيني

_جبت ماكلة خفيفة تفضل كول

_مغسي هزت كلات بانيني و شربت كانات

_لازم نكونو صريحين بيناتنا نتي واش رايك في لافار اذا محاباش نورمال

_وجها حمار قاتلو انا راضية بلي يقولو papa

_وي انا تني قبلت على رضاية الوالدين برك

منال تنبزت يعني ميهموش فيها غير بش يرضي والديه _وي C imprtant mais اذا كان عندك شكون و انا فسدت عليها C facile نقول انا مقابلاش تجي من عندي و c Bon

_مهدي معجبوش كلامها قالها نن

_تنشعت بقات ساكتة و تشوف مع الارض قاتلوprd انا نروح

_اوكي حبيت نقلك انا نأمن بالحب بعد الزواج و لا ميهمش بالحب و لا نن المهم التفاهم(هذي هدرهالها باستعماد بش تفهم روحها بلي مش تع حب و خرجات) 😶

_هي تشوكات قاتلو باي و دارت ماشية بزربة الطالون رايح يخرب القاعة

خرج وراها شافها ركبت في طكسي و مشات هو عجبتو بصح مخو مش في لاموغ و العرس و كان عندو امل ميقبلوش دارها

جازو ليام محمد و يوسف قبلو و تفاهمو توصل الفاكونس تع الربيع (بحكم منال كانت تقرا) يجيو يشوفو عروستهم و يتعرفو مليح 😍 وصل الربيع منال كي لعادة ناعسة جازت ليها ايمان سلمت على مريم قالتلها ناعسة طلعت عندها 😛 دقدقت الباب و دخلت لقاتها غاطسة فنوم شعرها على وجها و الغطا طايح في القاعة ضحكت و بدات تعيط و تحل في الشباك

_نوضي يا لموصيبة مزال يومين على شوفتك ما شريتي واش تلبس لا عاونتي طاطا لا تفاهمتي مع لكوافاز 😠

_فطنت ناضت تلم في شعرها يااه شحال تحكي يا محاينك 😒

_هيا اتحرك افطر و نخرجو هذا لي تقلي غدوا 10 نعدي عليك هههه

_ههههه كنت نهدر 10 تع ليل 😂

_ههههه يعطيك غمة نشالله

هبطو فطرت لبست قشها لمت شعرها و خرجو راحو بطكسي تاعها دارو الحوانت ڨاع و مرضاتش منال ههه بطبيعتها ذوقها صعيب و تحب تشوف كلش ابخي تخير

_مناال هبلتيني معجبك والو

_ سي عجبوني ههههه

رجعتها للحانوت اللول كبير و مضخم

_هذا عجبوني لي غوب كامل 😍

_ادخل ادخل قالو كامل هههه

طلعو بقاو يتفرجو جا لي يخدم لتم بقا مركز مع منال عجبتو

_بونجوغ les filles نقدر نعاونكم

ايمان : غوب سامبل لشوفة برك😁

الطفل:وي كاين بزاف و بلي طاي ليك نتي

منال :نن بوغ موا

طفل كشخ :اه طيروك يا لمزيانة

منال ضحكت ضحكة صفرة متحبش واحد يتغزل بيها :تقدر توريلي لي مودال

https://hikayattt.blogspot.com/

_وي نتي taille fine اكل يجيوك يهبلو ضحك و غمزها 😉

ليسونسيال خيرت منال غوب طويلة سامبل rose clair جاتها تفتق على بدنها 😍

_يااا عيشلي ختي يا ربي زينها قتلني طيحني a terre هههه

_هههه مغسي بب

خيرت ايمان قفطان سامبل ليها و كملو شراو لي طالون و بوشاط و جازو على لكوافاز تفاهمو معها تجيهم للدار و روحو 😇

وصلو لقاو مريم و سلاف و ريم اختها (تسكن في ولاية خلاف مش دايما تجي و خاصة كي هزت بالكرش 😍) يوجدو في الڨاطو و لي سارفيس ترمات على ريم تبوس _واين هذا حتى نتوحشوك ا خيتي ههه

_هههه والله قالي طبيب le bb هابط ملازمش voyage و كي رتحت اني نولي نجيكم

_هههه وي شافت مع كرشها و ضحكت يا عمري على بنت ختي قريب تجي عندنا ههه

وصل اليوم المحدد منال منعستش حتى مع الفجر تفكرت وليد كان يقلها غير نتي لي نديك و تكون مرتي😢 ايه منال منساتوش و كيفاه تنسى عشرة 6 سنين في 6 شهر 💔اذن الفجر ناضت مسحت دموعها توضات و صلات و دعات لربي

_يا ربي انت على كل شيئ عليم اللهم قرب مني الخير و ابعد عني الشر و الشرور يا رب العالمين 😍

حست روحها مرتاحة رقدت مع 9 صونا reveille بسيف ناضت لبست و هبطت لقاتهم يفطرو العايلة كاملة ملمومة و زاد جا مختار جدها و جدتها نورة (عايشين في فرنسا )كي شافتهم فرحت و راحت تحضن فيهم

_والله ليكم وحشة واين هذا

_او تعرف الظروف يا بنتي كي سمعت بخطبتك هبطت نجري عزيزة عليا بزاف راك (نورة)

_هيه يا بنتي ربي يهنيك انا كي قالي محمد خطبها ولد يوسف تهنيت ناس نعرفهم مليح (مختار)

زاد شوية وصلت لاكوافاز (دلال) للدار سلمت عليها طلعو لبيتها

_مانو واش باغية نديرلك شعرك

_حاجة سامبل برك دودو تعرفني نحب سامبل

_ههه ايه

هوما يشغلو دخلت ايمان باستهم وبدات تمشط حكمتلها شعرها في جيهة جات تهبل كوافير صغيرة و بحكم شعرها طويل خرجت عليها و زادتلها ماكياج خفيف 😍

_تبارك الله عليك تهبلي تهبلي (دلال)

_ههه يبارك فيك حبيبتي

كملت ايمان دارت بغوشينج و وجدت روحها لبست قفطانها و هبطت تعاونهم في التحضيرات الاخيرة ❤ منال قعدت في بيتها تخمم في حياتها لي رايحة تتبدل رايحة تعيش مع راجل متعرفوش😷 لي هو تاني حستو رايح يديها بسيف عليه 😥 هبطت دمعتها سمعت حس واحد طالع مسحتها بزربة و تبسمت 😊 ظهرت مايا بنت خالتها وفاء

_الله الله على عروستنا خموس عليك

_يسلمك مايا وشبيكم درك اعادا تجيو

_او حسام خرج صباح هذا وين جا

_ههه اوكي ليسونسيال وصلتبو قبل دار لعريس

_ههه وي

_مايا خايفة 😥

_لماه حبيبتي واش كاين

_حكاتلها واش قالها على ميهموش الحب و بلي قبل رضاية لوالديه و برودو في الهدرة

_عنقتها اايه اني قتلك طبيعتو هكاكا و لازم تفهميه هو راجل و اي واحد يحب يدي لي صوحبها و حبها و بعد زواجك نتي تجبدو ليك و قول مقالتش مايا

_منال تبسمت و قالت صح عند الحق

هوما يشغلو و يسمعو في تزمير و حس طكسيات وصلو منال قلبها دق بالقوي و سكتت و مايا هبطت تستقبلهم مع العايلة

وصلو دار لعريس 2 طكسيات😍 سعاد و يوسف و هبة و اسماء و مهدي و سامي و جداتو صفية (كبيره و واعرة و لسانها طويل كيما نقولو ههه 😂) حلت مريم الباب و بداو الزغاريت رعدو الحومة و من وجهم كامل فرحانين غير مهدي وجهو ميعبر على شي 😕 دخلو لصالو واسع الاثاث مضخم و luxe

يوسف:واش راكم ياك لاباس

محمد:لاباس حمد لله

جات مريم هازة بلاطو فيه الڨاطو بكل الانواع :تفضلو مرحبا بيكم نورتونا

سعاد:يزيد فضلك حبيبتي

يوسف :نتعرفو مليح باش تكون قعدة حلوة هذي مرتي و ام ولادي سعاد اشار لصفية و هذي امي الغاليه و هذي بنتي الكبيرة اسماء و الصغيرة هبة و هذا ولدي سامي و العريس ههه مهدي

محمد:الله يبارك ربي يفضلكم زاد عرفهم بالعايلة تاعو ( مريم .ريم و رمزي .وفاء و مايا و جدودها و ايمان ❤)

يوسف :حنا اليوم جيناكم بالحسب و النسب طالبين راغبين في بنت الحلال منال لولدنا مهدي

محمد:جيتكم عزيزة علينا حنا رانا قابلين و منلقاوش خير منكم راك في مقام خويا يا غالي 😘 و الكلمة اللخرة للعرسان

النسا ناضو يزغرتو فرحانين و مهدي مزال مكشخ خرت فيه سعاد (تاع اضحك و بركانا من لفضايح ) وقالت

_جيبولي عروستي نشوفها

_ايه بطبيعة ايمان تعيش بنتي هبطها (مريم)

طلعت ايمان عندها لقاتها قاعدة تتفرج و غايصة

_ضحكت حماتك تحب عليك يا عروسة ناس روعة يهبلو صبرتي و لقيتي يا ختي ههه

_ تبسمت و العريس !

_الحقيقة وجهو ميعبر على شي اما يهبل زين و عين

ڨدت ماكياجها وهبطو في دروج سعاد شافتها وقفت تزغرت منال حشمت راسها في الارض و خدودها حمارو كانت زي اميرة هابطة كثلة متاع زين 😍

_تبارك الله على عروستي مشاء اللّٰه خمس و خموس عليها و صلت سلمت عليها و تبسمت

_يعيشك طاطا

مهدي سمع صوتها لحنين طلع راسو انبهر في جمالها اما فيسع هبط راسو سلمت عليهم و كي وصلت ليه مدت يدها سلم عليها و تبسم 😊

سعاد:ارواحي بنتي اقعدي حدا حماتك

تبارك الله بوبية تهبل

قعدو يشغلو و منال عجبوها دارهم و خاصة امو و اختو هبة ياسر متواضعين جابولهم قهوة و زاد نطق يوسف

_نوليو لموضوعنا جيناكم طالبين بنتكم منال لوليدنا مهدي العايلات قابلين و بقات الكلمة اللخرة ليهم ❤

_مهدي طلع راسو شاف معاها و جها حمر سكت و قالهم انا قابل

_منال في لحظة حبت تقول لا منيش قابلة و تنهي هاذ الحكاية لكنها فاقت مع روحها شافت مع ايمان تبسمتلها حستها بالامان قالت قابلة بصوت هادي

سعاد ناضت باستها و تضحك

محمد:من ليوم الطفلة راهي بنتكم و نحبكم تخليوها معزة كيما كانت مع عايلتها ❤

_تهنى يا محمد راهي بنت خويا نحطها فوق راسي و في عينيا و كون مجيتش واثق في ولدي منديهالوش

_يعيشك خويا

سعاد شافت مع مهدي و غمزتلو فهمها حمحم و قال _عمي محمد تهنى على بنتك مدام راهي على ذمتي و على اسمي نحميها و واحد ما يوصل يڨيسها و لو بكلمة

يوسف فرح بولدو لي مخيبوش و قالت سعاد _لي تشرطوه رانا قابلين

_مريم : هذو يتفاهمو عليها العرسان حنا ما طالبين غير لهنا

_صفية: ايه و وكتاه العرس

_يوسف قال انا من جيهتي اذا قابلين غدوا العرس معنديش مشكل هههه

_سعاد:ههههه منال بنتي وكتاه تخلصي قرايتك

منال تشجعت و قالت _لعام هذا اللخر بصح حابة نكمل دوكتورا

_سعاد :ايه مالا في صيف نديرو العرس و كمل اقرا معنداش مشكل اذا تقبلو الحمد لله حنا عايلات لاباس بيهم و نقدرو نوجدو لعرس في 3 اشهر

_محمد : اذا قبلو العرسان انا قابل

_يوسف : مهدي وليدي واش رايك

_مهدي:لي تقلوه نتوما مبروك معنديش مشكل تكمل قرايتها بعد العرس

_منال : ساكتة

_شافت معاها مايا و طمنتها بعينيها

منال:معنديش مشكل

ناضو يزغرتو و تفاهمو يديرو فيونساي كبير يليق بيهم و يلبسو الخاتم و يسمعو الناس

_صفية نطقت : من حق مهدي يحكي مع مرتو وحدهم و لا متحبوش عليها😑

_مريم تنبزت : لا لا منال روحو للجاردان و احكيو وقف مهدي مشا ورا منال وصلو للكرسي قعدت قاتلو اتفضل قعد بقاو ساكتين و قالها

_تقدر توجد روحك في 3 اشهر

_منال تهدر و تشوف قدامها ايه نرمال

_نسكنو مع دارنا حتى توجد لفيلا لي نبني فيها

_ uii il n'y a pas un problem

_تقدر تخرج مع هبة اشري خاتم الخطبة و الحوايج على ذوقك

_تاهت منال تحكي في قلبها^^ كون عطى ربي تخرج معاه يخيروهم كيف كيف اما هو ممقيمهاش alors قررت ترجعلو النشعة ^^ قاتلو _ نن ميهمونيش اشريهم برك نتا و ناضت تمشي بالعقل و هو تقلق و ناض ماشي وراها دخلو قعدو شوية و روحو

وصل نهار الخطبة وجدو دار منال دارهم و فرشوها... منال شرات غوب ميني زرقاء اجيستي تهبل 😍... وكرات غوب باش تقص la tarte مبوطة ب سيرسو موv كلاغ 💗... ناضت بكري راحت مع ايمان و ريم للكوافاز بوكلات شعرها و حطتلها ماكياج خرجتها بوبية 💕

_خلصت بصحتك سعدو راجلك طاح في هاذ زين

_ههه وقفت شافت روحها تهبل هي جمالها طبيعي و متحطش ماكياج بزاف درك كي كترتلها ظهرت اجمل و اجمل 😍

جا رمزي يديهم

_بدا يتمسخر بيها 😂 ريم شكون هذي لي جبتيوها معاكم بوڨوصة خير من منال

_رمزي 😑

طرطق بالضحك قالها ياه صوتها كيفها

_ناضت تضحك و راحو للدار وصلو بدات مريم تزغرت

_الله يبارك بنتي صغرونة كبرت و رايحا تزوج و تفرغ عليا الدار

_منال باستها ربي يخليك تاج فوق راسي نتي و بابا 😘

طلعت لغرفتها عيطلها مهدي مريبونداتش فلول محبتش تهدر كانت مقلقة زاد عاود صلحت صوتها و ريبوندات

_وي

_واين كنتي 😒

_مسمعتوش 😑

_حنا مشينا من الدار درك قلهم بلي عيطتلك و كون يسقسيو متقلهمش بلي منهدروش في تيليفون

_منال ضاقتلها حكمت البكية قالت داكوغ و كوبات

ناضت لبست غوب دو شومبغ و هبطت لقات الغنا عالي و العايلة تاعهم لي فرحان و يشطح و لي حاسدها يشوف بنص عين و يكشخ حشمت منهم طلعت لبست جبة سامبل مطروزة و مع هي ضعيفة جاتها تهبل ❤ هبطت سلمت على لا فامي شطحت شوية و راحت عند مها

_ماما عيطلي مهدي قالي مشينا من الدار يعني قريب يوصلو

_هاه اطلع بنتي البس لاغوب و كيما يجيو يطلع مهدي يجيبك

_اوكي ماما باستها و طلعت تجري

لبست لاغوب و لبست ليبا fain شفاف و لبست طالون زرق كيما لاغوب جات تهبل و مغرية واتاها اللون مع رجليها لبيض 💕

وصلو طكسيات جاو لافامي تاعو بزاف دخلو كامل شطحو و زغرتو ابخي مهدي بعتوه يهبط منال طلعت معاه ريم توريلو البيت في الدروج كي وصلو قاتلو

_مهدي stp ندخل نهدر معاها و نخليكم

_ههه وي في راحتك نسيبتي

دخلت عندها باستها

_تهبل تهبل تهبل هاو مهدي حدا الباب انا نهبط و نتوما زيدو شوية و اهبطو 😇 متنساش تضحك هههه باي

خرجت قاتلو تفضل نسيبي زيدو شوية و اهبطو ضحك و دخل غرفتها تهبل كلش غوز و مرتبة و فيها ريحة تهبل ❤ يشوف فيها قاعدة فوق الفرش الضو ضارب في رجليها يلمعو و شعرها طويل هابط على اكتافها تبسم و قالها سلام

_و عليكم سلام

_ياك صافا

_وي حمد لله

_قالها جيتي شابة 😍 (مفهمش كيفاه خرجت الكلمة من فمو

اما هذا واش كان يدور في راسو)

_وجها حمار شافت معاه قاتلو يعيشك مام نتا

_ههه شبيك حشمتي مهدرت والو... هيا نهبطو

_اوكي هيا...خرجت هيا و هو وراها كي وصلو في لكولواغ قالها

_صح حنا مناش نحبو بعض و مش متفاهمين اما قدام العايلة لازم نبانو فرحانين 😶

_منال ساكتة مدلها يدو تبسمت كروشات يدها و بداو هابطين بلعقل كانو هابطين تقول امير مع اميرتو تبسيمة في وجوهم و الفاميلية كاملة منتبهة ليهم ياسر لايقين ببعضهم 💘 منال كي قربت منو و يدها في يدو تفكرت وليد...راسها تكبس و جاتها لبكية تقوات و اصطنعت التبسيمة 😸 وصلو سلمت عليهم جبدت سعاد الخاتم و وشوشتلو في وذنو تعيش ولدي اضحك و لبس الخاتم لعروستك و سلم على جبينها ❤ حكم يدها الصغرونة حسها ترعش ضحك و لبسلها الخاتم بداو يزغرتو زادت لبستلو هي و هبطه يشطحو كامل 😇 جات مريم عند مهدي و سعاد و قالت

_منال تبدل درك لا غوب لي تقصو بيها la tarte و بش يهبطها مهدي

_اه اطلع معها مهدي اسناها تلبس و اهبطو

طلعو دخلت هي لبست و معرفتش تقفل لا غوب حلت لباب مهدي حطها خلصت قالها هيا ... بقات تشوف معاه و ساكتة ... قالها وشبيك 😕... قاتلو عيطلي لايمان stp ...هو حار قالها درك نهبطو تلقاها ... قاتلو لالا لا غوب معر معرفتش نقفلها ... جاه الضحك على تبهليلها قالها دور و انا شبيني منعرفش😇 دارت هو حط يدو ذابت من الحشمة محبش يركز معاها c nn يهجم عليها ميطلقهاش 😂 قفلها و جاو هابطين منال خرجت عليها لاغوب و ضهرتها صغرونة 😍قصو لا طاغط و جابتلها سعاد parurre ذهب زادو شوية و روحو ✌منال حست روحها تاعبة دوشت و رقدت ممصدقاش بلي بعد اقل من 3 اشهر يكون عرسها و تروح تسكن مع ناس خلاف متعرفش طبايعهم و ناسهم و تخلي دارهم لي تربات فيها من صغرها 😷 منال كانت مدللة و متعلقة بزاف بعايلتها ❤ اما هذي هي الدنيا و هذي 

سنة الحياة

https://hikayattt.blogspot.com/

جاز شهر على خطبتهم مهدي جامي عيطلها و هي مخمتش مام پا تعيطلو 😑عايشة حياتها كيما كانت celibataire الخاتم تلبسو في اليمنى ههه و تروح تقرا فلا فاك موجدتش شورتها و تصديرتها كل ما تقلها مريم تقلها مزال الحال هذي ساهلة 😑 مريم هدرت مع ايمان قالتها اخرجو اشريو كلش وصل الويكاند جات ايمان نوضتها هبطو فطرو و مدتلها carte de credit و راحو دارت les magasain كامل شرات كلش pijama و قش تع لخرجا و صبابط و صاكات كملو عند كوسميكيت شرات روايح و شومبوا و ماكياج و صلت 12 راحو ريسطو عياو تغداو ارتاحو شوية و جاو مروحين

_مناااال

_اه ميمي وشبيك

_ناقصينك حوايج بزاف

_وي والله عييت غدوا نوليو

_اوكي بب

روحو طلعو رقدو ناضو 6 متاع لعشية بقاو يحكيو و جات صحبتهم سارة معاهم (مهدرناش عليها اما هدي تني حبيبتهم اما خوها ميحبش على الدخول و الخروج و كي حكاتلو على عرس منال يعرفها و حاسبها ختو خلاها تجي عندها )💗

_ممصدقاش بقا شهر و نتزوج 😷

_نرمال يا بنتي ناسك ناس ملاح و علكيف كي لعسل😂 (ايمان)

_هههه وي بصح مقلقني هو

_ازحي واش راحلك فيه هو يدير رايو و نتي دير رايك 😂 (سارة)

_ههههه والله صح نعرفوك قادرة على شقاك خليه يحبك و بعد عليه خليه يتعذب 😈 (ايمان )

_ههههه لي يقعد معاكم نتوما دخلوه للنار بالخطط تاوعكم 😂

هوما يحكيو يدخل رمزي سلم على ايمان و سارة

_ايمان صافا

_ههه لاباس

_و هذي شكون منعرفهاش بقا يشوف معاها عجبتو كلاها بعينيه

_هذي سارة صحبتنا ختو لي هاني

_اه سي بو عرفته معلبليش عندو ختو

ضحكت سارة و قاتلو متشرفين خويا 😇 مسكين ههه نشعتو 😂... حكمتهم منال يباتو معاها و صباح يكملو يشريو الحوايج ... هوما قاعدين عيطلها نيميرو هزت

_الو منال

_وي شكون معايا

_انا هبة اخت مهدي ههه

_اه هبة صافا

_حمد للاه نسألو عليك قالي مهدي منكلمهاش بزاف

_هي في قلبها تقول ميكلمنيش خلاص 😑 لاباس انا مع القضية او تعرف ههه

_اي ربي يعينك حبيبتي هاي ماما تحب تكلمك

_الو مساء الخير يا بنتي معليكش

_صافا طاطا و نتي

_حنا عايشين نحمدو ربي

_سبحانو 😇

_والله يا بنتي حبيت برك نسقسي عليك كاش ما حتجتي انا هنا قوليلي

_ربي يعيشك طاطا

_هيا يا بنتي سلملي على داركم و اتهلا في روحك 😍

راحو نعسو و صباح ناضو لبست منال غوب ميني بيضا فوق ركبة و اديداس بوغدو و صاك ا دو بوغدو طلقت شعرها و دارتلها سارة مكياج (بسيف قنعتها كي شافتها قلقانة قالتلها نعڨبو نهار برا ديفولي😇 ) خرجو راحو لي يبيع ملابس تقليدية شرات جبة ثقيلة و كراكو و قبايلي و ساري هندي (تصديرة جزائرية❤ )....جازو لريسطو كبير و مضخم قعدو في طابله جا serVeur

_مرحبا بيكم نورتو المطعم

_ايمان ضحكت الله ينورك

_واش نجيبلكم

_سارة شافت معاهم ليتحبو انا كيفكم

_3 plats variées avec des canettes stp ❤

_شاف مع ايمان قالها هذي ڨاورية 😕

_منال طرطقت بضحك نن جزائرية ابا عن جد 😂

_اممم مالا نطيرو فيها خرجة معاك 😈

_ههههه نن

_لماه 😒

_مخطوبة و قريب عرسي 😉

_بصحتو راجلك و راح جابلهم ماكلتهم كلاو خلصو و ركبو طكسي

منال:نروحو ولا مزال فكروني كاش ما نسيت مقادراش على خرجة خلاف

سارة: لالة مانو رايحة تزوج مشرات لا نويزاث لا سليب لا سوتيان 😂

ايمان:ههههه صح و تاني شريتي لي بيجاما كامل قصار و معريين و كون يجيوك ضياف لازملك جبات 😕

_هههه صح اول مرة عندكم الحق 😂

راحو كملو قضيتهم و روحت كل وحدة لدارهم ❤ وصات خوها شرالها les valises خبات قشها كامل و وجدت كلش------

خلصت منال عامها في لافاك مزال 20 يوم على عرسها كرات لا غوب بلونش و تفاهمو يديرو لعقد 😻 راحو للبلدية سنياو و ولات منال تحمل اسم مهدي 😶 روحت للدار شعور غريب ولات مرت راجل... تفاهمو يديرو عرس كبير مع بعضهم ...تعداو ليامات تجري مزال 3 ايام لعرسها لفاميلية جات بكلها و كامل فرحانين بيها 😍 هي ناعسة نوضها حس البورطابل num inconnu يعيط محبتش تهز كي بقا يانسيسثي هزت و بقات ساكتة تسمع في صوت تعرفو مليح و حافضتو ايه و كيفاه تنسى وليد عشرة سنين 😿 يقلها علاش يا منال خليتيني نتي مرتي بعدوك عليا...بطل معاه و نجي نخطبك كيما كنا نحلمو...و نعيشو احلى عيشة... ونجيبو ولادنا لؤي و نورسين ولا نسيتيهم 😓... كانت تسمع و دموعها تسيل تحرق في خدها حيرلها مواجعها 💔 كمل يهدر منال قولتيلي جامي نسمحو في بعضنا 😥تشجعت قوات صوتها و قاتلو وليد خنتيني غدرتيني و طعنتيني في ظهري 😔قالها هي رمات روحها عليا و انا كأي طفل غلبتني غريزتي اسمحلي منال نوليو كيما كنا و نفتحو صفحة جديدة ❤ مسحت دموعها و تقوات باش ميفيقش بلي تبكي و قاتلو C trop tard عرسي بعد 3 ايام راني على اسم راجلي يحبني و نحبو و فرحانة بعرسي (طاحت دمعة )انساني كيما نسيتك😔و مدابيك متزيدش تقلقني ميحبش راجلي كوبات و زادت بكات حتى وجعها راسها نعست مع صباح 😥 تبكي على وليد لي حطت روحها نساتو بصح تحيرو مواجعها كي هدرت معاه 😷 بكات على راجلها لي ما تحبوش و هو ملاتيش بيها 😓 استقوات على روحها و قررت تنحي وليد من راسها هي درك على اسم راجل لازم تحترمو 👌و مدام رايحة تعيش مع دارهم ناس ملاح مخايفاش

يامات قبل العرس عيطلها مهدي محبتش تهز اما مايا قنعتها... هزت

_وي

_صافا

_حمد لله

_كيفاه تحب la chambre a coucher

_دبر راسك

_ربك نتيا انا لي غالط نشاور فيك قتلك كيفاه تجاوبني !! 😡

_منال تفجعت :جيبها بيضا و كوبات

جات مايا حكاتلها

_نقنعلك شفتي كيفاه قلقتيه ههههه

_ههههه كون جيت قدامو يخبطني

------------------------------------------------------------

يوم العرس :

منال جات من لاكوافاز

_ مريم تزغرت و فرحانة محلا زين بنتي يا ربي 😍

_يعيشك ماما

_ربي يهنيك بنيتي اتهلاي في راجلك واحترميه و ديريلو واش يحب و حماتك و حموك عامليهم كيما والديك ❤ و اذا ظلموك كوني مظلومة خير من ظالمة و ربي يجيبلك حقك 😇

_وي ماما متقلقش تربيتك راني 😘 ماما محاباش نخليكم وبدات تبكي 😥

_عنقتها منال متخسريش لماكياج لا حنا بعاد... نجيوك و تجينا عيش بنتي اطلع ارتاح راو تتعبي مبعد

_وي ماما

طلعت منال زادت شوية جاو ايمان و سارة و مايا بقاو يشغلو حتى لعشوا... ريم طلعت

_منال هدا هو الوقت ابداي تصديرتك صالة معمرة بناس و كامل يسقسيو عليك

_سارة :ايه عندها لحق

ناضو لبسولها غوب سامبل شراتها par internet جاتها تهبل هبطت بزغاربت صحاباتها دارت على صالة و قعدت فوق le fautteille ... كاين فرحانين و كاين حاسدين ناضت عندها جارتهم نرجس تغير منها

_عسلامة منال مبروك عليك

_يبارك في عمرك لعقوبة ليك

_حبت تقلقها : راجلك مهدي ****

_وي

_اه هو لي كان مصوحب حبيبتي كان يموت عليها مبعد خلاها

_منال فاقتلها بلي تكذب خاطر معندهاش صحاباتها اكل يكرهوها :ايه او حكالي على لي صوحبهم كامل و ضحكتلها ضحكة صفرة

نرجس تنبزت و رجعت لبلاصتها 😂

عدا لوقت منال كملت تصديرتها جاو cortéGe تع دار لعريس طلعت لبست قفطان تعشاو و حناولها ❤ ... طلعت منال لبست لاغوب بلونش و بداو دموعها هابطين قواتها ايمان و طلع مهدي هبطها ...قعدو و جاو يبالركولهم جا اسلام انتيمها عنقها و باسها مهدي يكشخ 😑 قالها

_مبروك عليك منولة هاو تزوجتي و نتي تقلنا منتزوجش ههه مبروك عليك ختي

_يسلمك اسلام ربي يخليك

_مد يدو لمهدي مبروك عليك صاحبي

_يبارك فيك خويا ههه

_ههه اتهلالي في ختي برك

الجزء الثاني

الجزء الثالث و الاخير

رابط التحميل  الحكايه  PDF