الحلقه السابقه2 ...........الحلقه التالية 4 .......جميع الاحلقات
في احضان الموت الحلقة 3
سوار:منحبش هذاكا شي...و هذا شي اخر...و محكيناش فيه من قبل راهو باهي
بقيت نشوف معاها...اول مرة تحكي بالطريقة هاذي...اصلا صوتها ميتسمعش برشا...خذيت نفس...نطول في بالي معاها نحكي
انا:ياخي نورمال انتي...جرد تاتو صغير خوفك...مش تقرا طب و لا فاتني شي
سوار:شمدخل قرايتي في الوسط التاتو هذا مستحيل نحطو...اصلا شنوة هذاكا لمرسوم في يدك...مفهمت منو شي
انا:شيهمك فيه انتي...اسمعني باش تعملو خلينا نمشو
سوار:لا مستحيل
انا:باهي
حسيتها رتاحت...كيف قلتلها باهي...خذيت نفس...و خطفتها من يدها...دورتها عندي...حضنتها من تالي و كبست علاها..هزيت يدي لاخرى شديت يدها و كبست علاها نحكي
انا:اعمل لي قتلك عليه
سوار:سيبني فاش تعمل ياخي نورمال انت
انا:ششش اسكت...شوية وجيعة كهو و توفا
سوار:منحبش سيبني
كبست عليها اكثر...دوب ما قرب منها...حسيتها تكبست بين يديا...ثبت يدها اكثر...و نزلت نحكي في وذنها...شعرها لبوكلي و طويل...دغدغني في وجهي...بحكم كابس علاها منجمتش نبعدو
انا:ارخف روحك كهو...وجيعة صغيرة و باش توفا...اصلا انت تحملت اكثر منها...وجيعة هاذي ما جي شي قدام وجيعتك...كهو ارخف روحك...و حاول تتعدا الخوف...خاطر من اليوم باش تعيش فيه
حسيتها ترخفت شوية...قلبها يدق بالقاوي...نحس بيه يضرب في يدي...نفسها رزين عاللخر...طلعت راسي شوية...نشوف مع الراجل...لقيتو باش يكمل تاتو...دوب ما كملو...رخفت يدي علاها...ووخرت خطوة لتالي...نشوف معاها...متحركتش من بلاصتها جملة...تشوف مع يدها...محاولتش نركز معاها برشا...رجعت قربت منها...جبدتها من يدها...جريتها ورايا...و خرجت...لقيت زوز من رجالي لبرا...هزيتلهم براسي باش يدخلو...يعرفو خدمتهم...خاطر لعمل تاتو هذا...لازم ينساه جملة...صحيح مش باش نقتلو...اما شوية تهديد كافي باش ينساه جملة...قربت من الكرهبة...ركبتها و ركبت...طول الثنية و هي ساكتة..تشوف مع يدها...حسيت كلامي معاها دخلها في حيط...غزرتلها على جنب نحكي
انا:باش تبقى تحرق يومين...مبعد ترتاح
سوار:عندك حق...الوجيعة هاذي...ما جي شي قدام وجيعتي
سكت...وركزت مع الثنية...محبيتش نحكي اكثر...سمعتها كيف تنهدت تحكي
سوار:باش يبقى في يدي طول عمري
انا:لا وقت يوفا كلشي...تنجم تنحيه
سوار:علاش عملتو
انا:وفر اسئلتك...خاطر الوقت هو باش يجاوبك
سوار:باهي
تكات راسها لتالي...تشوف مع الثنية...هزيت تليفوني كلمت شكون...هز عليا...خذيت نفس نحكي
انا:كلشي حاضر
هو:بالطبيعة
انا:باهي مسافة طريق و نوصل
هو:متأكد متحبش تخرج من البلاد
انا:لا انت كهو اعمل لي قتلك عليه...المهم الكل يمشي في بالو لانا خرجت من البلاد جملة
هو:باهي طمن
سكرت عليه...و حطيت تليفون....دورت راسي نشوف معاها...نلقاها ديجا رقدت...خصلات شعرها تتعدا على وجهي...من الهوا لي داخل من شباك...حاطة يدها عالجرح...سكرت البلار من عندي...و هزيت يدي...بعد خصلات شعرها من وجها...تبسمت على جنب من منظرها...هزيت يدي عديتها على وجهي..و تلفت لثنية...زدت في الفيتاس...و كملت ثنيتي ...خاطر من اليوم باش تبدا مهمتي معاها...من اليوم و بعد 3 اشهر...هي باش تكون وحدة جديدة...عكس لي قاعدة بحذايا توا
سوار تحكي:
فقت على شدان فران قوي...فتحت عينيا بالسيف...نحس في راسي رزين عاللخر...حكيت عينيا...ورجعت شعري لتالي...نشوف فيه نزل...قربو منو تقريبا ست رجال...كل حد فيهم قد الحيط...الكل لابسين لبسة رسمية...عينيا وساعت...و انا نشوف فيه يحكي معاهم...الكل ساكت و يسمع فيه...للحظة حسيت بخوف..حطيت يدي على قلبي نهدي في روحي..توا فهمت لهو اقوى ببرشا من اللي ستخايلتو...و انو مهمتي باش تكون اصعب من حكا...من المنظر لقاعدة نضوف فيه...ظاهر انو هو شخصية مهمة برشا...اما شنوة خدمتو بالظبط...شكون هو زياد...السؤال هذا قاعد يدور في مخي من اول نهار شفتو فيه...فقت من سرحتي...كيف حد فيهم فتح باب الكرهبة...هزيت راسي غزرت لزياد...عملي براسو جاست انزل...خذيت نفس و نزلت...نشوف معاهم مبهمة...الحريقة لي في يدي نسيتها جملة...حاسة بوجيعة في كرشي...نتنفس بالسيف...قربت منو...وقفت قدامو...نشوف في واحد منهم هاز الفاليز متاعي ندرا وين...تلفتلي زياد يحكي
زياد:حاضرة باش نمشو
انا:ح حاضرة
نشوف في حد فيهم...سبقنا يجري...و رجال الباقيين بعدو على طريقو...بقا يمشي و انا وراه...عينيا وساعت...و انا نشوف في طيارة صغيرة...مش كبيرة برشا...صوتها قوي عاللخر...ما فهمت شي...تسمع اللي بحذاك بالسيف...الهوا اللي قاعد يجي منها تحسو باش يطيرك...غزرلي زياد يحكي
زياد:هيا فيسع باش نمشو
انا:باش نطلعو فيها
زياد:ياخي معندكش اسئلة مهمة في حياتك انتي
انا:لا تو مع الوقت نتعلمهم منك
زياد:امشي برك
خذيت نفس و قربت من طيارة...خالط عليا هو...عاوني واحد من رجالو طلعت...و طلع ورايا...حسيت بيها بدات تمشي...قلبي دق بالقاوي...منعرفش كيف قربت منو عاللخر...دورت يديا زوز على يدو...و كبست عليه...نزل راسو يشوف معايا...غزرت لعينيه نحكي
انا:شنوة زادة
زياد:شي
انا:اول مرة نركبها على هذاكا خايفة
زياد:باش تتعود مع الوقت
انا:باهي
سكرت عينيا بالقاوي...كيف حسيت بيها باش طير...كبشت فيه عاللخر...و غرست راسي في كتفو...و هو متحركش من بلاصتو جملة...حتى كلمة ما خرجت منو...جبدت راسي شوية...طلعت من البلار...عينيا وساعت...البلاد الكل تشوفها من الفوق...و لا مرة ستخايلت اني نوصل نشوف المنظر هذا...للحظة حسيت الخوف لداخلي الكل وفا...بمجرد طلعت من البلار...مبقيناش برشا و حسيت بيها تنزل...رجعت كبشت فيه...نزلنا في بلاصة اخرى...ظاهر مخرجناش من تونس جملة...اما شنوة اللي خلاه يستعمل طيارة خاصة...مع انو ينجم يمشي بالكرهبة
بعد عليه كيف حطت عالارض...جبد روحو نزل...و عاوني نزلت...نزل الفاليز...حطها قدامي...شديتها في يدي و خالطت عليه...نشوف في كرهبة اخرى مراكية...ياخي منين قاعد يجيب فيهم هذا...ظاهر مزال ما شفت شي...خذيت نفس...و قربت منو.. حطيت الفاليز من تالي...وركبت بحذاه...بقبت طول الثنية ساكتة...منحب نسألو حتى شي...حطيت يدي على كرشي جعت برشا زح...من صباح ما كليت شي...نزلت عيني نشوف مع الجرح في يدي...لتوا مفهمتش شنوة هذا مش ظاهر برشا...حسيتو كي راكا الكرهبة...و تلفتلي يحكي
زياد:اانزل
حليت باب الكرهبة و نزلت...من غير ما نقول كلمة...طلعت راسي نشوف مع الفيلا...لي في وسط غابة...بالحق تحسها غابة...خاطر مفما كان هاذي دار في وسطها...و شجر بعاد عالدار شوية...البلاصة ياسر مزيانة...ياسر كالم...زعمة علاش جينا هوني...و شباش نعملو...الف سؤال قاعد يدور في مخي...حسيت بيه كان كي قرب يحل في الباب...دوب ما حلها...قربت منو دخلت بلا ما ناخو منو اشارة...حتى من الفاليز نسيتها جملة...دخل ورايا و سكر الباب...بقيت نشوف مع دار...زح مضخمها...و محلاها...كلشي مرتب فيها...نسمع فيه يحكي ورايا
زياد:من اليوم باش نبقاو هوني
تلفت عندو نشوف معاه...رجعت شعري لتالي نحكي
انا:قصدك 3 اشهر
زياد:ممم
انا:شباش نعملو هوني الفترة هاذي الكل
زياد:مبعد تعرف...توا برا اختار البيت لتعجبك و ارتاح فيها
انا:باهي اما
زياد:اما شنوة
انا:جعت
زياد:برا للكوجينة تلقا كلشي تحب عليه
انا:باهي مرسي
خليتو و مشيت نفركس عالكوجينة...دوب ما دخلت مشيت للفريجيدار...زح هذا امتى لحق يعبيه...حطيت القضية عالطاولة...نشوف معاها...مشا في بالي نعمل عجة حارة...قداش شاهيتها العجة متاع امي...بديت نحضر فيها و دمعة هربت مني...مسحتها بكف يدي و كملت..دوب ما حضرت حطيتها عالطاولة...و قعدت ناكول...و نشوف مع الكوجينة...زادة محلاها...دار هاذي تشوفها كان في الافلام...قص عليا تفكيري كيف دخل للكوجينة...غزر فيا...و مشا للفريجيدار...جبد دبوزة ما..شرب منها كي عادتو...و حطها عالطاولة...بقا يفركس ندرا على شنوة..خذيت نفس نحكي
انا:زياد
زياد:ممم شتحب
انا:متحبش تاكول ياخي
زياد:لا
انا:على راحتك...انا باش نمشي نرقد
زياد:باهي
هزيت روحي..غسلت صحني...و غطيت العجة لي بقات...و جيت خارجة وقفني يحكي
زياد:استنى
انا:ممم
زياد:باش تلقا كيس عالطاولة...فيه دواك و بوماد للجرح
انا:باهي عيشك
زياد:شي اخر
انا:شنوة
زياد:كان حسيت بوجيعة و لا اي مضاعفات خبرني...مهم برشا راهو
انا:طمن مليحة...كيما زادة نعرف روحي لي انا ارتحت برشا..تقلقش روحك
زياد:باهي
انا:بونوي
زياد:بونوي
خليتو و خرجت من الكوجينة...مشيت لصالة هزيت دوا...بقيت نثبت فيها شوية...و خرجت...هزيت روحي و طلعت دروج...دوب ما وصلت عارضتني اكثر من بيت...رجعت شعري لتالي...نشوف في اخر بيت...منعرفش كيف مشيت ليها...دوب ما حليتها...ريحتو دخلت لخشمي...رجعت سكرتها...عرفتها بيتو...وخرت لتالي...اخترت البيت لي بحذاها...بحكم لبيوت لاخرين بعاد علاها...رغم اني نحاول نتغلب على خوفي...اما شي اقوى مني...رغم اني كرهت رجال الكل...اما هو بءات مش خايفة منو...افكاري دخلت بعضها...فتحت الباب و دخلت...شعلت ضو...بيت محلاها...ديكورها سامبل...حطيت الكيس و دبوزة الما..عالتابل دونوي...شربت دويا...حطيت البوماد عالجرح...ييي قداش يحرق...جيت باش نبدل دبشي...ذكرت لفاليز لي نسيتها في الكرهبة...ضربت بيدي على راسي...عجزت ننزل لوطة...اصلا نحس في روحي تاعبة عاللخر...كلشي نحب عليه...نرقد و كهو...نحيت كونفارسي...و قربت من سرير...ترميت على كرشي...حضنت المخدة...و غطست في نوم..معادش عندي جهد باش نخمم في حتى شي...كهو نحب نرقد و نهرب من كلشي...نهرب من الواقع..من الوحش اللي محبش يخرج من مخي...من بابا...من زياد...لي ما نعرف عليه شي كان اسمو...و اهم شي نهرب من روحي...نرجع للماضي متاعي...و ننسا روحي غادي
زياد يحكي:
اول ما خرجت...رجعت نفركس في الفريجيدار...جعت عاللخر...و زادة فاد عاللخر مش حاب نطيب شي...جات عيني عالعجة...حكيت لحيتي...و قربت منها نحيت علاها الغطة...و ذقت منها شوية...والله بالحق طلعت بنينة كسما متاع عزيزة...حطيتها عالطاولة...و نزلت علاها بالخبز...زح حتى مني توحشت ماكلة عزيزة شباش يصبرني علاها 3 اشهر كاملين...مع اني مخرجتش من تونس اما نحس في روحي بعيد عليهم...و سبب لي خلاني نختار طيارة...باش سوار متعرفش انو بلاصة هي..هكا باش نكونو زوز في امان اكثر...دوب ما كملت...هزيت روحي و طلعت الفوق...نشوف في باب بيتها مفتوح شطر...كملت حليتو...نشوف فيها راقدة على كرشها...و شعرها مغطي وجها الكل...خرجت سكرت الباب..و دخلت لبيتي...نحست مريولي...و ترميت عالسرير...غميت على راسي و رقدت
فقت الصباح...على تليفوني ينوقز...هزيت روحي بالسيف نشوف معاه...لقيتها ميرال...نفخت ورجعت غميت على راسي...كيف لقيتها جولت هزيت علاها نحكي
انا:شتحب عالصباح ¤¤¤
ميرال:توحشتك
انا:بربي ميرال تكلم فيا عالصباح باش تقولي الكلام هذا
ميرال:شفاها ياخي متوحشتنيش انت
انا:ميرال فك عليا و هات من اللخر شتحب
ميرال:وين غاطس ياخي
انا:اسمعني هاني باش نخبرك من توا
ميرال:شفما
انا:اليوم باش نسافر و باش نبقى اكثر من شهرين لبرا...ووقت نرجع باش يكون حاجتي بيك في حاجة
ميرال:كيف باش نجم من غيرك شهورة هذوما الكل
انا:تنجم تنجم باي
ميرال:زياد
انا:اشكي
ميرال:نحبك
انا:باهي
سكرت علاها...ورميت التليفون على جنب...هزيت روحي دخلت لبيت البانو...عملت دوش...و خرجت بدلت دبشي...هزيت تليفوني...كلمت واحد من رجالي...وصيتو على حاجات...و خرجت من البيت...تعديت على بيتها...نسمع في صوتها تصيح...استغربت...حليت الباب و دخلت...قربت منها...نشوف معاها...مكبشة بيديها عالسرير...في فمها مام كلمة سيبني...تصب بالعرق...عرفتها قاعدة تحلم...قربت منها عاللخر قعدت بحذاها على طرف السرير...هزيت يدي متردد...حطيتها على راسها نحكي
انا:سوار سوار فيق
تحركت شوية...وحلت عينيها فرد مرة...و نطرت من بلاصتها...جات في حملتي...حطيت يدي على زندها نحكي
انا:حلمة كهو ارتاح
سوار؛م منجمتش ننسا...مستحيل نجم
انا:باش تنسى مع الوقت
سوار:منجمش تاعبة عاللخر
انا:باهي شرايك توا تقوم تاخو دوش باش تتفرهد
سوار؛باهي
جبدت روحي منها وقفت...وقفت في جرتي...تبسمتلها شطر تبسيمة...و تلفت باش نمشي...وقفتني تحكي
سوار:زياد
انا:شنوة
سوار:ميسالش جيبلي فاليز متاعي
انا:باهي
سوار:مرسي
خرجت و خليتها...نزلت اللوطة...جبدت الفاليز من الكرهبة...حطيتها عالارض...نشوف في كرهبة اخرى ركات قدامي..عرفتو من رجالي...نزل و قرب مني حط تليفون جديد في يدي...غزرتلو نحكي
انا:متأكد لهو مش مراقب
هو:طمن مسيو متأكد
انا:و الحاجات الاخرى لوصيتكم عليهم
هو:في الكرهبة
انا:باهي برا حطهم في الجنينة لورا دار و امشي
هو:باهي
هزيت الفاليز و دخلت...سكرت تليفوني...و شعلت تليفون جديد...منحب حتى حد يشك لانا في تونس...نشوف فيها نازلة...عرفتها تحب على فاليز...قربت حطيتها قدامها نحكي
انا:ارتاح اليوم...و ما تفكر في شي
سوار:باهي عيشك
هزت الفاليز...و طلعت...حسيتها تاعبة عاللخر...نعرف لي نفسيتها تاعبة...و تفكيرها بعيد...على هذاكا منحبش نظغط علاها اليوم...نحبها ترتاح عاللخر...دخلت للكوجينة...هزيت دبوزة ما صغيرة...و خرجت...نجري و افكاري بعيدة...حالة سوار رجعتني سنين لتالي...نحس في مخي باش يطرشق...وقفت في نص الغابة...شربت الما فرد مرة...اصوات قوات في وذني
"اممممي لاا امان فيق"..."زياد يا روحي ولدي الغالي"..."زياد انا و انت خاوة و شي ما يفرقنا في دنيا"..."ادم امي قالت شدو بعضكم كي تقصو الكياس"..."باهي خويا الغالي"
الماضي الكل يتعاود في مخي..كبست بيديا زوز على راسي...كملت رميت لي بقا على وجهي...نحب ننسى...نحب نفيق و كهو...حليت عينيا...نشوف مع شجر... صحيح حد ما ينجن ينسى لي صار...اما ينجم يتعايش معاه..ظو انا عايش لاكا نهار بالظبط...لتوا ما خذيت حقي كامل...الا ما نوصل لي نحب عليه...و نخلي الكل تحت يدي...اصلا في دنيا ما يهمني حد كان خويا الغالي...و بابا...و بعدهم عزيزة لي رباتنا...خذيت نفس..ورجع لدار
سوار تحكي:
عملت دوش و بدلت دبشي...نزلت لوطة عرفتو خرج...نحس في راسي باش يطرشق من الوجيعة...الاحلام هذيكا ياسر رجعت تقلقني...حتى كيف نفيق...تبقى مسيطرة عليا النهار الكل...سخنت حليب حطيتو عالطاولة...نشرب معاه و تفكيري بعيد...المفروض توا عطلة...نعديها بحذا امي و عماد...نتفرج في مسلسل العادة...نحلم في احلام بريئة...مش قاعدة هوني...مع راجل منعرف عليه شي...كان هو شخصية مهمة كهو...و حاجتو بيا في خدمتو اللي ما نعرف علاها شي...كملت حليبي...و قمت من الطاولة...باش نغسل كاسي جات عيني على العجة...ظاهر كلاها البارح...تبسمت هلى جنب...الجوع يعمل...كملت غسلت الباقي...و طلعت لبيتي...ركحت الدبش في القارد روب...خاطر ظاهر مطولين هوني...عديت نهار الكل الفوق...حتى وقت نزلت نتعشى...حضرت مقرونة...كليت وحدي...و خليت منها بلكشي يحب ياكول...و جيت طالعة لبيتي..وقفني يحكي
زياد:ارتحت
انا:ايه عيشك
زياد:من غدوة نحبك حاضرة
انا:باهي
زياد:هيا برا ترقد توا متسهرش برشا باش تفيق بكري
انا:باهي ليلة سعيدة
زياد:و انت اسعد
تلفت و كملت طلعت لبيتي...شربت دوايا...بدلت دبشي و ترميت عالسرير...منعرفش شنوة اللي باش نعملوه غدوة...محاولتش نركز برشا...سكرت عينيا....و استسلمت لنوم...اصلا كان باش نفكر ما نجم نوصل لشي...عالاقل توا نرتاح شوية...و نحاول نستانس بالوضع الجديد و حياتي الجديدة
فقت الصباح...على صوت قوي...حليت عينيا بالسيف...نشوف فيه واقف قدامي...لابس شورت و فاست سبور...سكر منبه متاع تليفون كي شافني حليت عينيا يحكي
زياد:15 دقيقة تحضر فيها روحك فيسع
انا:شننووة قداش سلعة ياخي...طلع تراه نهار مزال مطلعش
زياد؛راهي 4 متاع صباح
انا:شباش نعملو توا ياخي
زياد:قوم البس دبش سبور و خالط عليا...تو تعرف وحدك
انا:باهي
اول ما تلفت...رجعت ترميت عالسرير...نعسانة عاللخر..نسمع فيه يحكي بلا ما يتلفت
زياد:15 دقيقة...تتأخر دقيقة نعاقبك علاها
انا:باهي باهي هاني قمت
.اول ما خرج...هزيت روحي بالسيف لبيت البانو...غسلت وجهي بالزربة...ورجعت للقارد روب...نفركس على دبش سبور...عين مفتوحة و عين مغمضة...لين لقيت سيرفاتمون في الاكحل...لبستها...و لميت شعري ذيل حصان...و نزلت عندو لوطة...لقيتو واقف بحذا الباب...شاد في يدو دبوزة ما صغيرة...غزرلي يحكي
زياد:دقيقتين روتار اخر مرة
انا:باهي اما وين ماشيين
زياد:نجرو
انا:نجررووو ؟ تي ساعة مزالت 4...شرايك نخلو نهار يطلع
زياد:دقيقة اخرى...نخليك تعمل دورتين زيادة
انا:باهي
فتح الباب و خرج...تأففت و خالطت عليه.. لقيتو ديجا بدا يجري...بقيت نشوف معاه...صوتو لقوي خلاني نتهز
زياد؛خف روحك
خالطت عليه نجري وراه...منعرفش قداش بقينا نجرو ساعة و لا اكثر...زح الغابة هذيكا جريناها الكل...حسيت روحي باش نتهد...وقفت...و طبست شديت ركابيا زوز بيدي...نرجع في نفس بالسيف...نسمع فيه يحكي
زياد؛شد هاذي
طلعت راسي نشوف معاه...رمالي دبوزة الما في يدي...لقفتها عليه.. وقعدت عالارض...شربت منها فرد مرة...اول مرة نجري بالطريقة هاذي...قرب مني...عطاني يدو فهمتو يحبني نقوم...سكرت دبوزة الما...و حطيت يدي في يدو...جبدني عندو...ضربت في صدرو...وخرت لتالي...غزرلي يحكي
زياد:لباس توا
انا:ايه
زياد:لازم تتعود خاطر ديما باش تفيق الوقت هذا
انا:قصدك كل يوم باش نفيق على 4
زياد:مممم
انا:علاش نحضر باش ندخل لحرب ياخي
قحرلي...سكت عرفت روحي كثرتلها...عدا يدو على شعرو يحكي
زياد؛3 حاجات نحبك تحفظهم و تنفذهم
انا؛باهي
زياد:اولهم معادش تسأل برشا...خاطرني من عند ربي نفد منهم الاسئلة هذوما...و ثانيا تفيق كل يوم الوقت هذا من غير ما تتذمر..و ثالثا لازم تكون خفيفة على هكا ببرشا...خاطر كان باش تبقى هكا ترصالي معاك اكثر من 3 اشهر
انا:اما علاش هذوما الكل
بقا يشوف معايا...عرفت روحي رجعت سألتو.. هزيت يدي حطيتها على فمي...و هزيتلو بكتافي...نفخ و تلفت باش يمشي...وقفتو نحكي
انا:جاوبني
رجع تلفت عندي...و هزني من فوق للوطة...شبكت يديا نحكي
انا:صدقني نحس في روحي ضايعة...نحب نعرف وين انا بالظبط...و شمدخل الجري و الحاجات هذوما في الخدمة لي قلت علاها انت...داخلة في حيط راني
قرب مني عاللخر...وقف قدامي...جا راسي في صدرو...نزل عليا شوية...يحكي في وذني
زياد؛اولا انت باش تبني شخصية جديدة...ستيلك...كلامك...مشيتك...و برشا حاجات اخرى...اما هذا الكل باش يصرا..بعد ما تبني قوتك...خاطرك باش تقابل عباد و تظطر تتعامل معاهم وحدك...وقت نبدا مش معاك
انا:ش شمعنى نتعامل معاهم
وخر لتالي...تبسم على جنب و كمل يحكي
زياد:بعد 3 اشهر تاخو الجواب هذا
انا:و انت شنوة خدمتك
قحرلي...نفخت...زح كان منسألش نطرشق...تلفت يحكي
زياد:خف روحك...عندنا ما نعملو
انا:باهي
كمل يجري...خالطت وراه...موقفش لين وصلنا لدار...دوب ما دخلنا...ترميت عالارض...نرجع في نفس بالسيف...نسمع فيه يحكي
زياد:فيسع اعمل دوش و انزل تاكول شي
انا:تعبت معادش نجم
زياد:قوم و لا نرصيلك في دورة اخرى
هزيت روحي وقفت...طلعت دروج بالسيف...دوب ما دخلت لبيتي...نحيت دبشي و عملت دوش سخون...لبست الكاب و خرجت طلعت لساعة...نلقاها 6 متاع صباح...زح نعسانة عاللخر...منين طلعلي بموضوع الجري توا...بقيت...نشوف مع سرير...نحب نرقد و كهو...هزيت روحي..ترميت عليه بالكاب...منجمتش حتى نبدل...تي دوب ما سكرت عينيا هزني نوم
زياد يحكي:
دخلت للكوجينة...جبدت دبوزة حليب شربت منها...و خرجت لصالة...طلعت لمنقالتي نلقاها فاتت 6...عرفتها طولت هزيت روحي..طلعت عندها...فتحت الباب و دخلت..نشوف فيها راقدة على كرشها بالكاب...شعرها مبلول غم علاها...جاب ربي الكاب طويل شوية...مكانش كنت باش نشوف كلشي...عديت يدي على وجهي...و تلفت باش نخرج...محبيتش نفيقها...نعرف مش مستانسة بالفيقة هاذي...مشيت لبيتي...عملت دوش...بدلت دبشي...هزيت البيسي...و تليفوني و نزلت لوطة...خليتهم في صالة...و مشيت نحضر فطور خفيف..خاطر الوقت ضيق برشا
دوب ما كملت الطاولة...حسيت بيها داخلة...تلفت نشوف معاها...حسيتها تفجعت...خاطر دخلت من غير حس...لابسة روب في الباج عند ركبة...شعرها مزال مبلول طايح على كتافها...غزرتلها نحكي
انا:علاش طولت
سوار؛اه رقدت شوية كهو
انا:باهي ايجا تفطر عندنا ما نعملو
سوار:باش نجرو
انا:لا شي اهم...افطر توا مبعد نحكو
سوار:باهي
.بقينا نفطرو عالساكت...طلعت راسي نشوف معاها...تاكول شوية...و طلع قصتها لي طايحة على وجها بيدها كل مرة تهبط فيها...ظاهر قلقتها...خاصة كيف شعرها مبلول...منعرفش كيف تبسمت...عجبتني الفازة...اصلا اول مرة نركز مع طفلة هكا...هزيت يدي على شعري و كملت ناكول...اول ما كملت غزرتلها نحكي
انا:كان كملت خالط عليا
سوار:باهي
هزيت روحي...مشيت لصالة...ترميت عالفوتاي...حليت البيسي...نشوف فيها داخلة...قعدت مقابلتني...هزيت يدي حطيتها عالفوتاي قدامي نحكي
انا:ايجا هوني
هزت روحها و قربت مني...قعدت قدامي...غزرتلها نحكي
انا:استخدمت بيسي من قبل
سوار:ممم شوية وقت نستعمل متاع صحبتي
انا: باهي هوكا باش نعلمك فيه كلشي توا...و نحبك تستخدمو كل يوم
سوار:علاش
انا:خاطر باش تحتاجو في خدمتك برشا
سوار:باهي
انا:اهم شي تعرف كي تنقل اي شي من بيسي لفلاشة و من فلاشة للبيسي...من غير ما تخلي حتى دليل
سوار:اي شي كيف شنوة
انا:فيديو...صور...دوسيات...كل شي يطيح في يدك باش تنقلو للبيسي و لا تابلات..و لا تليفون...مداما اهم شي تعمل هذا الكل في سر...كيف و امتى...تعرفو في وقتو...خاطر نعرفك مزال باش تسأل
سوار:باهي باش نبداو ملا
انا:باهي
عدينا اكثر من 3 ساعات عالبيسي...علمتها على كلشي...زادة راسها خفيف عاللخر...متعبتنيش برشا...كل شي حكماتو عالطاير...حطيت البيسي في يدها...و تكيت راسي لتالي...غزرتلي تحكي
سوار:نجم نقوم توا
انا:وين
سوار:جعت باش نمشي نحضر شي و نرجع
انا:باهي
هزت روحها قامت...و انا هزيت تليفوني كلمت واحد من رجالي...هز عليا يحكي
هو:تفضل مسيو
انا:حضرت لخبرتك عليه
هو:بالطبيعة...المعلومات لي تحبها الكل في CD
انا؛باهي حاجتي بيه في اقرب وقت
هو:باهي طمن
انا:شي اخر
هو؛تفضل
انا:حاجتي بسلاح
هو:اما نوع
انا:كي العادة...اما نحب واحد منهم يكون خاص بتدريب
هو؛باهي
علقت عليه...و هزيت روحي وقفت...ريحة المقرونة...وصلت لخشمي...عديت يدي على شعري...حتى انا زح جعت برشا...مشيت للكوجينة...لقيتها مزالت واقفة تحضر...جبدت كرسي قعدت عليه...تلفتتلي و شهقت تحكي
سوار:كيف دخلت لهوني
انا:من الباب
سوار:نعرف من الباب اما انا محسيتش بيك
انا:هاذي قاعدة جديدة لازمك تتعلمها...اهم شي تكون خفيفة و فرد وقت هادية
سوار:مستحيل نوصل نكون هكا
انا:باش توصل...انت كهو ركز معايا
سوار:غدوة زادة باش نفيق 4 متاع صباح
انا:ممم
سوار؛ميسالش تخليها 5 والله ما نجم
انا:ارقد بكري تنجم تفيق
سوار:باهي سؤال اخر
انا:شنوة
سوار؛انت مرة قتلي باش تقابل برشا شخصيات محلمتش اني نشوفهم في حياتي
انا:اممم
سوار؛و انت قصدك المعلومات اللي باش ناخوذها راح تكون منهم...على هذاكا باش نقابلهم
تبسمت على جنب...و تكيت لتالي نحكي
انا:برافو...اول مرة تفكيرك يطلع صحيح
سوار:باهي اما
انا:اما شنوة
سوار:ملا علاش قتلي باش تستعمل سلاح و تدريب و ندرا شنوة
انا:خاطر مرات باش تظطر تتعامل وحدك...و اي شخص يهدد حياتك تقتلو بيدك
فلتت صحن من يدها...تغزرلي مصدومة...حسيت بيها كيف كانت ترعش...هزيت روحي...قربت منها...وقفت قدامها بالظبط...حطيت يدي على يدها...حسيتها جمدت في بلاصتها...عقدت حواجبي نحكي
انا:شبيك
سوار؛ت تحكي صح انت
انا:اصلا كل كلمة نقولها صحيحة...مفماش تفدليك في الخدمة
سوار:م منحب نقتل حد...منحبش نشد سلاح جملة
انا:ششش ريض...مش لازم تقتل اما تنجم تهدد...كيما مش كل ضربة تقتل باهي
سوار:ب باهي كان هكا
انا:باهي ارتاح توا...و متفكر في شي...خاطر وقت تنحي الخوف هذا...وقتها كهو..معاد يهمك شي
سوار؛باهي
انا:مزال برشا عالفطور
سوار؛باش تفطر معايا
انا:مممم معنديش حل اخر
سوار:باهي تو نحطو
انا:باهي
وخرت لتالي...ورجعت قعد عالطاولة...نشوف معاها كيف تحط في الماكلة و تفكيرها بعيد عاللخر...حسيتها تكونسات...من كلامي...نعرف لهو صعيب...نعرف روحي صدمتها...خاصة طفلة كيفها...اما في الدومان هذا يا قاتل يا مقتول...و مستحيل حد ضعيف ينجم يعيش معاهم نهار واحد
سوار تحكي:
منعرفش كيف حطيت الاكل عالطاولة...حسيت بوجيعة في كرشي...و راسي باش يطرشق...من كلامو...متوقعتش لهو يوصل يقتل...و لا يفكر يخليني نقتل كيفو...قعدت مقابلاتو...بعد ما كنت جيعانة...ما نجمت ناكول شي...بقيت نشوف فيه ياكول...و تفكيري بعيد...حطيت يدي على كرشي نهدي في روحي...نحاول ناخو نفس منظم...بقيت نتغوصر طلع راسو يشوف معايا يحكي
زياد:شبيك لباس
انا:مممم
زياد:كول
انا:لا نحب نمشي
زياد:باهي
هزيت روحي وقفت...نشوف فيه خيال قدامي...تركزت بيديا عالطاولة...نحس في روحي باش نطيح...خذيت نفس...و جيت باش نمشي...اما حسيت لساقيا رخفو...و معادش يحملوني...نحس كان بيد قوية...لقفتني من ظهري..جيت في حملتو...هزني بين يديه لصالة...حطني عالفوتاي...صحيح حالة عينيا...اما نشوف في كلشي بعيد نسمع في يحكي
زياد:سوار فيق تسمع فيا
بقا يفيق فيا...هز دبوزة الما...رشني على وجهي...و شربني منها...ورجع حطها...حسيت روحي تفرهدت شوية...بقا قاعد عالطاولة مقابلني...شاد يدي في يدو يحكي
زياد:لباس
انا:مممم
زياد:اسمعني هوني مستحيل نلقا طبيب...و زادة منجم نطلب حتى طبيب هوني...خاطر باش يكون خطر علينا زوز...على هءاكا كان تحب نهزك انا
انا:ل لا نحب نرقد كهو
زياد:متأكدة
انا:مممم
زياد:باهي اتسطح هوني
انا:باهي
عاوني تسطحت لتالي...ضميت ساقيا اكثر...باش منتعراش...حطيت يدي تحت راسي...حسيت بيه كي قام...سكرت عينيا و نزلت مني دمعة..تغلغلت داخل شعري...نحس في قلبي باش ياقف...نحس روحي قاعدة ندور في دوامة كبيرة...و لا مرة توقعت اني نطيح في موقف كيف هكا...اني نكون قاتلة...حاولت نهدي روحي...هزيت يدي حطيتها على الشركة لي في رقبتي...رغم كلشي صرا اما متنحاتش من رقبتي...رغم اكا الكلب...نهش لحمي الكل...اما الشركة متنحاتش...قوتو مكفاتش باش ينحي الشركة لحطتهالي امي وقت كنت صغيرة...قالت لهي باش تحميني...اكا نياتها امي...حتى من عماد حطتلو وحدة...كبست علاها اكثر...ناخو في قوتي منها...هي كهو لبقات من ريحة امي...و هي كهو لي تعطيني قوة باش نجم نكمل لي بديت فيه...زياد قال اهم شي اني نتخلص من خوفي...اهم شي معادش نخاف...اما نسا يقول اهم شي...انو الواحد ميكونش عندو قلب و ما يحس بحتى شي...اصلا عندو حق...انا حياتي دمرت بالكل...خسرت اهلي...قرايتي...حياتي...من شنوة باش نخاف اكثر...و علاش باش نخاف...باش نرجع نعيش لعشتو مستحيل...مستحيل نسمحلو و لا نسمح لغيرو يغيشني نفس الكابوس...و كان يبقا اخر حد في دنيا باش ناخو حقي منو...اصلا كرهي ليه...يفوق كلشي في دنيا...و كيما اغتصبني و استغل ضعفي...و جبرني على حياة جديدة...هو لباش يكون قوتي المرة هاذي...القوة لباش دمرو...و تخليه يضعف قدامي...وقتها كهو باش نرتاح...حتى الموت وقتها مش باش تخوفني جملة...بعد حرب الافكار لي دخلت فيها...هزني نوم...و رقدت
زياد يحكي:
طلعت بزربة هزيت غطا في يدي و نزلت...خاطر دار باردة بطبيعتها...اول ما وصلت لصالة...لقيتها ديجا رقدت...حطيت الغطا علاها...و قعدت على طرف الطاولة...نشوف مع وجها...شطر شعرها طايح عليه...جات عيني على يدها...مكبشة على شركة في رقبتها...نعرف لهي صغيرة...نعرف لقاعدة تعدي فيه توا اكبر منها ببرشا...اما ظروفها حطتها في ثنيتي...و ظروفي هزوني ليها...خذيت نفس و هزيت روحي للكوجينة...نشوف مع طاولة...طلعت صنافة...و هي جرد فرخة...لميت طاولة...خرجت للكرهبة...هزيت الحاجات لبقاو...و مشيت لبيت جاية لوطة...حطيت كلشي عالطاولة...هزيت تصاور الكل لي غادي لصقتهم عالحيط...كلهم لاهم الشخصيات لي في البلاد و لي برا البلاد...سكرت عينيا ورجعت فتحتهم كيف لصقت اخر صورة...هزيت الجرائد في يدي...فما لي عندهم اعوام...قصيت كل خبر يتعلق بشخصية لصقتهم مع كل صورة...تكيت عالطاول نشوف معاهم...هزيت ماركور في يدي...و قربت منهم ربطت كل شخصية مع اختها...مع اني حافظ كل وحدة فيهم...اما توا دور سوار...باش تحفظهم الكل...لدرجة انها ترجع تعرف كلشي عليهم من غير ما تقابلهم حتى...اصلا اهم شي في الخدمة هوني تسلسل...انك توصل تكون جزء من المافيا...المافيا لي تظهر لناس بوجوه بريئة...لازم تكون فايتهم بخطوة...خطوة وحدة كهو تفرق برشا في عالم المافيا...كملت خدمتي غادي...سكرت الباب و خرجت...رجعت لصالة نلقاها مزالت راقدة...اصلا طاح الليل احسن شي تطلع لبيتها توا ترتاح...قربت منها فيقتها...نطرت من بلاصتها مفجوعة...عرفتها كانت تحلم...كبست على كتفها نحكي
انا:اهدا ما صار شي
سوار؛ب باهي
انا:برا لبيتك ارتاح
سوار:قداش ساعة
انا:20:00 برا كول شي و ارقد بكري
سوار:م منحبش...ميسالش نكمل نومتي هوني...كان ميقلقكش...تاعبة و منجمتش نطلع
انا:باهي على راحتك
سوار؛عيشك
خليتها رجعت تسطحت...طلعت لبيتي...نحيت مريولي...طيشتو ندرا وين جا...اصلا فاد عاللخر...شيعديهم 3 اشهر هوني زح...و اكثر من هكا اول مرة نتلها بطفلة المدة هاذي الكل...تي حتى من شخصيتها لازمها برشا باش تتغير...هذا اذا تغيرت...دخلتولبيت البانو عملت دوش...بدلت دبشي...و ترميت عالسرير...غطست في النوم فيسع...اصلا حتى هو اليوم يتعب عاللخرذ
فقت الصباح...هزيت تليفوني نشوف ساعة لقيتها 5:30...غميت على راسي...نص ساعة راحت في نوم...هزيت روحي دخلت لبيت البانو غسلت وجهي...صحصحت شوية...و خرجت...لبست دبشي...و خرجت...كنت باش نتعدا لبيتها نفيقها...اما ذكرت لهي رقدت في الصالة...نفخت و رجعت نزلت...اصلا باش ترصالي نتأخر نص ساعة اخرى في جرتها...دوب ما وصلت لصالة عينيا وساعو...و انا نشوف فيها...قاعدة عالفوتاي...لابسة دبش سبور...و هازة البيسي في يدها تبربش فيه...طلعت راسها تشوف معايا و تحكي
سوار:بونجور
طلعت حاجبي...و انا مركز معاه...تي بالحق هاذي فاقت قابلي و قاعدة تحكي معايا...و لا انا لي قاعد نحلم...فيقتني من سرحتي كيف رجعت تحكي
سوار:تأخرت شوية قلت نعدي الوقت في البيسي لين جي انت
انا:باهي باهي خلينا نمشو
سوار؛باهي
سكرت البيسي حطاتو عالطاولة...هزت دبوزة ما من عالطاولة...تي ظاهر محضرة روحها من بكري...عديت يدي على شعري...و خرجت معاها...بديت نجري و هي معايا...غزرتلها نحكي
انا:كيف حتى قمت بكري
سوار:من اليوم باش نفيق ديما وحدي
انا:تحب تقول لانت باش تتعود
سوار؛لا اما
انا:اما ؟
سوار؛سوار جديدة باش تتعود
انا:كي هكا باش ندخلو في المضمون من اليوم
سوار:بالطبيعة موافقة
انا:هيا ملا خف روحك
سوار؛باهي
من كنت نجري بالشوية...زدت في الفيتاس...و هي معايا...اهم شي انها بدات تتعود عالوضع..و هذا باش يساعدني برشا...اني نعاونها تتغير...و تكون شخصية جديدة
سوار تحكي:
نجري و نشوف معاه كيف سابقني بخطوات...خطوات خلاهم بينا باش انا نمشي فيهم...باش نتعلم منهم...من اليوم انا باش نكون سوار جديدة...باش نحاول نبني شخصيية اخرى...شخصية تساعدني نكون في دومان هذا...منعرفش قداش بقينا نجرو...لين وصلنا ورا دار...وقفت ناخو نفس...بالسيف...عكسو هو لي فرغ دبوزةط الما على وجهو...دورت عينيا عالبلاصة...نشوف في حاجات عالارض...فكروني في يمات الليسي...عقدت حواجبي و طلعت راسي نحكي معاه
انا:شنوة هذوما
زياد؛معدات تدريب
انا:تدريب متاع شنوة
زياد:ياخي متتعبش من الاسئلة انت
انا:اما
زياد:اسكت و حضر روحك
انا:هاني حاضرة شنعمل
هز تليفونو...ندرا شكان يعمل و غزرلي يحكي
زياد؛5 دقايق في يدك باش تهز دبابز لهوني و تحطهم في صندوق هذاكا من غير ما تكسر حتى وحدة
انا:كااامل ؟
زياد:مممم
انا:ياخي نورمال انت...فايت 100 دبوزة كيف تحبني نهزهم في 5 دقايق بربي
زياد:وقتك بدا
قحرتلو...نحيت الفاست رميتها عالارض...بقيت بمريول...من غير كمام...هزيت اربع دبوزات في يدي ركحتهم في صندوق...بقيت على اكا الحالة رايحة جاية...لين سمعتو يحكي
زياد؛وفا وقتك...40 دبوزة في 5 دقايق
بقيت نشوف معاهم...لحق يحسبهم زح...نتنفس بالقاوي...فلت دبوزة لي بقات في يدي...تبسم على جنب يحكي
زياد:لازمك تشد روحك اكثر
انا:شننوة
زياد:هيا توا عندنا خدمة اهم
انا:علاش خليتني نلمهم
تلفت على غفلة...جا وجهي في صدىو بحكم كنت مخالطة عليه...طلعت راسي نسمع في يحكي
زياد:اهم شي هوني انك تكون خفيفة...لدرجة حد ما يحس بيك
انا:باهي
وخر لتالي و تلفت...خذيت نفس...هزيت الفاست متاعي من الارض...و خالطت عليه...دوب ما وصلنا للباب...ركات قدامنا كرهبة...نزل منها واحد...قرب من زياد يحكي
هو؛مسيو زياد
زياد:رياض شتعمل هوني
هو:وصلت اللي وصيتني عليه تعرف منجم ناثق في حد
زياد:باهي جيبهم
هو:باهي اتو دقيقة
مشا للكرهبة و رجع...هاز في يدو...كرتابل حطو في يدو يحكي
هو:مسيو لوصيتني عليه الكل الداخل...و كان احتجت شي كلمني
زياد:باهي
مشا راجل بقيت نشوف معاه...تلفتلي زياد يحكي
زياد:مطولة هوني
انا:اه لا لا هاني داخلة
زياد:باهي
دخلت وراه...رما الكرتابل عالارض..و دخل للكوجينة...جبد دبوزة حليب شرب منها...هزيت العصير...فرغتو في الكاس...جيت باش نشرب فك الكاسة من يدي...حطها عالطاولة...و حط دبوزة الحليب في يدي يحكي
زياد:الحليب احسن
انا:باهي
زياد:برا اعمل دوش...و انزل عندنا ما نعملو
انا:باش ناكول شي قبل
زياد:برا ريقل روحك تو نحط انا الفطور
انا:باهي فيسع
طلعت نجري لبيتي...عملت دوش تفرهدت بيه...خرجت فيسع...حليت القارد روب...لبست سروال جين و خلعة...لميت شعري...و نزلت للكوجينة...لقيتو حط طاولة...عينيا وساعت...قعدت عالكرسي نحكي
انا:شنوة هذا
زياد:من اليوم باش يكون فطورك هكا
انا:ياخي عاملة رجيم انا
زياد:كول و اسكت
انا:باهي
بقيت ناكول و نغزل...تي بعد طرح الجري متاع صباح باش ناكول هكا...و هو عامل مولا دار مش هوني...ما صدقت لربي كملت هالفطور المحنون و قمت
.نلم في الحصون بغزول...زح مزلت جيعانة...تو نورمال هذا...يفطرني شطر ماكلة...هز روحو وقف...يحكي
زياد:سيب من يدك و ايجا معايا
انا:وين
نفخ...و خرج من الكوجينة...خذيت نفس...شنعمل كي انا نحب نسأل برشا و هو يكره الاسئلة...خالطت عليه...نشوف فيه دخل لبيت...و خلا الباب مفتوح...قربت منو...دخلت وراه...دورت عينيا عالبلاصة...برشا صور...برشا كتيبة و علامات...عقدت حواجبي...و دورت راسي نشوف معاه...متكي على طاولة كبيرة...معبية ورق...و تصاور...نسمع فيه يحكي
زياد:البيت هاذي باش تكون البيت السرية هوني
انا:يعني
زياد:يعني انو خدمتنا الكل باش تعتمد عالموجود هوني
استغربت كلامو...قربت شوية...نشوف مع تصاور المعلقة عالحيط...تي فايت عشرة صور...قرب مني وقف ورايا بالظبط...حسيت بقربو مني...خاطر ما نظهر شي قدام جهامتو...نسمع في صوتو لي عبا البيت الكل
زياد:اللي قاعدة تشوف فيهم توا...من اكبر شخصيات في البلاد...و برا البلاد...و كل شخصية عندها علاقة مع بعضها بطريقة و لا باخرى...فما علاقات معروفة...و فما علاقات لازم انت تعرفها
انا:شقصدك بالظبط
زياد:فما علاقات سرية...تجمع بينهم...علاقات حد ما ينجم يعرفها..كان اذا دخل لديارهم و قعد على طاولتهم
انا:و انا لي باش نكون على طاولتهم
زياد:برافو...بخبرتك لباش تكتسبها مع الوقت...راح تخليك تستدرج كل شخصية بطريقتك...كمية الاخبار لي انت راح جيبها منهم هي لي حاجتي بيها انا
انا:باهي اما شنوة لي يخليك تتاكد اني باش ننجح في المهمة هاذي
زياد:هدفك
انا:شتقصد زياد:انك توصل و تكون مع حد فيهم...انك تثبت روحك في وسطهم...و تنسى الخوف لداخلك...انك تنجح تبني شخصية جديدة...كل هالشي...باش يعاونك انك توصل لهدفك...و تاخو حقك في اللي وصلك لهوني
الحلقه السابقه2
الحلقه التالية 4
جميع الاحلقات
0 comments:
Post a Comment