الحكايه: ثهاااي اسمي خيرة و يدلوعي خوخة عمري 19 سنة 5 في عينيكم حبست القراية فالثالثة ابتدائي خاطيني قراية ... شابة و مسرارة كيما نوارة بنت الحارة انا البنت الوحيدة عند والديا و المازوزية تاع الدار عندي 5 تاع خواتي كبار عليا يضلو يعسو فيا بففف سامطين رهج (مزعوقة و مقلقة لي يشوفني يحسبني نبيع الزطلة ) حكايتي بدات نهار قررت ندير ستاج في صناعة الحلويات ايييه الباتيسري و مشتقاته ... و مع انا كان راسي خفيف قدرت نتعلم و نفنن كي ديت الديبلوما تاعي لقيت خدمة عند صاحب خويا المزعوق كونت نتمسخر عليه بوخنونة و دوكا راه عندو حانوت كبير و ولا ارتيست تاع الصح .. ((بيناتنا ما يشبه لوالووو بصح البيزنس يحكي )) كان يتهلا فيا بحكم انا خت صاحبو جامي قالي ديري حاجة صعيبة الى ان جاء النهار المشؤوم (خاطيني الفصحى خخخخ ) نهار قالي كاين عرس و عندك خدمة كبيرة نتاكل عليك !!! ...انا : بصح ... ***هو: علابالي تقدريلها ****انا : ---------- *****هو: مالك سكتي ***انا: والو دوك نبدا الخدمة ***هو : هاكا نحبك تسمعي لكلام ختي --و انا فقلبي نقول : ختك يا وجه اللوح ختك انا ،،،، علاااش راك تشوفني نسكن معاك ماذرفاكر دارلي العفسة تاع نحبك كي خوياا ااااا كي ختي ---------------------- و بطبيعة الحال درت ڨاتو يهبل بصح ديرتلو الملح اووبس غلطة و الله كل نوع من الڨاتو فيه ملح كثر م الما تاع البحر درت روينة و اغلب الناس تسممو فهاداك العرس و بوخنونة تاعي قالي بلغ السيل الزبااا (هذا مقطع من الشعر يا بنات خخخخخ نيتكم ناقصة يا عفريتات) و طردني من الخدمة 'عاونينا و كليكي هد الاعلان هكدا نقدرو نطورو رواحنا و نزيدو فليكورنيك '
بين نهار و ليلة وليت لا خدمة لا زدمة و رجعت مثل روبانزل محبوسة بين جدران المنزل . في يوم من الايام جاو كي ناس لدارنا انا فرحت قولت ما بقاليش بزاف و نصبغ شعري ايييه ندير لي ماش لكن حدث مالم يكون في الحسبان ... وجدت القهوة و ستيكيت روحي وليت نشبه لاريانا غراندي و دخلت للصالون حشمانة قريب ما نحرق الرجل تاع وحدة و نتوخد ف مستقبلي بصح مزيا انا شاطرة ما درتش فضايح (الشطاارة يا حبيبي ) جمعت قدامهم و بقيت نتبسم زي العبيطة ماما قاتلهم غي الخير علاش جيتو هههه نبع الحنان تكلاشي نورمال قالولها جينا نعرضوكم للعرس تاع رامي ... احلامي الوردية تفتتت بين عيناي بووه عليا بوووه قوتلهم رامي شكون قالولي خو ياسين (مون بوخنونة ) انا : اااااه الله يخسر ****هوما : وااااش ؟؟؟ ماما قرصتني قوتلهم الله يسخر و نشاله تكون طيبة من الطيبات (رجعت اخينا فهاداك الموقف مالغري خلطت الهدرة .... ما نعرفش نحكي للاسف) ****************************نتار العرس : سلفت روبة علا جارتي خداوج و شعري حددتو بالحداد و ديرتلو الكوردون ... درت مايك اب خفيف ... المهم باختصار جيت نشبه لانجيلينا جولي خخخخ (جيت خير منها ) وصلنا لقاعة الافرااح تعشينا و انا نقطة ضعفي الماكلة (ناشيونال ابو ظبي طلبوني ف برنامج خلق ليفترس مي ما قبلتش ) جابو العريس و معاه بيبيشي مون كولشي جا شباب لبس كوستوم صفر يعمي العينين و مشط شعره و لبس صباااط قهوي رااشي مصدي مي جا بوغوس تاع الصح منين شافني حل فمو عجبته عجبته يا جدكم جا عندي سلم عليا و قالي جيتي شابة مصفارتي *****انا : نتا حرفيا راك مصفار *****هو: اااه هاكا تقوليلي ((كان باغي يلعبها حنين بصح نسا صوتو لي يزعزع الجبااال )) ****هو: توحشك ****انا : يتوحشك حالوحش نشاله ****هو: طييييط طيييط طيييط (طيحلي الكلاام ) *****انا: بغيت نلعبها رومانسية و ندير كيما كاجول مع شاروخان في الفيلم تاعkuch kuch huttaa hai بصح للاسف حبيبي طلع وحش قريب يديفورميلي فيغورتي *************************** فاتو 3 شهور و انا و هو كل يوم نحكيو فالفيس و البورطابل ولينا اونتشوبل يا جدككم حبيتوو و حبني مي الله غالب خدعتو خلاني وااااع نووورماااال ما تأثرتش .. فاتو الايام و انا ما سمعت حتا خبر عليه قالولي تزوج وحدة جيلبابيستااا كانت تقرا معاه يامات الليسي و انا قعدت بايغة بعد ما ضيعت الجوهرة من يدي (قاال جوهرة قااال ) بصح دي خلق ما يضيعش ... مرة كانت الشتا طيح و انا كنت براا حتان سمعت شطباااح شطباااح طااع طاااع فالتفتت ورائي و اذ بي ارى بقلاوتان تتدابزان (خخحخ خاطيني الفصحى) فحبيت نلعبها رجلة نسلك بيناتهم و هوما الحيط لخوه الضربة جات فياا هخهه الزهر تاع شكوبي نضت لقيت روحي فالمستشفى و قدامي واحد البقلاااااااااااوة ياااااي قريب ناكلو مع كونت جيعانة قالي لاباااس سمحيلي انا لي ضربتك ... اوووه الاعتراف نصف الرجولة **** انا:مسموح لك ****هو: نوصلك لدااار انا تفكرت الدار قريب بلت على روحي قوتلو :يرح...م ....وا..لديي....ك قولي ....شحااا....ل ......راهي *****هو: 6 تاع الصبح ليلة كاملة و نتي هنا ****انا :((عرفت روحي هااالكة .... نعرف خوتي )) اااه مغسي ****************************رحت لدااار لقيت خوتي 5 تبارك الله يستناوني .... ولاو يضربو بالتناوب و انا نضحك ههه تفكرت حبيبي البقلاوة .... المهم قالولي كلام يجرح اي بنت لكن انا و الله ما تأثرت ....مشاعر معوقة مي حكيتلهم كلشي وحرفت شوية معلومات و ديتهم لسبيطار قالولهم بلي كنت هنااا خاوتي ندامو و قررو يسمحولي ... شراولي نوتيلا و ميلكا و داوني للبحر فاكونس ياا جدكم ... انا ما نعرفش نعووم درت التبهداااايل و اصلا تبهديلايشن كبيرة غير من جيهة اللبسة ... بفف لبست جبة عريضة كي كنت ندخل معوم كانت تنتفخ و انا كنت نحس روحي مداام نفيخة لي تلعب فسبونجبووب .
.... المهم تلاقيت هداك البقلاااوة و قالي اسمي سامي يوسف ..((تفكرت الداعية)) قالي عجبتيني باغي نتعرف بيك و انا جاتني علا قلبي مي خاوتي الله غالب قوتلو انا ماشي bitch تتعرف فيها انا رباني راجل اذا راك حاب كاش حاجة نمدلك العنوان و تعال لتخبطني درتلو دراااما هو تخلع و هررب كيما العادة بصح طلع رجاااال و جا خطبني و دوكا راه خطشيبي بالرسمي و وعدني يديني للموزمبيق و مالي فشهر العسل يااا حبيبي
#النهاية الكاتبه مجهولة : احدا فتياة الجزائر الرائعات
0 comments:
Post a Comment